THERE SHE GOES - Chapter 4

 

Ramsanga Pov

          A sawi ang tak takin Zodini chuan Karol Bagh bazaar vel chu a hre zek a, min kalpuina dawr lian ho pawh chuan an lo zah derin an lo welcome tha hle a, a kal fo tih a hriat hle bawk a. A duhtawka Hindi leh Sap tawng a hmang chu engemaw ka hriat ni, ka lo chhuang ve em em ringawt.

          Hetiang bazarah amahin a kal fo thin tih a sawi te chu ka ngaihtuah a, a kal hmasak ber tum tur te thlengin ka ngaihtuah a, a pasal lahin kalpui chu sawi loh, a zin pawh a be ngai lo chu a ni bawk si, ka lainat tak zet a, ka bazar pui chu ka inchhir lo khawp mai. A innghahna mipa nih ka chak hle bawk. Kan inchei dan te a inang deuh reuh bawk si a, a kalna dawr chuan an fiam leh zauh thin a, “Tun tum chu nangmah chauh lo deuhin i ni maw, tunge kan tlangval vannei chu?” lo ti tawk te an awm a, a nuih liam mai mai zel.

          Kan vak nasa bawk a, a biang chu a tai tek a. Dawr pakhata kan kalna-ah phei chuan an pi ang maiin an lo zahin an lo be tha a, mizo nu sawmdawng tam takte angin zuamawmin a awm ngai lo niin ka hria a, ka zah phah hle bawk.   

          Kan bazaar zawh meuh chuan chhawl a hal ve thei hial mai. A bungraw lakte transport lamah thawn turin a ti fel nghal vek a, a sample then then erawh a hawn turin kan khai haw a, kan bawr ve luk tho a. Kal pui lo ila a bawr ve reuh dan tur te ka ngaihtuah neuh neuh a, a bula ka sawi lah chuan, a tihthan loh dan a nih loh thu in min chhang fel et lehnghal a. Hetiang bazaar tawt a amaha bawr taka an in khaikual vel tur ka ngaihtuah chuan ka lainat tak zet.

          A inrin hman hmain ka thil khai ho chu ka kut lehlamah ka khaikhawm a, ka kut lehlam chuan a kut sin sei sal chu ka la kang a, ka hmer vang vang a, ka kai ta a. Ka rilru chuan, “Zodinpui, tang aih suh, min kai ang che,” ka ti mawlh mawlh a, mi nupui a ni a, mualpho a hlau hle bawk tih ka hre bawk, mahse, ka insum thei ngang lo a ni. Mak ti takin min rawn en chho ha a, ka en ngam lo a, hla tak ka melh san ta daih a, kan kalna kawng chu kai chungin ka cross pui a, Bikanervala lamah chuan ka kai lut ta a. A kut nel thep ka vawnna vanga ka lungphu dup dup chu room reh takah awm ilang chuan a ri chhuak thei hialin ka ring. He hmeichhia anga keimah a danglamna thlen thei hi ka la tawng ngai lo.

          Dawr chhung kan luh chuan lassi kan order a, Zodini chuan Rasmalai a rawn order bawk a. A hah ve bawk a niang, a thu hle hle a. Rasmalai an rawn dah chuan Neha-I nen tui an tih dun zia leh an in ei siak thin thu te min hrilh a, ka thil tui tih zawng tak anih avangin in ei siakah chuan ka cho ve  thut a, a rawn nui hawk hawk a.

          “Naupang pawh kan nih tawh loh hi, chutiang ti rual pawh kan ni tawh lo,” a rawn ti a.

          “Chutiangah kum bithliah a awm ngai lo,” ka ti ve tlat a.

          “Anih leh enge kan in chawi ang,” a rawn ti a, ka phur thar deuh tlat.

          “I chak loh zawk chuan ni khat chu hun min pe ang chu, ka chhuah duhnaah min chhuah pui ang,”

          “Anih leh chak zawk ta ila”

          “I duh duhnaah min hruai kawi ve thung ang chu, hei aia bawr pawh hi ngai se,” ka ti zui a, a engti zawng zawng pawh chuan ka tana nuam a ni mai, a bula awm hi ka la kham lo mai pawh a ni lo, nuam ka ti tan dawn chauh a ni.

