There She Goes - Chapter 10

Thlanmual kan chhuahsan chuan tlailam dar li a ri tawh a. Kan kalna kha Laipuitlang thlanmual a ni a, Zuangtui lama awm anih avangin tlan ve vang vang chu a ngai dawn a ni.

"Thil ei ang hmiang, ka duh aiin i cher tlat," min rawn ti a. A ni lah taka, U Thantea damloh atang khan chaw mumal hi ka ei tam lo khawp mai. Chutah kan inhauh hnu phei kha chuan chaw ka ei tha lo tawp, U Thantea'n ka bula a rawn kil ve phei chuan ka tho daih zel a, ka weight chu ka loss ve nial nual ang.

Bawngkawn kan thlen chuan Sairang road lamah a peng a, tawite kan tlan a,a ding zui ta a. Restaurant lian vak lo-ah kan lut a, a nghaktute pawh Gorkhali hmel pu an ni.

"Ka thianpa pakhat min hrilh a nia, thil an siam tui teh a nia aw," a rawn ti a.

Restaurant a te si, amah a pa lian si, a hnawk riau hian ka hria. Ramsanga chuan eitur chu min chah kep leh vek a, kan nghah lai chuan, "I pa a dam tha maw?" ka ti ve ringawt a, a nu thlan chauh kan tlawh sia, a pa chu a la dam turah kan ngai ngawt a.

A hmel chu a rawn chang nghal ul a, thil zawh loh tawp tur ka zawt a ni ngei mai.

"Ka hre lo, min zawt ta sa sa a, hre ve la a tha zawk tak ang," a rawn ti a.

"Ka nu a uire san a, ka nu khan a hre lo der thin a, mahse a thihul dawn laiin a boruak buai nen, ka pa uirena a tawrh hrehawm nen a buai zo ta a. Ka nu nen chuan kan chhuahsan a, ka pa te lam chu ka tlawh leh ngai tawh lo," a rawn ti a.

Zawt fu lo ka inti ang reng hle a. A sawi zawm tawh dawn lo emaw ka tih hnuah, "Chuan, i mitah khan khawharna ka hmu thin a, ka nu mit a ka hmuh thin ang kha, Zodin, i pasal hi then turin ka ti lo che, a uire san ve che em pawh engmah ka hre lo, a bulah i hlim lo tih chiah ka hre thei. Ka nu ang a a nasat lutuk hnu, depression nena hun hman a ngaih hnuah hian i tal chhuak ve chauh ang tih ka hlau a ni. Ka neih duh vang che a sawi ka ni lo, min nei rawh pawh ka ti lo, Zodin, zalenin awm rawh. Hlim la ka duh a ni," a rawn ti ta duah a. Ka ngawi reng a. U Thantea chungchang chu ka hrilh ang nge hrilh lo ang tih ka ngaihtuah a. Hrilh rih loh tha zawkin ka hria a.

Ei tur a rawn thleng a, an siam  tui kher mai lehnghal a, ka ei teuh mai. Ka ei hnem deuh aniang Ramsanga hmel rum ul pawh a rawn nui leh thei ta a, "Hetiang hian i riltam tih sawi lang chuan hei aia hma hian ka thlen phei pui tur che a nia," a rawn ti a.

"I bulah ka awm a, ka riltam tih pawh ka hre bik hleinem," ka ti let a. A lo nui hak hak a.

Min en reng lai chuan, " Zodin, min lo nghak lawk rawh," a ti a, pawn lam chu a pan nal nal a. Restaurant pawna mi pakhat lo ding chu a, va rek nawlh ringawt a. Ka ka ho ringawt a, ka tlan chhuak ve nghal a. Chu pa mobile chu a lo dil mek a, kawngsir vel a awm ho chuan an en hu hu a. Hreh tak chungin chu a mi reh pa chuan mobile chu a rawn phawrh ta a. Pawna ka chhuah ve tho tawh avangin min rawn ko a, "Zodin, mobile gallery kha hawng lawk teh," tih pahin min rawn pe a. Amah chuan a mi man pa chu a la vuan bet thung a.

