There She Goes - Chapter 5

          Ramsanga nau te in chu kan thleng a, a nau Duati chu Room lamah na tuarin a lo inhnit feih feih a, Ramsanga chuan,

          “Engkim a tha vek ang, insiam pui i ngai em? Damdawi inah kan kal nghal dawn nia,” tiin a kuah hlu hlu a.

          “Ka insiam vek tawh, a kal theih,” a ti a, a nau vei chu a na a rawn chhuak leh chiah a ni ngei ang, a kun leh vang vang, Ramsanga kut chu a hmer ngawt ngawt a.

          “A na hi a reh veleh kan kal dawn nia, Zodin, nangin lo chhuk thlakpui la, thawmhnaw hi ka rawn khai ang,” tiin ro a rel zung zung a.

          A na a zia lai chuan dim tein ka kuah a, Garage lam panin kan inkuah chhuak ta a. Kan vawikhat inhmuhna a ni bawk a, hnem ngaihna pawh ka hre lo a, ngawi rengin kan in kuah chhuak a. Garage kan thlen chuan ka banah chuan a rawn hmer leh ta ngawt ngawt a, tihngaihna hre lo takin a kawng vel chu kan chul sak a.       

          “Khawi lai nge na ber?”

          “Ka sawi thiam lo, ka kawng vel lai kha a ni ber mai,” a ti a.

          “A na a chhuah chuan min hmer vak vak mai rawh, pawi ka ti miah lo a nia,” ka ti a. A kun vang vang a, a na pawh zia lam a pan leh ta aniang, a rawn ding chhuak leh ta. Ramsanga pawh a lo thleng ve chiah a, motor ah kan lut a, damdawiin lam panin kan tlan chhuak nghal a.

          Duati chuan min rawn en pahin, “Zodini maw i hming, i lo tel ve chu ka lawm hle mai, nau neih dawna mipa chiahin min awmpui tur ka ngaihtuah khan ka lo huphurh lutuk a,” a rawn ti a.

          “E, ka hman lai tak alawm, a tihzia hlauh anih hi, ka hna zawng zawng ka zo fel tawh a, haw chiah ka hma bak tawh alawm,” tiin ka lo chhang let ve a.

          Damdawiin kan thlen chuan Duati pawh labour room lamah an nawr lut a, Doctor te pawn a hun tak a kan thlen thu leh a rei tawh loh tur thu an rawn sawi a. Ramsanga’n Cabin a book fel hnu chuan bungrua te kan dah fel a, Labour Room kawngkhar lamah kan inzui phei leh ta a. Sana ka en chuan zanlai dar 12 a lo ri fel vel chiah a. Naute nei maithei dinhmunah kan din avangin khawiah mah kan kal ngam lo a, ka mutchhuakin min rawn zem chiai chiai a. Minute engzat nge ka mutthluk pawh ka hre lo, doctor in “Fapa duhawm tak innei e,” a rawn tih chuan ka harh zawk a. Ramsanga chu a hlim tak zet tih a hriat theih. Naute leh a nu pawh rei lo teah an rawn nawrhchhuah tur thu te an sawi a.

          Ramsanga chuan Aizawl lam chhungte chanchin hrilhin a be kual nghal zung zung a, reilote hnuah chuan Duati leh naute pawh an rawn nawr chhuak ta a, naute chu nurse chuan min rawn pe a, ka lo pawm vat a, Cabin lam panin kan inzui phei ta a. Naute ka pawm chiah chu naute ka awhzia ka inhre thar leh a, ka en vawng vawng a.

          Cabin kan thlen chuan Duati chu an mut that tir a, Duati bulah chuan naute pawh chu ka mut zui ve ta a, a meng ker reuh lehnghal a. Nurse chuan thil pawimawh chi hrang hrang  min hrilh a, min chhuahsan ta a.

          Ramsanga chuan naute chu thla a laksak a, tah pawh a tum lo, ngawi reng chuan a meng ker reng a. Hnute pek a that thu ka sawi chuan Duati pawh a rawn insiam rem a, keiin naute ka lo pawm rem bawk a, hnute kan fawh tir ta a, a hne nghal dek dek reuh a, a muhil fel ta a.