          “A ho em mai a, hna lamah in buai buai nen” a ti deuh tlat a. A in veng deuh tlat reng tih ka hriat chuan amah ka zahna a ti zual em em a, a pasal chuan eng ang pawn duat loh mahse a rinawm ve tlat tih a chiang reng mai. Dik tak chuan ka bula awm hi hrehawm a ti hauh lo tih ka hre thei a, keimah ang bawkin amahah danglamna ka thlen ve tih ka hre bawk.

          Min hnialna chu ka hrethiam a, nawr luih pawh ka duh bik lo.

          “Anih leh i ei duh zat chu ei reng reng teh, keipawh rasmalai kher kher chu ka ei thei teh mai a nia, mahse nikhat min chhuahpui ve chu i ba hrim hrim” ka ti ta zawk a.

          “Yes, sir, I thu ang zelin le,” a rawn tia, dawhkana eitur in chhawp chu a ei ta a.

          A hotel lam pana kan in khalh haw lai chuan car tape a music in play sa chu ka play chhunzawm a, Kimkima hla ‘Ka bialnu ni rawh’ tih nizan lama ka play chu a rawn in chhunzawm leh nghal a,

          “ I hmeltha ka ti,

          Ka bialnu ni rawh,”

a rawn ti tang tang a, ka bula thu chu ka sak khum vak tep a ni. Nidangah kha chuan ka ngaithla liam mai thin a, vawiin zet chu awmzia a nei raih raih ka inhmeh deuh tlat hian ka hria a. Ka piaha thu chu ka va en a, thil ngaihtuah muk tak nei tih hriat tak hian pawn lam a lo en deuh deuh a, ka en reng lai chuan a rawn hawi phei ve a, kan mit leh kan mit chu a in tawk chiang kher mai, mahse, nu fimkhur tak a ni ka tih tawh kha, titi dang a rawn vawrh leh daih a, kan boruak tang lutuk tur pawh a rawn ti zia ta a.

          “Ranjit-a nen hian in inkawp rei tawh em?’

          “Kawp rei lo e, kum khat erh awrh chauh a ni ang,” ka ti let a.

          “An fel asin, sumdawnna thilah pawh an fair viau ang,” a rawn ti a.

          “A dik alawm, vai sual kan tih kan tih hi sumdawnna lian khawih chin hi chu kawp an nuam asin, Mizo bawk hi kan buaithlak ka ti thin, partnership fel fai taka rei tak kal pui thei pawh hi tumah kan awm lo a ni e, kan duham hlawm leh lutuk a,” ka ti duah a. A mimal nun zawh chian chakna in ka khat vel a, mahse, a mizia en hian eng vak a sawi dawn lo tih ka hria, Neha-i ka la zawt dawn khawp.

          “Nupui neih te i tum hnai ve tawh em?” a rawn ti thut a.

          A zawhna min zawh kher kher chuan min ti phu zawk lo chauh a ni. “Ka duhtui lutuk nge, ka duh ang hi ka la hmu lo a niang,” ka ti a.

          “I hmangaih chiah nei ang che,” a rawn ti a.

          “Sawi zau deuh theih em aw,” ka ti kher a.

          “Engkim i tih pui  theih tur, i hne theih hauh loh tur, i hna i sawipui theih tur, i duat chak ngawih ngawih reng tur, thu in hmuh loh changa i inhnial pui vak vak theih tur leh awlsam te a i ngaihdam leh mai theih tur,” a rawn ti duah a. A insawi thawl tih ka hrethiam, ka titawp phal lo a, ka la ngaithla chak tlat.

          “Chuan”

          “Chuan, nang te chu bawrtu I ngah awm sia, thlan a har ngawt ang a,” a rawn ti daih a, a sual reuh a nia, a mimal nun hi a sawi chhuak mai mai dawn lo tih ka hrethiam.

          “I expert hmel riau, min la thlanpui dawn nia,” ka ti zauh a.

