KAN DAMTLANG TIHNA A NI E

Khua a hnim ruih a, keimahin kan chaw ei dawhkan ka kil a. Thingpuisen hang in in no ka dawm a. Keimahin ka ti tak nangin, keimah bak he inah hian awm ka awm tawh chuan loh avangin ka tih thin dan reng tho a ni. Ruah sur tur in tham thli thaw vuk vuk chuan ka ngaihtuahna chu hmun hran hranah a chhem kual a.

Tukverh lam ka hawi phei chuan purdah in zar fai sar chu ka thlek vang vang a, ka suk lohna pawh a rei leh tawh a, mahse, mahni chauha awm na na na chu a la fai ser mai a, kan chhangchhiat zual lai te kha chuan, 'I kut balin purdah zut suh' tih te kha kan sawi tam ber a ni a, tunah chuan ka fate ho kha tlang hran hranah pasal fanau neiin an bo zo ta a, purdah bal tur pawh ka nei ta lo.

Sana ka en a, tlai dar 4 a lo kawk vung tawh a, buhfai sil turin dut no in buhfai ka'n suak chhuak a, buhfai bag ka lei lohna chin pawh a rei ta e. Kan kim lai kha chuan buhfai bag zo chak lutuk kha lei dawn te khan ka thinrim pui lek lek fo kha a ni si a, buhfai zo duak duak te kha malsawmna zawk a lo ni.

Pindan chhung ka lut a, zing ka thawhhlima ka khum pawh tih hnawk miah lohvin a ngai ang angin a lo awm a. Ka mitthlaah ka fa te ho tet laia rizai thehdarh a an zuang vel lai a rawn lang a, lunglenna in min rawn tuam hlup hlup a ni ber.

Ruah a sur ta tluk tluk a, vawt deuh dawna ka hriat avangin ka pheikhawk bun tumin pheikhawk bawm kan hawng dawn a, a lo felfai thlap a. Pheikhawk bawm hma chiaha pheikhawk dah thin, a chhunga hung lut thei thlawt ngai lo, ka an pui fo thin pa ber pheikhawk dah dan pawh, piallei thuahriat kara min zal san tawh avangin an pui tur reng reng a awm tawh lo. Pheikhawk bawm pawna a dah thin pawh kha ,'Ka la dam e' tihna a lo ni si a, an pui tur reng hi a lo ni lo.

Hetiang hian kan upat hunah kan la ngaihtuah maithei asin!

Chhangchhiat lai chuan in a hnawk rem rum a, kan dam tihna a lo ni. Eitur bawma eitur a zo duak duak a, kan dam tihna bawk a lo ni. Insuk tur a tawp thei lo a, hei pawh kan la dam tlang tihna bawk a lo ni. Engmah hi zahthlaka lak tur a ni lo a, hah avanga an pui tur pawh a lo ni hek lo. Kan damtlang tihna a ni a, malsawmna a ni e. Midang in fai khum tumin tang vak lo la, i nun hlimna tawk khan thawk mai la, engkim mai hi ngaihlu em em phawt mai teh. Engtik niah emaw chuan tihnawktute kha hlate khuaah an la thlawk bo ang a, i hauh thin te kha i duat phak lohvin an la bo zo maithei asin.