          Zing dar 3 a lo hnai kuar tawh a, Duati chuan a ril a tam thu a rawn sawi chhuak a. Kei pawh ka mut chhuak avang chuan Coffee ka in chak takzet bawk a. Ramsanga chu eitur lei turin a ding ta vut a, a kal dawn pah chuan a rei loh tur thu min hrilh pahin ka chal-ah a rawn fawp zauh a, ka harh kawk in ka hria.

          Naute a rawn tap raih raih a, Duati chu a chau bawk a niang, a lo muthlu diar diar a, ka tho vat a, kan en vel chuan a lo e a, hlam ek ban tak ang ngei mai kha, ka cousin te ho nau nei ka lo awmpui ve fo tawh avangin ka zei ve riau tawh a, ka thlak fel zung zung a, ka thlak lai chuan Duati chuan,

          “Zodin, ka hria che asin, Sir Thantea nupui kha i ni tiraw?”  a rawn ti a. Ka zak lutuk chu ka sa pup pup thei.

          “Aw, ni e,”

          “Anih leh u Ramsanga nen hian enge in inkar?” a rawn ti leh a.

          “Engti zawngin maw?” ka ti let ha a. A sawi tum awm ang erawh chu ka hrethiam deuh reuh, hrehawm ka ti hle bawk.

          “U Ramsanga’n a en dan che hi hmeichhe dang a en dan nen a inang hauh lo tih ka hria a nia, pasal nei lai i ni tih chu a hre turah ka ngai a,” a rawn ti let a.

          Naute chu ka thlak fel a, a lo muhil fel leh et tawh a. A nu bulah chuan ka mut tir a, “Ni e, engkim ka hrilh vek alawm, engtinnge mawni ka tih dawn ni, ka sawi thiam lo, kan in karah hian engmah a awm lo tih dawn chuan kan inngaina tawn hle tih ka hre bawk si a, mahse, pasal nei lai ka ni a, inbiak tawh loh a tha zawk ang tih thu ka hrilh pawn tun hi kan thleng chu a nia, kar khat em pawh kan la inhre lo a, engmah chanchin sawi tur kan la nei lo, mahse, ka chunga a thatna a lanchhuah tir dan te erawh dawnsawn dan ka thiam lo lam deuh chu a ni, hmeichhe dang chungah hetiang veka ngaihawm hian a khawsa ve tho thin nge maw ni dawn ni” ka ti ta duah a.

          Duati chuan min en kar hian, “A van vanduai tak ve aw, a luck tehlul nen tumah hi a duh ngai lo. Ngaihzawng tia chhiar tur tumah a la nei lo a, amah ngaizawng a, zah hre map lova rawn pan tu hi chu a tawng fo mai. An reh veleh mai zel. Zanina a rawn hruai che  khan mak ka ti hle a, a mitmeng a awmdan leh a care danah che a duh che tih ka hre bawk. Mahse, nang chu mipa dang ta i ni tawh si a, tlangval vanduai anih ber chu,” a rawn ti a.

          “Duati, mualpho hi ka hlau tak zet a ni, karlehah ka haw tawh dawn a, engkim a fel vek mai ang,” ka ti sap a. “Tumah midangin hetah min rawn hruai ve tih pawh hi hre lo hram se ka ti khawp mai,” ka ti chuai raih a.

          “I lo kal a, min pui a, ka lawm tak zet a nia, hetah i lo kal tih min an hria a nih pawhin U Ramsanga thiannu, remchanga min rawn puitu tih bakin tumahin an hre lo ang che, lungngai reng reng suh,” a rawn ti a. Ramsanga pawh eitur chi hrang hrang nen a rawn inkhai bawr lut tun a.

          Ei tur te kan ei fel chuan naute pawh a rawn tap leh ta ngek ngek a. A diaper te kan thlak a, hnute kan hnek puar tir hnu chuan damlo riah puitu khumah  chuan Ramsanga chuan ka duh lo chung min muttir a, tlemte mut pawh a hlu a ti tlat a, ani chu naute  bulah chairah a thu ran thung a. Ka mut a chhuak tawh bawk a, ka muhil nghal bawrh bawrh a. 