          A rawn nui hak hak a, “Min zawt zel dawn nia,” a rawn ti a. A hmel chu a la upa lo, kum 30 a tlin pawn a tling awrh ang, a insawi dan a nih phei chuan graduate chiaha pasal nei a, kum 10 an innei tawh anih ngat chuan, kum 30 a la pel tam dawn hauh lo tih ka hrethiam. Tlangval senior an tih ang hi ka ni ve tawh a, kum 38 ka ni tawh, kei aiin kum 8 velin a naupang dawn tihna a ni. Mahse, pasal kum 10 lai lo nei tawh a ni bawk a, tawngkam puitling taka rawn chheh zauh hi a ching a.

          A hotel thlenna chu kan thleng a, a bawr reuh sia, inthiam lo deuhin a pindan lamah chuan ka zui ve ta zel a.

          Bungrua te kan dah fel chuan bathroomah a hmai a va phih fai a, ka sira thutthlengah chuan a rawn thu ve a.

           “I hah ngawt ang, coke te i induh em?” a rawn ti a. October thla a ni tawh a, chhunah chuan khua a la lum tha vut vut hle a. Beer inkhawlh khawlh ka chak takzet.

          “Beer in ila pawi i ti em? Ka ti let e. Pawi a tih loh thu leh ani pawhin Bacardi Breezer a in chak thu a sawi a, Intercom-a chuan Reception lam a call a, a order zui nghal a.

          “I hindi hi a mawi tak zet,” ka ti sup a.

          “Nang deuh,” a rawn ti let a.

          “Hindi a ka tawng lai I hre tawh em ni?” tih pahin a lam ka hawi phei a, a lai hle tih ka hre thei.

          “Airport-ah khan ka hnungah i thut kha?” a rawn ti a, keiman ka lo chik tawh ang bawk khan nimin piah lama airport a ka hmaa a thut khan min lo chik ve tawh reng em maw ni le ka ti zui rauh rauh a. Kan thil chah a rawn thleng a, ka hawn sak a, a in tur chu ka pe phei a, a sip zeuh a.

          “Zu hi tui ka ti thei hlawl lo, Breezer hi chu in a nuam ve tlat ka  ti,” a rawn ti a. Room chu AC a on avangin a dai nuam tawh hle a, beer chu ka in KHAWLH khawlh a, ka nuam sawng sawng thei mai.

          “Zu tui ti si lovah chuan in lui thei pawl tak i nih dawn chu,” tihin ka fiam zauh a.

          “Nizan kha chu Neha-i vang liau liau ka tih kha,” a rawn ti a, a nui hak hak a.

          “Ka thianpa pakhat hi Cruise-ah Bartender in a thawk a, min zirtir ve nual asin, I fel viau chuan ka la show ang che, tui deuh deuha mix dan ka thiam a nia,” ka ti a.

          “Min hrai ruih tum reng reng suh aw,” a rawn ti khar khar a. Ka nui chhuak hawk ringawt. A phone a rawn ri ral ral a. “Min lo hrethiam lawk rawh aw” tih pahin min biak san ta a. Phone a dah hnu chuan meng buai deuh nak hian a rawn hawi chhuak a,

          “A mak  e, U Thantea hi, min lo call reng mai, zan mut dawnah biak ka tum reng sia, nidangah chuan min lo call ngai lo tak tak. Thlah tak ngial pawh min thlah ngai lo, tun tum chu airport thleng min thlah thlap a, ka hrethiam lo takzet,” a rawn ti a. Ka thin a lo rim leh ringawt tawh. U Thantea a tih ve hrep pawh hi, hetiang hmeichhe duhawm lutuk duat nachang hre lo khawpa mawl a han pian chu!

          “Mipa chhe lo deuh in a bazaar pui che tih report a dawng a ni lo maw” tihin ka lo fiam let a, a lai hle lehnghal a.

          “Kan pa tluk tur te chu an tlem ngawt ang,” tihin rawn fiamthu let ve hram a. Vawiin chu ka duat reuh bawk a, a mita khawharna deuh ka hmuh kha ka hmu mang hauh lo. Duatmamawhte-i a nih hi, ka duat phak han ni reuh mai se aw tih te ka ngaihtuah kual a. Kei hi ka beer in a thawk dik dawn lo tlat, ka ding vut a, “Ka kal ang e, nang pawh I chau ang, I awm hahdam duh ang,” tih pahin kawngkhar lam ka pan a.

          “Tehthut che chuan a,” a rawn ti let a, kawngkhar lam chu a rawn pan ve a.