Gallery kan hawng chu ka thlalak hlir, vawiin lam ami ho te a lo ni a, Ramsanga nen thlan kan chei lai te, a kimchang khawp mai, nichin lawk ami thleng khan. Ramsanga chu ka hmuh tir a, a thinrim chuan a beng sawk a. A aia na in la beng se ka ti. Kan ramhuai putara mai mai chu a!

"Zodin, bill kha lo pe mai ta che, police station hnaih lai tak a ni bawk a, vawm lut nghal law law teh ang," a rawn ti a. Restaurantah chuan ka tlan lut leh a, bill ka pe fel a, anni pahnih Bawngkawn police station lama an in kai phei chu ka um zui ta a.

Station ka va thlenpui chuan Police pakhat chuan case ziah luh dan tur a lo zawt mek a. "Zan khat lock up-ah te han riak ve se, heng hi a tir tu hnena a sawi chhuak a, Zodini hian a tuar a nih chuan case chu ka rawn ziak lut ang," tih pahin ami man pa chu a va pan hnai a, “A tirtu che hnenah chuan i phone a bo hlauh mai tih i lo hrilh dawn nia,” a ti a, min kai chhuak ta daih a.

Motor kan lut a, a ngawi reng a. Thawklehkhatah a steering chu a beng pawp a, "Hrep tak chuan, eng ang pasal nge i neih a, eng vanga chhuahsan thei lo nge i nih, Zodin?" a rawn ti tuarh a, ka hlau tak zet.

Kan ngawi leh vang vang a, "Ka tihpalh aw ka vin che a," a rawn ti dam leh thluam a, engmah pawh ka sawi thei lo. “Chhuak thei lovin a vau che em ni? Nge pasal then nih i duh loh zawk? Nupa inthen hma hian ngaihtuah tur tam tak a awm ngei ang tih ka ring, min hrilh rawh, puih i ngai em? Zodinpui, heng nun hi i phu hlawl lo,” a rawn ti a. Ka mittui chu ka biangah chuan a rawn lum thla pap a.

“Ka la then dawn alawm, hun tlem ka la mamawh a ni, tin, ka thiamchanna tur te ka ngaihtuah ve a ngai a, chung chu pawimawh ber ni lo mahse, ka chhuahsan hnua a thiltih tur ka ngaihtuah in, invenna tur tam tak ka mamawh a ni,” ka ti a.

“Fim takin inngaihtuah ang che, nupa inthen hi thil tha ber  a ni hauh lo, siamthat leh chuang tur a awm loh chuan enge awm dun reng chu sawt ang?” a ti a. “Zodinpui, ka ru haw mai ang che chu” a rawn ti thut a.

Ka meng phawk nasa lutuk leh ka hamhaih lutuk hmel a rawn hmuh chuan a rawn nui chhuak ta a. Motor chu a tinung a, kan inkhalh chhuak ta a.

“Zodin, kei chuan ka duh lutuk che a, ka bula awm turin ka duh che. I awm loh chuan ka ruak a, ka kim lo a ni. Mahse, i pasal i lo then ta anih pawh in ka hnenah lo kal nghal turin ka beisei lo che. I duhthlanna fim tak hmangin thutluk siam thin la, eng tin pawn thutlukna siam la, hlim ang che. I hlim lo tih hrerengin i hnenah awm thei bawk si lo ila, ka a thei mai ang. I pasal pawh a in siam tha anih chuan kum 10 chuang in innei tawh a, enge then ngai, i hlimpui theih phawt chuan. Mahse, tun anga nun chep taka awm tir tur che hian dikna a nei lo a, hetiang ang reng anih dawn hi chuan i chhiat vek hmain chhuahsan ang che” a rawn ti duah a.

“Ka hnen aia i hlimna leh i duh midang i tawn pawn, ka pawm vek, hlim la ka duh ber, kei erawh chuan nangmah chiah hi ka duh che a, engtik lai pawhin ka kiangah chuan i tan hmun a awm reng ang, ka hnena lo kal tur hian inngaihtuah nawn ngai suh, i tan ka lo awm reng ang,” a ti a.