     Naute tap ri avangin ka harh a, khua chu a lo var uar tawh a. Ramsanga chuan zei lo fe hian naute diaper lo thlak ve a, a kut lianpui leh naute diaper tereuh te te chu a inmil lo em em mai a, nuih hak hak pawh chuan,

          “Naute kha i khawihna zawk ang tih a hlauhawm alawm le,” ka va ti fiam a, naute chu ka buaipui chhunzawm a, a hmaa diaper lo awmdan pawh chu Ramsanga’n amahin a lo buaipui tawh ni ngei tur a ni, a ni deuh niaih a. Ka thlak fel zung zung a. Duati chu ka kaitho a, hnute ka pek tir a, a chau hle ni tur a ni, hnute pek pah chuan a muthlu leh siar siar, naute chu hnute hnek rem tumin ka lo vawn sak a.

          Naute a puar hnu chuan a mu leh ta siai siai a, Duati pawh a muhil chhunzawm leh nghal a. Zing dar 7 a rih tawh a, han mut leh mai a chi viau tawh lo a. Ramsanga chuan min rawn kuah a, a pangtilumin min deh rual chuan ka zam chhe leh viau tawh a.

          “I chau em?”

          “Chau lo ve, ka mu teuh alawm, i mu mang si lova, i chau viau ang a”

          A nui suk a, “Ei tur ka zuk la ang e, i duh leh lo intifai la,” a rawn ti a.

          Bath room lamah chuan intifai turin ka lut ta a. Zin chhuah lai a ni hlauh bawk a, bag-ah engkim ka ah fel than hun lai a nia, tooth brush atanga makeup thlengin, a tihzia khawp mai.

Ka hmai ka phih zawh chuan ka mutna lam chu ka pan a,ka bag chu ka hai rak rak a, nimina necktie ka lei chu a lo awm ran a. Ka pe ngam ngang lo, tian ak kual vak vak mai ang, remchang a la awm em ang chu maw!

Ka hmaiah chuan moisturizer te ka hnawih fel hnuah ka mit chu sinte in ka line a, ka hmuiah chuan lipstick ka thai leh puat a, ka sam chu ka chhipah ka bawk tawm bawk a, tihian chuan ka hmuh tlak deuh tawh ang chu.

Ramsanga pawh coffee leh biscuit nen a rawn inchawi lut ve chiah a. A chau ve tawh hle ang tih ka ring, nizan lamah a muhil miah lo tih a hriat a. A blazer kha chair nghenchhan- ah a bang than a, a shirt pawl dal riai chu a chung ber a phelh thawl a, necktie a pawt thawl bawk a, a shirt ban a thlep chhing bawk a, a che zung zung a.

Nizana motora a thusawi kha ngaihtuah nawn lehna hun pawh ka nei ta lo kha a nia. Chutia a che vel ka thlir chuan ka pasal nen ka lo khaikhin lo thei lo a. U Thantea chuan kumkhua atan min nei tawh a, min rim thin lai atangin min duatna emaw, min duhsakna a lantirna ka la hmu ngai hran lo. A lo leng a, ka pa nen an inkawm a, thingpui ka lo lum sak a, a changin tui a tih thu te a sawi ve luam thin, chung bak chu kan inneih hnuah phei chuan ka hre mang lo a ni e. Engkim hi a tur rengah a ngai a, thil awmdan tur saah a ruat a, lawmthu leh inpek let ilo hi a awm ve lo. Ramsanga erawh chuan tun ni hnih lek ka la cham hun tur hi keimah min duat nan min dil a, nihnih chu sawi lo, zan khat ral ta chhung lek pawh khan min duatna leh min ngaihtuahna kawng hrang hrangin ka dawng nghal a, kei hi ka haw vat loh chuan a zunah hian ka luangral mai ang.

Dawhkan a buatsaih lam chu ka pan hnai a. Coffee chu kan in dun a.

"Ka nutei leh a makpa pawh an lo thlawk chhuak dawn tawh a,an lo thlen veleh hotel-ah ka thlah che ang a, i mu hahchawl vang vang dawn nia," a rawn ti a.

"Chutiangin ka hah hleinem, kei chu zin nuam ti mi ka nia, ka taksa pawh hi chutiang tura duan chu a nia, men rei te, zanhnih khat tlaivar te mai mai chu ka hah pui ve hauh lo a nia" ka ti let a.

"Anih leh khawi ram nge i tlawh chak ber, i la tlawh loh zingah," a rawn ti a.

"Tlawh alawi pawh ka la nei hleinem, pasal ka nei hma lutuk a, kan pa lah chhuakvak chi a ni bawk si lo a. Mahse, Norway hi chu ka la tlawh dawn khawp, midnight sun te hi ka hmu chak tak zet,"

"Hmeichhia hi chu in vanduai, pasal in nei a, in dream te hi a thlawk bo vek anih ber hi," a rawn ti hmuk a.