          “I tih tlat si chuan le, ka lawm takzet, min bazaar pui a, nidang nise ka chau lehpek dawn lutuk, mahse, vawiin chu Mutia ka nei chhe lo bawk sia, hah nachhan tur pawh ka nei lo,” tih pahin min rawn en chho ha a.

          Ka inring hman lo a ni e, a kawngah chuan ka kuah a, ka lamah ka pawt hnai a, ka fawp ta vawng vawng a. Rei lo te min rawn chhang let a, a zei lo hle bawk. A inngaihtuah fim vat a, a in la hrang a, ka en ngur a, a mitmengah chuan inthiamlohna nasa tak ka hmu nghal a, kei hian pawi thui tak ka khawih a ni.

         “Mangtha le,” a rawn ti a, mangtha zui ve ta lo chuan ka kal zui ta vang vang a. Keimah leh keimah ka inhaw tak zet.

Zodinpuii PoV

        Ramsanga kal liam tur chu thlir pawh ka thlir ngam tawh lo, kawngkhar ka khar a, ka thaw dep dep a. Eng thil pawi nge ka khawih tak ni.

        Ka maimitchhing vang vang a, ka lungphu rang lutuk chu tih pangngai nan thawk ka la vang vang a. Ka men hnu chuan khumah ka phei a, zangthal arin ka mu a, vawiina kan hun hman dan te ka chhui kir neuh neuh a.

      A apartmentah khan breakfast tui tak min siam sak a, ka ti ti a ngaithla a, ka sumdawnna min sawi pui a, chuan, min bazar pui a, e, bazar dawn khan ka inchei dan kha  ka inhmeh thu min hrilh bawk. Ei tur min leisak a, ka duhzawng min ei pui a. Chuan, min kai bawk a, a kut lian pui, lum thur thur khan. chuan chuan chuan, nichin mai khan min fawp bawk. Mipa in hmeichhe tana an tihtur a ka lo suangtuah thin, ka pasal hnen atanga ka dawn ngai loh tam tak vawiin khan ka dawng a ni.

      Ka let thawk a, "Aw Lalpa, uire nih ka duh lo, ka ngaihtuahna sual tak hi min lak bo sak rawh," ka ti mawlh mawlh a. Kha mihring kha ka be tawh tur a ni lo a, a hnaihah pawh ka awm tawh bawk tur a ni lo.  Lalpa eng pawi nge ka khawih tak, ngaihdam tlak ka la ni em!! Huis, ka khum zau tawkah chuan ka let kual ka let kual a, ka chaw ei chakna zawng zawng pawh a reh vek.

    Ka breezer in lai chu ka in khawlh khawlh a, he juice ve mai mai hi chuan ka rilru buai nuaih hi min theihnghilh tir hlei lo ang e. Ka hmui chu ka khawih a, zei zet a min fawhna chu kan ngaihtuah chhuak leh a. Ka bawkkhup a, lukhamin ka lu ka khuh a, kei hi ka a zo ta anih hi. "Zodinpui, Lalthantluanga nupui i nih kha, theihnghilh suh, inveng ang che," ka in ti mawlh mawlh a. Hun rei lo te nuam ti taka ka hman ve te chu mahni inthiamlohna chuan a rawn luahlan a, ka in haw tak zet a, ka inkhawngaih hle bawk.

    Ka phone a rawn ri ral ral a, Neha-i bawk a lo nia.

    "Hello"

    "Dinner i ei tawh em?"

    "I hotel bul lawkah ka awm a, lo chhuak thla la, ei dun ila," a rawn ti a. Pawi ka ti lo khawp mai. Mahni chauha ka awm chuan ka a mai ang.

    Ka hotel thlenna ah hian Restaurant nuam zet mai a awm a, Balcony Restaurant pawh an nei tel nghe nghe, hmundanga kal lovin Balcony Restaurant lamah chuan dinner chu kan ei ta a.

    Paharganj hmun hi Railway station bul mai a nia, a lun hle a, kan hotel piah lawkah chuan bazar tenau pawh a awm ve a. Zan in chu intih thawven ka chak a, Neha-i chu bazar puiah ka sawm zui nghal a, a lo aw ve mai bawk a. Mahnia awm ka chak vak lo bawk a, chaw kan eikhawm chuan bazar lamah chuan kan in zui phei ta a.

