There She Goes - CHAPTER 7

Lengpui Airport-ah kan tum a. Airport chhung lamah kan in zui lut hnak hnak hlawm a. Ka mal ngawih ngawih hian ka hria. Bungrua an rawn dah chhuah tan hma chuan ka phone chu ka la chhuak a, Ramsanga chu ka call a, a ring hman hma in ka dah leh a, a aw mawi zet kha ka ngaithla ngam tawh lo a ni. Ka khawvel pangngaiah ka let leh tawh bawk a, biak loh zawk chu a himin ka hria a. Whatsapp message ka thawn ta zawk a.

"Lengpuiah kan tum fel e. Thanks for everything” tiin tawi te in ka thawn ta a. A in blue tick rang kher mai. Message a rawn lut zui a.

"Hlim takin awm la, i chanchin chhia engmah ka hre duh lo. Dam tak takin le" tih zawng a rawn thawn let ve a. A aia thui ka beisei ngam lo nang a, a tawi ka ti ngang mai. Vawi nga vel ka chhiar nawnin ka hria.

Ka nu ka call zui a, ka thlen tawh thu te ka hrilh a. Ka bungrua a lo thlen chuan ka la nawlh a, exit lam ka pan nghal vang vang a.

Taxi lo awm hmasa ber ka la a, Ebenezer Hospital lam panin kan tlan zui ta nghal a. Ka suitcase chu a hnawk dawna ka hriat avangin Vaivakawna a kan dawrah dah mai a tha in ka hria a. Driver chu ka kal duh dan chu ka hrilh zung zung a, ka lo muthlu palh anih pawhin Company peng kan thlen vel a min kaitho turin ka chah bawk a.

Ramsanga thi min pek chu ka khal nauh nauh a, dahthat a him ber zawk dawn a ka hriat avangin ka phelh a, ka hum vang vang a, a bawmah te khan ka khung a, ka bag-ah ka dah lut a,  min pe tupa zawng zawng nen chuan ka thinlung chhungril berah ka dah tha rih ta a.

Pawn lam chu ka hawi chhuak a, engkim mai hi a chul rup mai hian ka hria. Nizan kan mu tlem bawk a, ka lo chhing sek a ni ngei ang, driver chuan min rawn kaitho a, Company peng kan thlen tawh thu min rawn hrilh a. Ka inti harh a, kan dawr nghak te ka call a, dawr kawta min lo nghak turin ka ti zui a. Vaivakawnah chuan ka suitcase chu dawrah ka dah a, Kanan veng lamah kan inkhalh liam zui leh ta a.

October thla chanve a ni tawh a, boruak pawh a nuam tawh khawp mai. A lungleng zawng a ngaihtuah dawn chuan lunglenna tur hlir a ni mai dawn a lawm e. Kei ve hi ka pasal, ICU a awm hmu tur a kal ka ni a, nichin darkar hnih thum vel liam ta a thil thleng zawng zawng kha ka ngaihtuah loh a tul a ni tawp mai.

Ebenezer kan thlen chuan visiting hour a lo intan chiah a, ICU lamah ka lut chho nghal a. Ka nu in min hmu chiah chu min lo kuah nghal vawng vawng a. Ka dam sawng sawngin ka hria.

Thlang lamah chuan U Thantea nu leh pa leh U Thantea farnu neih chhun U Mahlimi te an lo thu a, an lam pan chuan ka kal nghal a. Ka chauh leh chauh loh te min lo zawt zung zung hlawm a.    

"Engtikah nge luh an phal dawn?" ka ti chhuak hlawl a.

"An phal tep ang, hlauthawng lutuk suh, a fel khawp mai, amah pawh a biak theih reng a, mahse, a la chau deuh a," tiin U Mahlimi chuan min lo chhang a. Kan sawi hnu lawkah chuan, "Pu Lalthantluanga chhungte pakhat a luh theih e," an rawn ti a.

"Va lut rawh le," an rawn ti sap sap a. Keipawh chu ka ding a, ICU room lam pan chuan ka kal ta a. U Thantea chu ka rin ai daihin a lo harh a, ka thawveng huai mai. Min lo nuih suk a.