"Pathian min siam dan a nia, ka vui hran lo, mahse, feminist deuha ngaihtuah chang chuan ka vui lek lek thin," ka ti let a.

"Norway-ah chuan ka la hruai dawn che nia," a rawn ti a. A rawn fiamthuah  ngaiin nuih hak hak pahin amah chu ka en a, thutak deuh mai hian min lo melh run a.

"Ka ti tak tak alawm," a rawn ti leh a.

"Mumang ram lamah te chuan kan la kal dun mahna" ka ti sap a.

Naute a rawn tap a, nurse in damdawi ei tur a rawn dah chiah bawk a. Kan rik tak deuh hak avang chuan Duati pawh a rawn harh ve bawk a. Naute diaper te kan thlak fel a, hnute te a pek fel hnu chuan Duati sam chu ka khuih mam sak a, ka phiar sak at a, a in eipuar zui ve ta a.

Duati nu te pawh dar 11 velah an rawn thleng a, Ramsanga nen damdawiin kan chhuahsan ta a. Duati pasal chuan lawmthu min hrilh nasa hle a, a nu erawhin Ramsanga bialnuah min ngai deuh nge, min en leh deuh hrak hrak thin a. Kan chhuahsan dawn chuan Duati pawhin lawmthu min hrilh mawlh mawlh a, ka haw hmain ka hman leh ka la tlawh leh ang chu.

          Ka hotel thlenna lamah chuan kan tlan zui ta vang vang a, Neha pawh ka call a, zan lama kan chanchin te ka hrilh a. Ramsanga nen hun kan hmang dun tih a hriat chuan a rawn phur em em lehnghal a, bazarpui pawh a ngaih loh thu leh a nu nen chhuah an tum thu te min rawn hrilh mawlh mawlh a.

          Phai ramah hi chuan khawi lai mai pawh hi kal dawn ila tlan vang vang zel hi a ngai mai hian ka hre thin. Ramsanga chuan AC a on a, ka maimitchhing siar siar a, a bula ka awm hian mak tak maiin ka thla hi a muang huai zel anih chu. Nizana a thusawi kha ka ngaihtuah nawn leh a, ka ngaihtuahna pakhatah chuan “Pasal nei lai i nih kha, engmah hmalam hun awm lo turah i nun tibuai kual suh,” ka in ti a, ka ngaihtuahna dang leh-ah chuan, “Ni hnih chiah alawm le i awm tawh dawn le, hmeichhia, hmangaih leh duat mamawh ve em em i nih kha, i tun hun chiah kha ngaihtuah rawh,” ka in ti mawlh mawlh bawk a. Min zahthiam em emtu ka bula motor khalh mek hi chuan eng thutlukna pawh siam ila, min hrethiam vek ang tih ka hrechiang khawp mai.

          Motor chu a ding dat a, ka insiam rem a, pawn lam chu ka hawi chhuak a, ka hotel thlenna kan lo thleng der tawh a.

          “I muhil emaw ka ti a, ka inthlahrung hle mai, keimah vangin i hah ta hrep a nih kha,” a rawn ti a.

          “Ka hah lo tak tak a nia, inthlahrung miah suh,” ka tia, engemaw sawi tumin a ang zuau a, mahse, a ngawi leh ta zawk a. Motor kawngkhar hawn tuma ka vawn lai chuan ka huaisenna zawng zawng ka sawm khawm a, ka inher let a, amah chu ka en ta ran a.

          “Nizana i thusawi-ah khan i la ding em? Tun nihnih chhung ka kianga awm min dil kha, i ti tak tak em?” ka ti thut a. A hmelah chuan mak tihna leh phurna a rawn lang chhuak a.

          “Ti tak tak dawn lawm ni, mahse, nizanah keimah vangin i tlaivar sia, nikhat tawp chu kan paih turah ka lo ngai a,” a rawn ti a, a nui var var a.

          “Ni hnih chiah neih laia ni khat tawp mut bo te chu a uiawm alawm le, va haw vat la, lunch ei turin ka lo nghak ang che, i duhna berah kan kal dawn nia,” ka ti a. A hmela hlimna lo lang chhuak chu ka theihnghilh tawh ngai lo ang. Ka khabe-ah a rawn dawm a, min fawp ta vawng vawng a.