    Lei tur em em pawh chu kan hre chuang hlei lo a, mamawh em em kan nei lo dun bawk a. Leather dawr nuam zet hi a lo awm a, kan lut a, leather chapal,a ngalrek kaihna laia fringe awm siau siau te chu a inang in kan lei ringawt a. Kan high school kal lai pawh a ngaihawm alawm le, thil inang kha kan lei dun nasa vel thin tawp. 

    "Zodin, Naktuk zan chu kan inah zanriah i rawn kil ngei a ngai a nia, ka nu leh pa te order a nih chu aw,"

    "Ok, inneih urlawkna vek a ni tawh ang chu maw?"

    "Ni chiang e, Ranjita pawh a lo tel ang"

    "Ok, boss, pasal i neih hma chu i thu thu hian an awm phawt mai ila, a dik a ni mai a lawm" ka ti a, ka rilru chuan Ramsanga an sawm ve leh ve loh chiah ka ngaihtuah anih chu.

    "I hredik chiah, haw lovin awm tlang mai la, thla leh mai a ni tawh a, engkim min in buatsaih pui mai la"

    "Ka chak khawp mai, mahse, nu ber tan chuan chu chen chen thang chu a theih loh alawm, nang pawh nu i ni ve tep tawh a nia, chuvangin i pasal neih hma chu i duh duh ti pawp pawp rawh, i tih chak tam tak hi i ti thei tawh dawn miah lo a nia" 

       "Chutiang chanchin tha lo chu min hrilh reng reng suh, Ranjit hian min han khuahkhirh teh se, a chak lo ang"

    "A tak ram dai phawt loh chuan i hrethiam tak tak lo ang," ka ti a, hotel lam panin ke in kan kir leh ta a.

    Neha-i nen kan inthlahfel hnu chuan ka phone ka phawrh chhuak a, number hriat ngai loh atang hian missed call a lo awm a, engtinnge ka phon ring ri te ka hriat loh theih ni. Thil pawimawh anih takin tiin ka call let ta.

    "Pawm haw ngaiin i khawsa leh ta emaw ka lo ti hman asin," a rawn ti chhur chhur a. Ramsanga aw pa mawi lutuk, a hmel ka hmuh hma pawh a min hip tlattu ka benga ka hriat rual chuan ka sa pup pup thei hial. Vawiin tlaia kan khawsak dan te chu ka ngaihtuah chhuak nghal uaih uaih a. 

     "Chaw eiin kan chhuak lawk a"

     "Kan?"

    Ve ringawt chuan a, duh duh ka ei pui ang, rawn in ti thu ve em em ringawt.

   "Ramsang, vawiin khan min bazar pui a, ka lawm lutuk, mahse, in be tawh lo zawk ila a that ka ring" tih pahin phone ka dah hmak a. Min rawn call nawn leh a, ka ring ral tir thak a A rawn tinawn ta lo. Mi pangngai a ni a, ka dinhmun tur hrethiam rual chu a ni in ka hria.

         A tukah chuan keimahin ka chhuak a, naute thawmhnaw thenkhatah authorised dealership tihna tur agreement kan siam fel a. Tihian Delhi-a ka kal chhan te chu ka tifel zo thawkhat ta. Flight ticket pawh a cut fel theih dawn ta a nih hi. Vawiin hi friday a ni a, tun weekend chu Neha-i puala cham a, an inneih dawn karah chauh Delhi-a chhuk leh turin rilru ka siam fel a. U Thantea pawh ka sawm nawn ve leh reng reng ang chu, an innei dawn tih ka hriat tirh khan ka sawm tawh kha a nia, min hnial ngei mai a, sawm ve leh hrim hrim ang.

      Rin aia ka zawh fel hma avang in ka awmna atanga hla vak lo Connaught Place lam panin auto ka la a. Neha-i te inah zanriah ka ei dawn si a, a nu leh pa thil tur enge maw lei ve ngei a tha ang chu. Neha-i nu tan chuan Pashmini shawl nalh zet mai ka lei sak a, aman pawh a mawi. Mahse, ka tana ui nei ngai lo an ni bawk a, an phu ve bawk a ni. A pa thil erawh lei tur ka hre lo hle, mipa present tur hi lei har ka ti thin tawp.