"I lo thlenna a rei tawh em?" a rawn ti a.

"Ka lo thleng chiah a ni, na i nei em?" Ka ti let a.

A lu a rawn thing a. " Engmah na ka nei lo, mahse, min khawih chau ve hle aniang, rei lo teah hian ka muhil leh mai thin,"a rawn ti a.

"Ei chak i nei em?" Ka tih chuan a lo nui tha a.

"Ka ngah mai a, mahse, ka ei chak apiang hi ei an phal tawh dawn lo a ang khawp mai," a rawn ti a. Kei pawh ka nui chhuak ta hak hak a.

Sawi vak tur pawh kan hre chhunzawm leh tawh lo, kan nupa dan ngai te in kan ngawi dun leh vang vang tawh a. A aw a rawn thian a, "Tun tum i zin chu hetianga ka awm dawn vang hi niang, ka ngai khawp mai che a, ka zinpui lo che kha ka inchhir ru vawng vawng asin," a rawn ti a.

"Aw, mahnia zin a hrehawm nen, min lo kal pui la tha tur a nia, nidangah min zinpui ziah tawh dawn nia," ka ti let a. Min zinpui lo chu a tha nge tha lo pawh ka hrethiam chiah ta lo.

A insawi ang deuh chuan kan ngawih deuh chuan a muhil leh deuh siar siar nghal a mai a, ka be buai duh bik lo a, chawlh hahdam a mamawh te pawh aniang. A bulah chuan ka thu ngawi reng a, ka hmu cher ve kuam mai. Nurse pakhat hi syringe nen a rawn kal a, a kuta venflon an vuah saah chuan damdawi a rawn thun a. "Annu ami i nih?" a rawn ti a, ka lu ka lo bu nghat a.

"E, i lo thleng ta bawk a,a dam sawt sawt mai ang," nui tha hian a rawn ti a. Ka nui let ve sak a.

Darkar chanve chauh awmpui an phal avangin darkar chanve a ral hnu chuan ka chhuak ve ta a. A muhil lai han chhuah san em chu ka hreh deuh a,kalsan dawn chuan ka kaitho a, ka chhuah tur thu ka hrilh a, ngaihtuah a ngaih loh thu te a rawn sawi ve luam a, ka chhuahsan ta a.

Ka zin hah deuh avangin zanin chu min la awl theih tur thu min hrilh chamchi hlawm a. Mahse, ka tang ve tlat a. Inah ka haw ang a, ka inbual fai ang a, chaw ei khama kal leh turin kan in tifel a, ka nu (U Thantea nu) pawh a awm ve tho avangin keima nu chu ka ruala haw turin ka ti a, tin u Mahlimi pawh zan lama damdawiina awm ve tur tho anih avangin kan pathum chian kan haw ta rih a. Ka nu chu kan thlah fel hmasa a, U Mahlimi kan thlah leh a, in lam panin ka tlan zui ta vang vang a.

In ka thlen chuan kan nula chuan min lo chiau au zung zung a, ka suitcase te pawh in a thlen tawh thu min lo hrilh a. Tlai lam dar 5 a ri tawh a, mutna hun ka nei tawh lo a, Maengi bulah chuan ka inbual tur thu leh chaw ei khama damdawiin ka pan leh nghal tur thu ka hrilh a,  mut pindan lam ka pan zui ta nghal a.

Tui sa ver vawrin ka inbual a, ka harh sawng sawngin ka hria. Ka inbual zawh chuan Hospital lama ka ah tur bag ka siam a, ka zin bagah khan engkim a awmsa a, ken mai a tha in ka hria a. Ramsanga thi min pek chu ka la chhuak a, ka dressing table a ka tlereuh ho dahna chu ka hawng a, ka dahtha ta a.

Maengi chuan chaw ei min siam sak a, ka ruala kil ve nghal mai turin ka hrilh a, kan pahnih chuan chaw kan ei dun a. “E, ka pi, U Thantea phone kha ka kawl a, a na a rawn chhuah vak khan phone kha min pe a, a nu call turin min ti a. An lo thlen khan an kal san zui a, phone ka switch off a, ka dahtha ta daih a,” a rawn ti a. Chaw ei kham lamah min lo pe la, message pawimawh te pawh a awm palh ang e,” ka ti a. Chaw ka ei kham chuan phone chu min rawn pe a, damdawi in lam panin ka chhuak leh ta nghal a.