Engmah sawi ve tur ka hre hlawl lo a, ka laka a inthlahrung lutuk te chuan ka tah a ti chhuak tlat zawk nia.

“Ramsang, nuthlawi pasal atan chuan i tha mah mah alawm. Pasal ka then te chuan nuthlawi ve mai ka ni tawh dawn a, i chhungte pawn min duh lo ang, bakah fa pawh ka neih theih loh hi, kawng tinrengin i tan ka tling lo tawp. Hun remchang kan hmuh fuh chang a ka lo pan leh thin che pawh hi zahthlak a ti khawp mai,” ka ti chuai raih a.

“Zodinpui, khang thu kha vawi khat mah sawi leh tawh lo ang che,” a rawn ti rum ul a. Zarkawt kan lo thleng der tawh a. Ka chhuk dawn chuan min rawn man bet a, “Thingpui in tur talin min sawm dawn lo em ni? Kan inhmuh leh hun tur pawh kan hriat loh hi,” a rawn ti a.

Ka nui sak a, “Boss, thingpui rawn in la,” ka tia, a rawn nui let a, dawrah chuan kan in zui lut ta a.

Awm dan pawh hi ka thiam tawh lo. A tan hian tling lo ka inti em em a, eng ang pawhin U Thantea lo then pawh ni ila, a bula ka sawi tawh ang khan, nuthlawi ka ni tawh dawn a, a chhungten min iai ngei ang a, chuan fa pawh ka nei thei lo chu a nia, ani ang tlangval to lutuk in nuthlawi an nei ringawt tur leh min an selna tur zawng zawng ka ngaihtuah chang phei hi chuan hnaih tawh loh mai hi ka duh thin.

Tlaiah khan thingpui a in zawh in a haw a, a awm dan tur a rawn in report tur thu min hrilh nawn leh a, phone pick up turin min chah uluk hle bawk. A kal tur kha ka thlir liam zui a.

Vawiina kan mi man pa khan U Thantea a lo hrilh chuan inah in hauhna thlen ngei ka ring, mahse, Ramsanga khan a hrilh chiang bawk a, a tih ngam chu ka ring chiah lo a. Lo hrilh lo pawh ni se, ka haw chak lo tak zet, khatianga min zui ru lo tur khan ka hrilh chiang viau si a, ka thusawi a ngai pawimawh lo lutuk te chuan ka huat a ti zual em em a ni.

Tlai dar 7 a rik chuan account close fel turin ka hrilh a, an tihfel chhungin ka fridge a ka zu dah chu ka in a, tunlai chu ka hrat zual deuh hlek a, ka la thlah leh vat em ang chu.

Dawr khar fel hnu chuan ka inngaihtuah vang vang a, ka haw chak lo takzet a, Maengi ka call a, ka nu te in lamah chaw ka ei tur thu ka hrilh a. Ka nu te in lam pan chuan ka chhuak zui ta nghal a. Ka kai deuh chiai bawk. Keimaha ka leng thut chu ka nu chuan mak a lo ti hle a, U Thantea awmna chin te min lo zawt chul a, a makpa rangkachak hi chu a ngai thin teh a nia.

“Nu ka ngai che a, engmah hrilh lawk lovin ka lo kal thut alawm, i duh leh phone ve la,” ka ti a, ka nu chuan ka tawng lai chu min thlir reng a, ka ka bul velah chuan a hnar a rawn len a, ka lo nui tha a.

“Bawihi, enge dik lo awm, zu i in em ni?” a rawn ti a.

“Nu, min ngai ve ngai lo mi? Ngatinge in lo len ve ngai loh a,” tih atangin bul ka tan a, zanin chu a tap zawngin ka rilru a kal laklawh tlat. Ka mittui a rawn tla a.

“Nu, in bulah ka lo awm leh duh tawh, U Thantea ka then ang a, inbulah ka lo awm leh tawh dawn aw, nu, in naute duat lai kha ka ni leh duh,” ka ti a, ka tap tuau a.