    Louis Philippe show roomah ka lut a. Waist coat pawl duk nalh zet chuan ka mit a la chat a, Neha pa tan chuan ka lei ta a. Cash counterah billing ka tih lai chuan cash counter piah lawka necktie grey duk an tar chuan ka mit a la tlat a. Ramsanga inchhung rawng zawng zawngte chu ka mitthlaah a rawn lang a, amah Ramsanga pawh chuan a inhmeh hle dawn tih ka hria. Hmuh ka duh tawh lo viau nangin inhmu kher lo pawn, min puihna avanga lawmthu sawi nan te pawh pek dan a awm tho mai thei. Rilru insual deuh chungin ka bill tel tir ta nghal a. Tul lo ka inti tak zet. Ka pek tak loh leh ka kawl tha reng mai aniang chu.

    Neha-i te in ka thlen chuan min lo lawm thiam khawp a. Ka thilpek te chu an ngaihlu thiam em em a. High School ka kal lai atangin an fanu ang maiin min en thin kha a nia. Rinlawk ang ngeiin Neha-i te inneih hma chu cham tlang mai turin min sawm a, mahse Neha-i ka hnial dan ang thovin ka hnial let a, mi pawh an hrethiam viau a, amaherawh chu inneih hmang tura ka kal hun chuan ka pasal hruai tel ve ngei ngei turin min chah uluk hle thung.

    Ranjit-a pawh chaw ei dawn hnaih lamah a rawn thleng a, a hnung a rawn zui tu ka hmuh chuan ka lung chu a phu dawt dawt a, hna atanga rawn tlang an ni bawk a, business suit nen a rawn induang zar a, a inhmeh kher mai lehnghal a. An lam ena ka hawiphei lai chuan ka mitah tak min lo en sawr sawr a, ka zam chhe vek hi a ni ber.

    Ranjit-a chuan, "Nangmah chauha hnamdang vek kara chaw ei ai chuan i awm a nawm deuh nan Ramsanga ka rawn hruai ve a," a ti a, ka awm a ti nuam lo nasa hle zawk a ni. Neha-i leh Ranjita chu kan inkar hre pha silovin an ti ti barh barh reng a. Zanriah ei an peih thu an rawn sawi chuan ka thaw huai thei hial mai. 

    Zanriah kilnaah chuan Ramsanga nen inep chiahin kan thu a, ka hawi chhuah ve zeuh chuan kan mit leh kan mit chu a intawng chat zel a, chu chu duh lovin ka inveng tlat reng a, ka hah takzet a ni.

    Boruak tih zangkhai tumin titi dang vawrh dan ka zawng a. Neha-i nu hnenah chuan, "Aunty, Neha-i te inneih hmanga ka lo kal chuan Honeymoon hmang turin min zin san daih awm sia, Uncle nen min lo zui haw ve daih ula tha ang, Mizoram pawh in la hmu ve lo a, November thla a ni dawn a, a nawm hun lai ber a ni dawn asin," ka ti a.

    "Ka chak zawng tak a ni, chuti lam chu ka lo ngaihtuah ngai reng reng lo, i uncle hian a peih phawt chuan kan tum dawn nia," a rawn ti ve a.

    "North East te kan fang nghal ang a, a nuam phian dawn asin, Shillong pawh in la hmu lo a ni lawm ni?" ka tih chuan Neha-i pa chuan, "I pasal i rawn hruai phawt chuan kan zui haw ang che u, i pasal hi i thukru rei tawh lutuk, kan hmu veleh chak tawh a nia, tumah ruk sak tur che pawh kan awm loh hi," a rawn ti a. Midang chu an nui ham ham a, kei erawh Ramsanga hmaa ka pasal chungchang an sawi chu ka lo ip leh ringawt tawh. Min zinpui ngai lo tih a hriat khan a thinrim hle kha a ni a, chutia Neha-i pa in min zinpui ngai loh thu a rawn nemngheh takah chuan eng rilru nge a put ang tih ringawt ka ngaihtuah a, a lam ka va hawi chuan a lo meng rum ul a, engmah a hmelah chuan ka chhiar thiam lo.