A hmela phurna lang ang chiah chu ka hmelah a lang chhuak ve lo anih chuan a mak hle ang. Duhthlanna ka siam fel ta a, ka siam sual dawn lo tih pawh ka hre bawk. Ani nen hian he leiah hian inhmu leh tawh ngai lo tur pawh ni ila, vawiin a ka thutlukna siam-ah hian ka inchhir ngai lo ang.

          Ka room ka luhfel chuan AC ka on zui a, ka inbual fai a, tleirawl ngaihzawng te nena an leng chhuak tur ang hi ka in chan deuh a, ka innuihzat deuh a. Ani lah tak a, ngaihzawng la nei ngai tlat hek lo le, U Thantea nen khan min rawn rim thin lai kha chuan kan leng chhuak ve tawh ngei a, chu pawh innei mai tur kan nih hnuah a ni a, mahse, hetiang hian ka phur ngai lo, min rim thintu a nia, lenpuiah min sawm a, ka ‘aw’ liam ve mai zel a. A chang phei chuan ka ‘aw’ vek tawh hnu te hian ka chak lo lutuk a, ka biru kual vak vak zel anih kha.

          Kawrdum, cotton puan, daidak mai, mawng khuh vela fual leh Jeans pawdang zuih thla chu ka ha a, hmanzana Neha-I nena chapel inang kan lei kha ka bun bawk a. Ka mit chu nasa vak lovin ka chei a, ka hmui pawh a sendang lam ka hnawih a, ka sam chu ka thlah hniang a. Ka hmela phurna leh hlimna lo lang chuan min ti lang tha zual tak zet a ni. Mi tam tak hian pasal ka neih hma vanga min ui thu min hrilh thin a, pasal ka nei tih hre reng a min be lui pawh ka tawng fo. Engah mah ka ngai ngai lo a, tin, ka ler lo ve hrim hrim nge, mipa hi min hiptu tak ka tawng ngai lo pawh ka hre lo, tu-ah mah hian beiseina ka siam sak ngai lo a, U Thantea tana nupui tha nih hi ka tum tawp zel. Tun tum ka zin erawh khawharna nasa lutuk nena inpu chhuak sa ka ni bawk a, Ramsanga min duatna te chu ka dawngsawng zo lo a ni ber e, mahse, ka inchhir ngai lo ang.

          Ramsanga ka nghah lai a chuan U Thantea ka phone a, ka inthlahrung khawp mai. Monday atan ticket ka lak tawh thu te ka hrilh a. Min lo hmuah tur thu a rawn sawi leh a, ka ngaih hi a tha thei lo a ni, nidangah pawh min hmuak ngai hlei lo. In enkawl  tha turin ka hrilh mawlh mawlh a, phone ka dah ta a.

          Ramsanga pawh a rawn thleng rang khawp mai. Motorah kan chuan luh hnu chuan, “Vawiin chu kal duhna bik i neih loh chuan ka duhna apiangah ka kal pui tawp mai dawn che asin,” a rawn ti a. Ka pawmpui tih nan lu ka bu nghat a. A tlan chhuah pah chuan, “I chhe lo tak zet a ni,” a rawn ti a. Ka nui var var a.

          Chanakyapuri lamah min tlan pui vang vang a, restaurant romantic zet mai, novel-a an ziah thin ang ni mai awma mawi, Digin tih ah chuan min luhpui a, a restaurant leh a velah chuan Saron senduk leh a var a par a, plant mawi tak tak a mawi tawk te hian an hung bawk a. Menu ka en chuan Italian food deuh hlir a lo ni a.

          “Wow, Italy a zin ang mai alawm kan nih dawn le,” ka ti chhuak hap a. “I kal ngun hmel zawk bawk a, i duh duh min chah kep rawh, thil tui chu i hre dawn chiang,” ka ti a. A bu nghat a, Waiter hnenah chuan a chah nghal zung zung a. Tunge mawni ber chu hetah hian a hruai tawh ngei ka ring nghet tlat ringawt, hetiang Restaurant romantic lutukah mipa lehnghal, thian ho chuan an kal lo tawp ang tihna rilru kan nei nghal ringawt a.

          “Dik lo a awm em ni? Nuam i ti lo em ni?” a rawn ti a.