“Enge maw i awmzia le, Thantea nen in inhau em ni?” a rawn ti a, mak ti deuh hian min en a, zu chu in zeuh zeuh mah ila, ka nu hmaah hian ka la rui ngai lo a, a tan chuan a mak ve dawn em asin.

“Inhau lo ve nu, U Thantea chu inah a thu ngawi reng a, min hauhna tur pawh a hre lo a, sawi tur pawh a hre lo a, a thu ngawi reng a, nu, titi pui tur pawh ka nei ngai lo a, tv en pui tur pawh ka nei ngai lo a, ka thinlung hi a ruak vek zel, ka lung a leng thei lutuk,” ka ti a, ka no laklawh a, ka tap tuau a, ka titawp thei bawk si lo.

“Bawihi, chaw ei ka siam ang aw, chaw ei ang u,” a rawn ti a.

“Chaw ei khamah haw turin min ti miah suh, ka haw peih lo, ka riak dawn nia,” ka ti leh a.

“A a lo mai rawh, i riah duh chuan in pa call ila, ani pawh lo riak ve se a tha alawm,” a tia.

“Ka duh lo, nu, chaw eikhamah kan in lehkha den ang a, ka naupan laia kan tih ang khan, ka chak loh chuan ka haw ang,” ka ti a.

“I va ninawm tak e aw, in hauh na in nei em maw ni le, zu rim te chu i nam ang hiam a, zu heh deuh te chu tunge nupui atan duh reng ang ni, khawi teh, chaw ei kan siam ang,” a ti a.

“Nu, artui min kan rawh aw,” ka ti leh a. Kum 10 chuang ka pangchang tawh lo, ka kai deuh bawk a, ka pangchang chak tlat, kan in chu ka ngai ngawih ngawih a, Thanramhuaia bulah ka haw leh peih tawh lo hle bawk.

Fanu mal ka ni a, ka pasal neih dawn thlengin naute en a min en ka ni. Chhunah sikul ka kal a, tlaiah Homework ka ti fel vek a, zanah chaw eikhamin kan chhungkua khan kan infiam thin. A changin kan in lehkhaden a, a chang leh tv kan en ho a, ka duh ang apiang kan ti ho thin a, he inah hian lal fanu ka ni. Chaw ei dawn apiangin ka nu in artui min kan sak thin a, ka hmeh duhzawng dang an siam pawn artui kan ka ngen ngei ngei thin.

Khang nun zawng zawng kha pasal ka neih hnu khan a tawp nghal vek a, ka duh zawng min siam sak tu an awm ngai lo. Thingpui tak ngial pawh kan awmpui nu siam lo chu keima siam vek. Zanah ni se chaw kan ei kham a, keimahin tv ka en a, U Thantea computer hmaah a thu tawp a. Zanin hian chung zawng zawng chu ka khaikhin a, ka lung a leng thar ngawih ngawih. Ka lo kai ve deuh bawk si a, ka nu te lah chuan ka thusawi an awih dawn lo nasa tih ka hria.

Chaw kan ei lai chuan ka pa chuan, “Bawihi, fate hi in nei si lova, i khua hi a lo har thin lutuk a ni ang e, ka lo ngaihtuah tawi hle mai, fate hi la ve mai ta che u. I khawharna tur lam hi ka lo ngaihtuah ngai lo a,” a rawn ti a.

“A, ka enkawl thiam lo ang. Pa, ka lo haw dawn, bialpa hmeltha deuh ka nei a, U Thantea aia hmeltha,” ka tia, ka nui hak hak a.

Ka nu chuan, “Uang uang suh, i lo uire riau riau ang e, tun ang boruakah, in pa a la dam kawr si, min an rel phar nasa lutuk che ang a, kan tuar zo lo ang,” a rawn ti a. Ka lungphu chu a rawn rang dawt dawt a, min min rel chhiat vak chuan an tuar zo dawn lo anih chu.