    Chaw ei khamah chuan an varendah nuam zetah chuan Neha te thiandun leh Ramsanga te nen kan ti ti tlang a, Neha-i chuan riak mai turin min sawm reng a, "Aw" mai ka duh, anih loh chuan Gentleman takin ka piaha mi renrun hian min hruai haw a tum leh ngei ang a, ka huphurh tak zet a ni. Anihna takah chuan a bula ka awm chakna leh ka hrehna hi a inbuk tawk viau ang.

    Uluk takin an inneih ceremony tur chu min hrilh reng a, ka thlen ngei ngei tur ni te a sawi uluk nasa mai. Ramsanga pawh chuan chawh phur nan eng engmaw ni a lo sawi ve reng a, Indian deuhvin amah leh keimah pawh kan inchei ngei tur thu te a lo sawi ve duah reng a. 

    Ramsanga phone chu a rawn ri a, a phone chu kan melh ve hram a, Duati tih angin ka hmu thuak a, ka thin chu a rawn thip vang vang anih chu, kei hian ka thik ve ringawt emaw ni. Varenda hmawr lam deuhah chuan call chhang turin a kalsawn ta daih a, tu in nge lo call ang le, a bialnu a niang a, tih vel chuan ka rilru a rawn luah leh tlat tawh, a tul lo takzet a ni.

    Neha-i chuan zawi tein min rawn hrilh ru a, "In inhmeh teh mai a nia aw, in pa thlak nan hmang daih teh, a en ngun danah che hian a duh chiang mai che," a rawn ti sar sar a. Ka melhrum nasa mai.    "Tikhan min melhrum suh, nang pawn i duh ve deuh tih ka hre reng, tu hmeichhia in nge sawtiang tlangval smart lutuk, hmeltha bawk si, pa bawk si saw hnar thei ang," a rawn ti leh sa sa a. "Neha, inneih thu tiam tiam vek tawh ka nih kha," ka ti let a. "Khatiang nun khawhar lutuk khan pitar thak i tum em ni?" tiin min chhang a. "Maithei," tih zawngin ka chhang let. Ramsanga pawh a rawn kir leh chiah a.

    Min rawn en ngur ngur pah chuan, "Neha-i'n riak tura a sawmna che chu i pawm dawn ta em? Hei haw ka ngai tlat mai a, i haw zawk dawn chuan ka rualin rawn haw mai la, ka thlah kual nghal ang che," a rawn ti a.

    Chhan dan tur hre lo zetin ka en let a, "A, ka van hrethiam lo tak, riak tur in ka inring lo khawp mai, mahse, Neha-i'n min sawm nasa bawk sia," ka ti let a. Bakah  a Duatin a rawn ko a ni awm sia, hnawksak mai mai ka nih ka hlau deuh bawk. Hnamdang kara awm kan nih avangin Sap tawngin kan in bia a. Neha-i phur zawng tak a lo ni ngei tur a ni, "Ka duh dan kan thlak lawk, tun weekend i la cham dawn a, anih chuan Sunday zanah ka bulah lo riak la, Monday zingah airport lamah ka thlah nghal ang che, tichuan a tha zawk ang," tih pahin Ramsanga hmuh hauh loh turin mit min rawn siai anih chu.

    "A that hlauh chu, Neha-i leh Ranjit pawh chance pek a hun viau tawh alawm, insiam la, kan kal mai dawn em ni?" a rawn ti a.

    Inchhunga ka bag dah te chu ka la fel a, inchhung lama thu Neha nu leh pa te pawh ka mangtha fel a, Ramsanga nen chuan kan inzui chhuak ta a. Neha-i keh Ranjit-a pawh Garage thleng min rawn thlah turin an rawn chhuak a. Kan in khalh chhuak fel ta a.

    Sawi tur kan hre lo dun hle a, kan ngawi vang vang a. Zan dar 10 a lo ri dawn hnai tawh a.

    "Min hruai haw ve ringawt a, a rawn kotu che tan hnawksak ka ni mai mai ang tih ka hlau hle mai," ka ti a.

    A rawn nui hawk a, "Tunge min ko haw a i hriat a?"

    "I phone kha ka hmu hman ve vek a nia, a lo call tu che hming kha," ka ti let a.