Damdawiin ka thlen chuan U Mahlimi chu a lo thleng vang tawh a, ka nu leh pa pawh an lo haw dawn chiah a, tha takin kan inthlah a. Kan khum tur chhuata kan phahah chuan kan thu dun ta ran a. Doctor hmuh nghal ka duh viau nang a, ka thlen hun nen a inmil lo bawk a, naktuk ward a rawn fan kual hunah ka lo be thei mai turah ka ngai a. ICU chhunga luh theih hunah chuan ka lut veleh zawk thin a. Chubak chu tih theih a vang khawp mai.

Nizan leh zan hmasa ka mut mumal tawh loh avangin ka chau ngang a ni ang, U Mahlimi pawh ka lo muthilh san daih a. Ka mumangah chuan Ramsanga ka lo hmu a, Duati te cabina a kal tur motor atanga ka thlir liam lai ang chiah khan a hnung lam chiah ka lo hmu a, min hlat zawngin a lo kal a, ka lo ko vak a, min chhang thei lo a, ka harh hlawl a. Ka lunglen dan chu sawifiah thiam rual a ni lo, ka mittui chu a rawn luang a. Pasal te ICU a mut laia chutiang kher kher mumang neih pawh chu, kha mumang kher kha chu thlarau sual rawn siam a ni ngei ang.

Dar zat ka en a, zing lam dar 3 a lo ri tawh a, kan bul vel ami te pawh zanin chu serious over an awm lo bawk a, an muhil ve sak sak hlawm a. Muthilh leh ngial ka tum a, ka thei tawh ngang lo a, ka phone chu ka en kual mai mai a. Whatsapp status chu ka enkual a, Ramsanga status a lo awm kalh a, thinphu dep depin ka hawng a.

A awm bei a ka muhil lai thlalak a lo hmang anih chu! Kan thawmhnaw hak ka en chuan Duati naute nei tur labour room kawta kan nghah lai ngei kha a ni, ka kun avang leh ka samin ka hmai a hliah then avangin tuman keimah ka ni tih chu an hre kher lo ang. Ka thin chu a rawn sa vawng vawng a, ngam leh ngam lovin, a status dawt leh chu ka hawng leh a.

          “Baby, you’re all that I want,

           When you’re lying in my arms

           I’m finding it hard to believe,

           We’re in HEAVEN”

tih hi a lo ziak kulh a, ka insum zo thlawt lo. Ka inlukhup a, ka inhnit feih feih a. Lalpa, enga tinge Ramsanga hi ka kawng i rawn kaltlang tir le?!

Ka bula mu U Mahlimi chu a rawn che tual tual a, min rawn kuah thuk a, “Zodin, tap suh, Thana chu a tha lutuk tawh alawm, han chawl hahdam se, phaiah kan kalpui vat ang a, engkim a tha vek mai ang,” a rawn ti a, ka hnung a rawn beng thek thek a. Ka zak lutuk bawk si chu ka tah a chhuak telh telh a, ka insut ri leh hrak thin a, ka inlukhupna pawh ka hawng duh lo a.

Ka mittui ka hru hul a, “U Mahlim, kan hawi harh lawk ang aw, hei phone ka keng a nia, thil pawimawh a awm chuan min lo call mai rawh, ka rei lo ang, muhil leh rawh,” ka ti a, kan mutna chu ka chhuahsan a, inchung sang lamah chuan ka han chho a.

Khua a la var lo a, tlang leh leilung te chu a lang dum vek a, chung lamah van lam erawh a dumpawl duk raih a,an inkarah tak chuan ni lo chhuak tur chuan kawl a ti sen ruih a, a mawi tak zet a ni. Ka lung chu a leng vawng vawng a, au vak theihna hmun ram reh ni se, au vak vak mai ka chak tak zet a ni.