          “Nuam ti e, hmeichhia engzat nge hetah hian i hruai tawh?” ka lo ti deuh nghal tawng a. A nui chhuak hak hak a. “Enge nuihna tur, hetiang restaurant-ah te chuan mahnia kalna chi pawh a nih chiah loh hi, mipa tan thian ho-a kalna chi lah a ni lo,” ka ti zui a.

          “Kan chhiar ang aw,” tih pahin a kutzungtang chu a thliak nghut nghut a. Ka thin a rim deuh tlat tawh a. Ka nui peih tawh lo.

          “Pasal nei lai ka ni tih i hre reng a, mualpho pawh huamin vawiin leh naktuk atan hun ka pe che a, hmeichhe dang ni hnih khat lek i lo kawp thin nen ang khata min ngai a, category khat a min dah anih chuan ka lung a awi lo viau ang,” ka ti a. Ka hawi chhuah chuan min lo en run a.

          “Ka ti tak tak alawm, i lo lenchhuah pui ve zuai zuai tawh nen thuhmun a min dah a, ‘One of them’ ka nih chuan, min thlah haw nghal zawk mai rawh. Mipa ka duhthu ngei a ka vawikhat lenchhuah puina a ni a, ka tan chuan vawiin ni hi a special tak zet a ni,” ka ti a, a tawp lam phei chu a ri chhuak thei tawh meuh lo. Ka thin zawn hi a sa pup pup a, ka tah chhuah loh nan ka insum tang tang bawk.

          Dawhkana ka kut dah chu a rawn la a, a hmer vang vang a. Ka tang deuh tung bawk a,

          “Zodin, tun hi mipa vawi khat i lenchhuah puina maw?” a rawn ti a. Ka lu ka bu nghat a.

          “I pasal neih hmain ngaihzawng dang pawh i nei ngai lo em ni?” a rawn ti leh a.

          “Aih, U Thantea nen chuan vawi hnih khat chu kan chhuak dun ve, chu pawh ka rawt ni lovin, min rim thin tu a nia, min sawm ve thin a, ka pasal ni mai tur anih vangin ka ‘aw’ liam ve mai thin” ka ti let ha a.

          “Inngaizawng in ni lovem ni?” a rawn ti leh a.

          “Ni lem lo, min rawn rim thin tu a nia, kan lecturer a nia, ka chhungte zawng zawngin ka tan a tha anih thu min hrilh thin a. Mipa lehkhathiam a ni a, ka zah em em a, ka tana tha anih ringin nu leh pa te thuawihin ka nei ve tawp,” ka ti a.

          Ngawi rengin a ding a, ka en reng a, ka thutna thutthleng lamah chuan a rawn phei a, ka bulah chuan a rawn thu a, min kuah a.

          “Khawvela mipa vannei ber ka niin ka hria. I duhthu ngei a i lenchhuah pui hmasa ber ka lo ni reng a," a rawn ti a. A ngawih vang vang hnu chuan, "He hmunah hian tumah ka la kal pui ngai bik lo, ka uang mai mai anih kha. Mahse, he restaurant nei tu hi  ka thianpa nau a nia, a siam lai te, a hawn ni te leh a hawn hnu pawn ka kal fo a. A hmun romantic lutuk hi ka hmeichhe duh ber hruai nan ka it thin a, chuan, vawiin-ah ka hmeichhe duh ber ka kalpui ni hian, chu hmeichhia pawh chuan ama duhthu ngeia vawikhat mipa a chhuahpuina a lo ni chiah bawk a, ka vannei tak zet zet a ni,” a rawn ti a. A awmah chuan ka bei kak a, ka mittui rawn tla tur chu ka lo hru a.

          Kan ei tur chah chu a rawn thleng a, a tui hmel hlawm hle bawk. Ka thinlung takin ka hlim thar leh vawng vawng a. A daih rei dawn lo tih ka hria, mahse, damchhung a khawhar taka hun hman ai chuan nikhat lek pawh min duh em em tu bula hun hman chu ka tan a hlu em em a ni. 

          “Eng music nge i ngaihthlak thin,” ka ti a.

          “Ka hre lo, duh bik pawh ka nei lo, mahse, Motora zin hian Daduhi hi ngaihthlak nuam ka ti, ngatinge?”

          “Ka zawt mai mai che, anih leh K.Hminga i ngaithla ngai em?” ka ti leh a.

          “Nope, a zaithiam em?” a rawn ti hu a.