“Anih leh U Thantea zawk hi uire ta se i tuar zo lo ve tho ang em?” ka ti leh a.

“Zan in chu enge maw i hriat le aw! Ngawi mai mai teh, inthen rual pawh innih tawh loh hi, Thante chu sawi pui la, naute pianghlim lak theihna te kha a awm em kha, kha tiangah te khan in ziak lut ve rawh u,” ka nu chuan a rawn ti a.

Ka pa chuan ngun tak hian min en a, “Bawihi, in pa chuan ngaihzawng a neiin i hria em ni?” a rawn ti dam diai a. Ka lu ka bu nghat nghat a.

“Mipa hi chuan enge maw lai hian nula han chhaih fiam ve te hi kan ching a, kan uire tihna a ni kher lo a nia, tin, an nupui ten an lo thik vak te hian runluih chak tlat mipa te hi an awm ve a nia,” a rawn ti dap dap a. Ka thinlung chuan, “Pa, hman atang khan min lo bum vek asin, kan vai hian,” ka ti mawlh mawlh a, mahse, zu rui mai ka nia, an awih chuang lo ang. Ka mittui chu a rawn tla a, chaw pawh chu ka ei zawm lo a, chaw ei dawhkan chu ka thawhsan ta a, sitting room thutthlengah chuan ka mu kawm ta ngal a.

Ka pa chuan thil dik lo a awm tih a hrethiam a ni ngei ang, ka bulah chuan a rawn thu a, ka lu chu a malchungah a dah a, a phone chu la a, U Thantea chu a bia a, tlaia ka tlawh kawi chaw eia min charh thu leh, a nawmsam vak loh avanga riak tura min duh thu te a va sawi a, a peih chuan ani pawh riak turin a sawm nghal a, a lo hnar a ni ngei ang, phone chu a dah ta a. Ka pa chuan phone a dah hnu chuan ka sam a rawn chul a. “Bawihi, hmeichhiain mahniin zu an in ngai lo aw, i chesual palh hlauh ang e,” min rawn ti dam dap a. Ka mittui chu ka hru mawlh mawlh a.

Chumi zan chuan ka room hluiah ka riak ta a. Ka in ve sek vang nge, ka piah maiah Ramhuai a mu  lo tih ka hriat vang zawk, ka mu tui kher mai. A tuk zing ka thawh chuan dar 7 a lo ri tawh a, ka pa chuan thingpui a lo in mek a, ka va thutpui ve a.

“I tha maw?” a lo ti a.

“Aw tha e, ka mu tha bawk a, ka nuam sawng sawng mai,” ka ti a. Thingpui chu ka inthlit nghal a.

“Pa, awm lo ta ila, dawr hi a buai viau ang em? Mafaka hi i ring zo em?” ka ti a. Mafaka chu ka patea fapa, kan wholesale dawr lama manager-a ka chhawr a nia. Dawr hi ka pa enkawl ber thin kha a nia, kum 60  a tlin khan sawrkar hnathawk pawh an pension  thin alawm a ti tlat a, a enkawl duh tawh lo a, huanah te a kal a, amah nuam zawng tih nan hun a hmang ta daih kha a nia.

Ka thusawi avang chuan a chanchinbu chhiar lai chu dahin min rawn en reng a, “Engati nge? I dawrte nen i enkawl seng ta lo deuh i ti ta em ni?” a rawn ti a.

“Pa, zankhat mitchhin pawh tawk thut thei i ni ve tawh a, hmana dawr changtu tur i ziah kha i la hria em?” ka ti leh a, “Ka makpa Lalthantluanga te nupa in an chang ang, i tih kha. Ngaihtuah tha leh la ka duh a ni, kei chuan dawr ka nei a, U Thantea ni se pension nei vek a ni, chuvangin ngaihtuah kan ngai lo, Mafaka hming hian thlak teh a. Pawi i tih loh chuan. Amah chu hrilh kher pawh a ngai lo a, witness-ah ka lo tang ang. A lehkha zir zawh atanga hna dang pawh zawng lova min puitu a nia,” ka ti zawm zat a.