Ka phone chu ka en vang vang a. "Ramsang, min ngaidam rawh aw, i bula awm thei si lovin i chanchin te, i thiltih te ka hre reng anih chuan atthlak takin ka che mai ang. Engkim hi ka chhu chat ang a, i thinlung lalnu ka nih takzet chuan ka hmaah hian i la rawn ding leh tho tho ang," tih mawlh mawlh pahin a phone number chu ka delete ta a. A status thlir theih ringawt pawh ka tan chuan a rit lutuk, chu ai chuan ka rilru-a amah a rawn lan theihna zawng zawng hi nuaireh vek a tha ber ang.

Zingkar khua chua vawt surh tawh a, ka shawl chuan ka in khuh tha sat sat a. Inhnuai lam panin ka chhuk leh ta a. U Thantea phone kha ka hre chhuak a, ka on a, message pawimawh a awm takin tiin ka hai a, pawimawh em em ka hmu lo a, dam vat tura duhsakna te a lo awm nual a, number ringawt pakhat atang hian, “I tha tiraw? Dam vat rawh aw” tih zawng hi a lo awm a, ka en vang vang a, engtin emaw ni tak hian mit hi a la tlat a. Ka en reng lai chuan, "Phone i khawih peih tawh em ni?" a rawn in ti leh zat a. Ka en vang vang a, rilru kawi ka put hma in phone chu ka off leh ta daih a.

Doctorin ward a rawn fan chuan min rawn ko a, ka lut ve nghal a. A dinhmun chu a that rih thu min hrilh a, mahse, phaia kal a, a dinhmun dik tak khawla enfiah a that  thu min hrilh a, in refer ka duh chuan min refer theih reng thu min hrilh bawk a. Inngaihtuah nawn hauh lovin ka duhthu ka hrilh nghal bawk a. Ka haw atanga ni thum hnuah damdawi in atangin kan chhuak a. Birla Hospital, Kolkata ah min refer a, karleh lama kal turin kan inbuatsaih ta a.

Kolkata chu tluang takin kan thleng thla a, U Thantea thianpa, U Mavala chu Kolkata Mizoram House-ah LO a awm lai a nia, min duhsak em em a, Room tha lai ber min lo dah sak a. Damlo ten room hi an indaihloh thin em avangin Hotela awm pawh pawi ka ti lo viau a, mahse, U Mavala hian a phal lo bur, “Room indaihlohna a awm pawhin kan in lamah in riak mai ang,” a ti bur a. Kolkata Mizoram House Ballygunge lamah chuan kan thleng ta a, tin, Birla nen a inhlat lo bawk a, a zia phian mai.

U Mavala hi kan pa nen high school an kal lai atanga inkawp an ni a, an hnathawh a inan loh avangin hna an neih hnu erawh in an inhmu khat hle a, kan inneih ni erawh in amah lo midang Best a hman a tum lo bur a, chung hun lai chuan Delhi lama a thawh hun lai a nia, kan chah haw vang vang a ni. Kolkata kan thleng thla pawh chu kan mikhual lo phah hle a ni.

Appointment nei sa kan nih avang in, Kolkata kan thlen ni tuk leh maiah chuan damdawiin lam kan pan ta nghal a. Doctor hmu tur pawh an lo tam khawp a, thutna pawh a indaih thei meuh lo, U Thantea chu thutna ka kian a, amah a la chau ve reuh hle bawk. Doctor kan hmuh chuan, min admit nghal tur thu a lo sawi a, in admitna tur lehkhate a tihfel hnu chuan Ward Boy a ko a, wheelchair nen a rawn lut nghal a. Lung damdawiin a ni bawk a, damlo te an duat hle a, hah thiang lo an ni tawp a, in admit atanga chhuah ni thlengin wheelchairin an nawr kual zel tawh dawn a ni.

Wheelchair a han innawr vel chu U Thantea chu a tlawmngai ve khawp a, mahse, an hospital dan a ni ve tlat sia, kan room tur lam kan pan ta. Cabin room-ah kan lut a, a lo fel fai at a, riahpui tu mutna ka hmu lo a, sofa erawh pakhat an dah a. Kan luhfel hnu chuan nurse naupangte te pahnih hi an rawn lut a, thik awmzia min rawn hrilh a.