    "I lo thik deuh tihna em ni?" a rawn ti let a, chhan ngaihna pawh ka hre lo, ka ngawi ta reng ringawt a.    

    "Zodin, thil min tihsak thei ang em? Ka inthlahrung viau nangin," a rawn ti a.

    "Enge ni a?"

    "Haw thut ka ngaihna chhan chu, ka nau, ka cousin hi naupaiin Delhi-ah hian a awm ve a, a nau neih a hnai tawh a, mahse, a pasal hna thila a zin a lo la haw thei lo a, beisei ang chuan kar leh lam hi a neih hun a ni a, mahse hei vei angin a awm tlat mai a, an in atanga va hruai a, damdawiin-a kal pui a ngai a. Keimaha ka tih theih mai ka ring a, mahse, ka huphurh ru riau mai, ka cousin lah a la naupang si a, chinchang a hre vak dawn lo a, zanin chiah chu min puih theih chuan ka lawm ngawt ang," a rawn ti duah a.

    "Tihtur dang engmah ka nei hleinem, chutiang inthlahrunna tur pawh anih loh chu," ka ti let a.

    Nui deuh hak pah hian, "Ka cousin hming chu Duati a nia, i la thik em?" a rawn ti kher a.

    "Ka thik pawh ka tih loh kha, ka inthlahrung zawk alawm, i bialnu in a koh haw lai che a min han thlahkual hmasa tur ka ngaihtuah khan, bakah thik tur chein ka  enge maw i nih le, mi nupui duhlai ka ni ka tih mawlh mawlh kha " ka ti nawi ta niah niah a. Ka lai lutuk chu ka sa pup pup thei hial.

    "Nupui duhlai nge i nih, nupui ringawt?" a rawn ti kher a, ka ngei reuh hle mai. Chhan ngaihna pawh ka hre lo a, ka ngawi ta reng a. Ani pawh chu a ngawi ta vang vang a. Car tape chu a play a, Daduhi a rawn zai raih raih a,

    "Min dem lul su, lenrualte u,

      Tiang renga lungdumtu hi;

      Ka tawng lo'ng vangkhuaan

      Lungmawlin ka tawng tlai,

       Sakhmelthachungchuanga"

    Chu hla ka ngaithla chiah chu ka chhing sawk a, nuih tur nge tah tur pawh ka hre lo. Motor chu zawitein a ding a, kan thleng tawh a ni maithei. Ramsanga lam chu ka han hawi chho a, a hmel pa zet chuan min lo en run a, awm ngaihna pawh min ti hre lo.

    "Kan thleng tawh ami?" ka ti tham chhalh a.

    A rawn kun hniam a, "Zodin, min hnial suh," tih pahin min rawn fawp a. Chhanlet ngaihna pawh ka hre lo.  

    "Inthlahdul rawh, min hnial suh," a rawn ti leh a, duhthawh takin min rawn fawp leh a, ka thiam dan ang angin ka lo chhang let ve a.

     Ka biang tawn tawnah a kut a rawn dah a, hawi pawh ka hawi chhuak ngam tawh lo.

    "Min lo en lawk teh," a rawn ti a.

    Zawi muangin ka hawi chho a, "Heng thil zawng zawng hi keima bul tan a ni, inthiam lo duh suh, nang chu i inveng hram hram tih ka hria, mi nupui i ni tih pawh ka hria, chuvangin i thiam loh pakhat mah a awm lo," a rawn ti a. 

    Motor chu a tinung a, muangchangin kan in khalh chhuak a, Ka kut chu a rawn la, motor khalh phah chuan a lamah a la phei a, a thin zawnah chuan a dah a, "Airport-a i mittui i hru lai ka hmuh atang che khan he ka thinlung hian awm ngaihna a hre tawh lo, khawngaih takin min hnial suh, i inchhirna tur engmah ka tihpui lo ang che, nang pawh ka kianga i awm changin i danglam ve thin tih ka hria, Zodin, i cham chhung ni reilote hi chu i kianga awm a, ka duat che min phal sak rawh, khawngaihin," a rawn ti a.

    Tawng ngaihna pawh ka hre lo, amah chu ka en reng a, ka a zo vek dawnin ka hria.