Ka pa chuan lu bu nghat nghat pahin, “Chutiang zawng chuan ka lo la ngaihtuah ngai miah lo a, a tha hle tak ang chu, nakinah muang marin kan la siam tha dawn nia,” a rawn ti a.

“Pa, naktukah enge thleng dawn kan hre lo a, muangmarin tih a ngai hleinem, ka thiante ukil an tam a, ka rawn tir ang a, lo inngaihtuah chiang la, a tha i tih chuan,” ka ti a.

“Awle, ka naute hi  a lo puitling ta hle a nih hi,” a rawn ti a, a nui suk a. “Huanah ka kal dawn a, lo kal ve ta che,” a rawn ti zawm a, nizan lama ka thusawi avang khan min titi pui zawm duh pawh a ni ang e.

“A, krismas bazaar lai a nia, kal lo phawt ang, nidangah kan kal dawn nia, khawnge ka nu?” ka tih zawm a.

“Inrinni a nia, a bazaar anih kha, thlaithar lei hi i nu nuam tih ve ber a nia, ei tur lah kan awm si lo, chaw te hi rawn ei zeuh zeuh ula a tha ang,” a ti a.

“Nia, pa, urlawk ni hian huanah chuan advance krismas kan hmang dawn mi niang,” ka ti a, a lo phur khawp a, “Lo plan la, ka dawr nghak te pawh ka rawn hruai vek ang,” ka ti a. “Ka nu chu ka nghak lo mai ang, dawrah ka tlai lutuk dawn,” tih pahin ka pa chu ka chhuahsan ta a.

Inah pawh haw lovin dawrah ka tlang a, kal pahin Maengi ka be zuai a, U Thantea ina a awm thu min hrilh a, ni engzat nge ka biak loh tawh pawh ka hre lo. A duhthlanna a lawm le. Mahse, ka inpeih tep tawh, ka mangtha vang vang tep, Zodinpui, tuar hram hram rawh ka inti mawlh mawlh a.

Ka pa chuan Urlawkni-a huan a Advance Krismas hman dan tur chu a lo duang fel thlap a, kan dawr nghak te nula tlangval an nih avangin tlai dar 3 vela chaw ei a, haw leh mai turin programme a lo duang a. Zanlam boruak te an chhim ve duh a ring a niang, a in la zei ngei mai.

Bus kan hire a, urlawkni chuan dawr kan khar hmak a, kan regular customer te hnenah a hma ni in kan hrilh lawk vek avangin nimin lam phei kha chu kan buai viau a ni. Bus-ah chuan kan hnathawk ho an kal a, keini nupa chu car in kan kal a, nizan lamah dawr khar hnuin Millennium Centre-ah present leiin ka phi buai nasa khawp a, Maengi nen zanah kan tuam mawi leh vek a, ka chau khawp mai, kan meng rei bawk sia. Tukin zingah khan Maengi chuan an khaw lam min pan san a, thilpek tam tak ka lei sak a, motora an rawn lam hma chuan, “Ka pi, ka lo kir hma chu lo haw suh aw, i bulah zel ka awm duh a nia,” a rawn ti ve ngei a.

Ka pa huan hi Sihhmuiah a awm a, a hmun a nuam bawk si a, thlasik a ni a, khawlum hrehawm a awm bawk si lo a. Kan naute ho pawn nuam an ti aniang, thla te an la kual nasa khawp mai. Ka nu leh pa chuan theihtawpin Krismas thei tur ang berin an lo chei a, krismas tree nen an lo ti nasa ve hle a.

Ei tur pawh an lo siam sa nual a, ka nutei tu leh fate ho an lo tel ve bawk a, kan ri ve laih laih a. Dar 2 vela devotion tawi te neih a, chaw ei a haw mai kha tih tur kan ni a, chuvangin thalai lamin tih tur an nei lo luluk ang tih hlauvin an rawngbawl tur te an lo dah bang a. Kan nau te ho chuan inchhaih har har pahin ei tur chu an buatsaih zui malh malh a.