          “A hla pakhatah inhmeh deuh kan nei a,”

          “Chung te chu kan ngaithla ngam dawn em ni,” a rawn ti let a.

          “I nutei khan mak min tih hmel tawp a,” ka ti leh daih a.

          A rawn nui chhuak ta hawk a, “Topic thlak hi i master-na anih ber hi. Ka nutei chuan mo an duh tawh lutuk a, keiina hmeichhia ka hruai luh tawh te chu mo chei in an chei chak a, min zawt ngam si lo talbuai anih kha,” a rawn ti a.

          “Nakinah an bulah i kal leh ngei dawn sia, zawt ta che sela, engtinnge i tih ang?” ka ti let ha a.

          “Aw, in monu duat em em tur anih hi ka ti ang,” a rawn ti hmiah a.

          “Ramsang”

          “Enge?”

          “Thutak ve deuh teh”

          “Enge, ka thu tak alawm”

          “An monu chu ka ni thei ngai dawn lo tih i hriat ve reng kha,” ka ti a.

          Min en vang vang a, a thil eina fork chu a dahthla a, ka kut a rawn la kang a, nizana a tih ang bawk khan a thin zawnah a dah a. “He ka lungphu, nangmah ka hmuh leh i bula ka awm chang apianga a phut dan danglam thin hian, ka hnenah a la hruai thleng ngei ang che, engtikah nge ka hre lo, mahse, ka ta i la ni ngei ang,” a rawn ti a.

          Amah chu ka en reng a, chhan ngaihna pawh ka hre lo. Ka ngawi reng a. “Le, ei zawm leh tawh rawh le, thil kan ei zawh khawnge kan kal ang?” a rawn ti a. Engmah pawh ka ei thei tawh lo.

          “Bazar mai mai ila, Duati naute thil tur pawh ka leisak ve duh alawm,” ka ti chhuak thei hram.

          Kan thil eina atanga hnai Shopping Mall-ah chuan kan lut a. Mothercare Show Roomah kan lut a, naute kawr leh mawza ka lei a, Ramsanga pawh tupa thar nei a ni bawk a, eng eng emaw a rawn thlang ve nual a, damdawiin lam panin kan kal ta a. 

Motor dahna lam kan pan lai chuan min rawn kai a, dik tak chuan ka lai ve det, nuam ka ti hle bawk.

          Car-a kan luh fel hnu chuan car tape chu ka on a, ka Bluetooth nen connect ka duh thu ka hrilh chuan a phone Bluetooth chu a off a, ka connect zui a. K.Hminga hla, “Ka hringnun diary” tih chu ka play ta a.

          “Fur khua leh ruah tui chu kawp tur a duan,
           Pangpar leh khuaite pawh kawp tur a duan;
           Vanzawl a chhum leh ni zung pawh kawp tur a duan,
           Nang leh kei erawh hrang tura duan.”   

a rawn ti raih raih a. Kan inhmeh hle hian ka hria a. Ka hawi chhuah chuan min lo en run a, a hmelpa zet chuan min ti zam leh pek hle. A thunawn a sak lai te chuan kan inhmeh ka ti tak tak a, heti khawpa thinlung hmu si pasal ka neih hnu chauha kan intawng hi hrang tura duansa kan nih vang te pawh a ni ang e.

     Damdawiin kan thlen chuan Duati nu hmuh chu ka hreh hle mai a. Ramsanga bulah chuan motorah ka lo nghah tur thu ka hrilh ta tawp a. Ka thil lei sa te chu ka pe a, ani pawh chuan min nawr lui ta bik lo a, a rei loh tur thu min hrilh hnu chuan min kalsan ta a. Hnung lam atang chuan ka thlir reng a,a pian nalh zet, inkhaithli thlerh thlawrh leh thau chuangbang awm hauh lo leh casual taka a incheina chu a inrem lutuk a, a ti pa hliah hliahin ka hria.

       Ramsanga kal liam hnu lawk chuan ka phone a rawn ri a, ka nu a lo ni a. Ka pick up var a,

"Hello"

"Bawihi, buaina kan tawk tlat mai"

"Nu, enge ni ta?"

"Hei Thantea a heart attack hlauh mai a, damdawiin kan thlenpui tawh a, tunah chuan a thawk pawh a zia leh tawh a, Icu-ah a awm mek," a rawn ti a.