Ka phone chu a rawn ring a, customer an nih ringin ka bag chu ka hai rak rak a, Ramsanga a lo ni a, rang lutukin ka pick up a, thlam atang chuan pawn lam a reh deuh hlek naah ka tlan chhuak a.

“Hello”

“Dawrah ka lo kal a, in lo khar a,” a rawn ti a.

“Aw, van pawi ve, nia, hei kan dawrnghak te ho nen ka pa huanah intihhlimna kan nei alawm mawle,” ka ti a.

“I pualin hetah Krismas chu ka hmang dawn ta a, nimin khan ka rawn thlawk chho leh chiah a, ka nutei a lawm ber zawkin ka hria,” a rawn ti a. Ka hlim ru veng veng thei anih chu.

“Kan inhmuh dun theih chu ka beisei hauh lo nangin, present ka lo lei ve che a, engtinnge kan in pek tak ang aw,” a rawn ti vang vang a.

“A ngai kher lo a sin le,” ka lo ti niah niah a.

“Zaninah thleng lo dawh la, ka rawn thlak mai ang chu,” a rawn ti a, ka nui chhuak ta hak hak a. “Tihdan a awm mai ang, nuam deuhin hun hmang ru, ka chhuk thlak hmain in hmuh leh ngei kan tum dawn nia,” a rawn ti a. Phone chu ka dah ta a. Hnung lam ka hawi chuan U Thantea’n min lo melh run a, a mitmengah chuan zawhna tam tak ka hmu a, ka ngai pawimawh duh lo a, inchhungah ka luh san ta daih a. Ninawm lutuk, aman min spy loh leh a thuihruaite hovin min lo enthla a, ka hne tak zet.

Hun kan hman zawh hnu chuan zawimuangin Aizawl lam kan pan leh ta a, kan nau te ho pawn nuam an ti hlawm khawpin ka hria. Present an dawng tha bawk a, an hlimtlang viau mai. Tumah ina haw tlang tum pawh an awm lo. Kan putara pawn lemchan a thiam khawp a, ka nu leh pa te pawh a duat hmel hleuh hleuh lehpek tawh khawp mai. Tu lem chan thiam thiam kan ti ang chu. 

Haw kawngah chuan U Thantea hnenah in puia kawi ka rawt a, a nu leh pa te present tur ka lei thu ka hrilh a, "I va ti lawmawm thin ve, kal ila ni mai lawm, naktuk krismas te a ni sia, chaw te ei nghal ila tha ang," a tia. Kan inhauh vak hnu a pangngai taka kan inbiak leh vawikhatna a ni ang.

U Thantea te inpui kan thlen chuan min lo lawm thiam khawp a. U Mahlimi leh ka nu leh pa chu ka present lei te chu ka pe a, an lawm thiam khawp mai. U Thantea mizia ka ngaihtuah a, an nun chep ve thin tur zia te ka ngaihtuah a, ka khawngaih ru tak zet a ni.

Chaw ka  ei kham chuan U Mahlimi chuan min rawn ko a, "Zodin, i party thin tiraw?" a rawn ti a.

"Eng maw?" ka ti deuh ha a.

"Englo a nia, Christmas Eve Party invitation ka dawng a, hetiang velah hian ka kal ngai si lo a, ka kal chak bawk sia, min kal pui la,"a rawn ti a.

Dik tak chuan U Thantea nen kan pahnih chauha zan hun hman ai chuan ka chak zawk a. U Thantea phalna la in kal kan tum ta a. Kal pahin U Thantea chu inah kan drop a. Ka inthlak zawk a, World Bank lam panin kan in khalh chhuak ta a.

U Mahlimi chu a zakzum hle a, a zei lo ve reuh bawk si a, tlangnel taka awm turin ka hrilh a. Thian thenkhat te pawh ka hmu nual bawk a. Rin ai takin urlawk pawh ka hmang nuam. Mi rik luai luaina karah chuan gate lam chu ka va en a, mi pakhat chhuak zuai hi ka va hmu a, Ramsanga niin ka hria a, ka phu zawk a. 

U Mahlimi chu a thiante bulah hlim deuh in a lo thu a. Ka kalsawn lawk tur thu leh min mamawh chuan min call mai turin ka hrilh a, gate lam pan chuan ka tlan chhuak ve ta a. 

Kan piah lawka car-a a lut tur chiah chu ka va hmu a, ka inring hman lo, "Ramsang" ka ti a. A rawn hawi phei a, ka lamah chuan a rawn kal phei pawk pawk a. Engmah pawh sawi lovin a motor lamah chuan min kai phei a, car hnungah chuan min thut tir a, min rawn kuah ta hlu hlu a. 

"Krismas hmain ka hmu tawh dawn lo che emaw ni ka ti a," a rawn ti a.

"Ka zak lo tiraw, pasal then duh bawk si lovin ka rawn zui zel che a, i hnung lam kha ka hmu a, ka rawn umzui che a," ka ti a.

"Chutiang sawi suh, engtik hunah pawh ka bulah lo kal rawh, i tan chuan ka awm reng ang," tih pahin min kuah nghet sauh a. "Engmaw i sawi kha, ka hnung lam atang pawn min hre thei a maw?" a rawn ti a.

Ka lu ka bu nghat nghat a, "Ka mumangah hian i hnung lam hlir ka hmu thin, min la hnungchhawn nge nge dawn a niang," ka ti a.

"Mumang mai mai anih chu," tih pahin a jacket ipte chu a zen ruk ruk, "Merry Christmas, My Love" tih pahin present bawm tereuh te hi a rawn phawrh a.

"Merry Christmas" tih pahin bawm chu ka la a, "Ka hawng nghal thei em?" ka ti a, a lu a rawn bu nghat a.

Phur deuhin ka hawng a, Bvlgari perfume a lo ni a, a to dawn tih ka chiang bawk si a, ka necktie pek nen ka khaikhin a, ka zak deuh hlek, mahse, ka sawi chhuak duh lem lo a, lawmthu sawi nan a biangah ka fawp ta zeuh a.

Kan ngawi dun reng a, "Ramsang," zawi te in ka ko a.

"Umm" a rawn ti dam dup a. 

"Nupui tha deuh nei la, pasal nei reng chung siin i bula awm ka kham thei si lo," ka ti a.

"Mawl mawl suh," a rawn ti a.

"Anih Ramsang, ka pasal hi then ila, i hnen rawn pan ta ila, min pawm ang em? I chhungten min duh dawn lo lutuk a, chuan hmingchhe takin thang huai huai bawk ila," ka ti leh a.

"Engvangin nge dik lo takin i than ringawt ang?" a rawn ti hu a.

"A, ka ti mai mai," ka ti leh ringawt a, kan ngawi dun vang vang a.

"Zodin, ka nu boral hnu khan Krismas hi ka haw thin tawp. A chhan chu ka nu khan Krismas min hman nawm tir thin a, ka tet te atangin, ka tan thil special tak tak a ti thin. Ka pa nen an inthen hnu pawn, kum tin hian a neih zawng zawng in ka duh ang apiang min tih sak thin a, mi te pawn an hau thin a, mahse, a sim duh ngai lo,  tlangval ka nih  thlengin," a ti a, a ngawi vang vang a.

"Ka nu boral hnu-ah kumin hi ka tan Krismas nuam ber a la ni, ka kiangah i awm a," a rawn ti sup a. "I hma lam hun tur chu engmah ngaihtuah rih suh, i chungah thil tha lo engmah a thleng lo ang. Hunin a rawn hril mai ang," a rawn ti sup sup a.

Ka phone a rawn ri ral ral a, U Mahlimi a lo ni a, ka kal ngei a ngai tawh, ka dak chho a, ka fawp vawng vawng a, engtikah nge kan inhmuh leh dawn pawh a hriat si loh, duhthawh takin ka fawp a, "Merry Christmas le, pasal ka neih hnua Krismas nuam ber leh hlu ber  a la ni," ka ti a, motor atang chuan ka chhuak ta a.