Hospitalah damlo riahpui phal a ni lo a, lung natna nei te chu tlu thut thei reng dinhmuna ding an nih avangin kawngkhar reng rengah kalhna a awm lo. Chawhnu lama lut kan nih avangin visiting hour a zawh hunah keipawh ka haw leh mai a ngai dawn a ni tih thu te an rawn sawi a.

A hnu leh deuhah chuan chart nen nurse pakhat a rawn lut leh a, lung thlalak a ni a, heart attack awmna chhan te a rawn sawi fiah a. Naktuk lamah U Thantea chu angiography (lunga vein in block dan enna) tih tur a ni a, chumi result chuan enkawl dan zel tur pawh a hriat tur thu te min rawn hrilh a.

An chhuah fel hnu chuan, “U Thante, nangmaha riah chu i hreh em?” ka ti a.

“Hreh lo ve, visiting hour anih veleh i rawn kal vat ang a,” a lo ti a.

“In duat hleihtheih pawh a ni lo anih hi, i riahna apiangah riahpui che a theih loh zel a,” ka ti a, a nui ve hak hak a.

“House a mahni chauha awm te pawh a hrehawm ang chu, teihawi te kha damlo a kal kan ni sia, i lo hreh ang e,” a rawn ti ve ngial a.

“Nia, new market lamah te pawh ka lo va kal kual ang, tihtur awm si lo a, lo bazaar ham ham ila ni mai,” ka ti let a.

Kan ngawi dun ta reng a, a phone chu a khawih mual mual a, hmanni zinga ami kha a be zawm ang em aw tih te ka lo ngaihtuah mai mai a. Reilote hnuah chuan visiting hour a zawh tawh thu te an rawn sawi a, haw turin ka insiam a, mamawh a awm chuan min rawn call zung zung turin ka hrilh a, ka chhuah san ta a.

Mizoram House lam pan a taxi a ka chuan lai chuan ka ngaihtuahna a vak kual nasa hle a. Mizoramah Doctor tha tak tak kan nei a, khawl tha kan neih loh avangin an thiam ngei ngei pawh an ti thei lo a, phai lamah min tir liam a, Mizoram pawisa tam tak kha phaiah kan zuk vawm ta thin a, a uiawm ka ti ngawih ngawih. Hruaitu tha nei ila chu heng te hi an ngaihtuah vat vat tur hi a nia, contract leh eng eng development hna, an hlep then theih loh tur hi chu an ngaihtuah tel peih lo ni mai te hian ka hre thin.

Room-ah ka thlen chuan ka inbual thlan dai a, Kolkata hi chu a vawt hleithei lo chu ni ber e. Ka inbual zawh chuan Coffee ka lam a, rei lote hnuah an rawn dah a. Ka in zawng chuan Ramsanga min siam sak kha ka hre chhuak vawng vawng a. A in felfai tak, pa thak mai a inchei te kha ka mitthlaah a lo lang a. “Zodinpui, hetiang hi ngaihtuah suh,” ka inti mawlh mawlh a.

Neha-i te inneih pawh karleh lam mai a nih tawh hmel a, ka kal theih hmel bawk si lo. Chungte tal chu hrilh tha in ka hria a, Neha-I chu ka call ta a.

“Hello, enge in an zel?” a rawn ti nghal a.

“Hei Birla Hospitalah kan in admit fel e, naktuk lamah angiography an ti ang a, kan chanchin tur kan hria ang chu. Neha, inneih chu ka va rawn kal theih hmel loh ta ve,” ka ti sap a.

“E, chutiang ngaihtuah a ngai lo, I rawn kal tlukin ka ngai vek tawh e, I pasal kha tha takin enkawl la, helama tlangval lungleng chu tha deuhin kan enkawl ang,” a rawn ti let a, a nui hak hak a, ka ngei reuh kher mai.

“Neha,” ka ti tuar a.

“Tak takin, hei kan inah a awm asin, i be duh em? Ama thu chuan a lo call dawn miah lo che tih ka hria, pa fair lutuk a nia, nang pawn i call hauh dawn lo tih ka hre bawk a,” a rawn ti a.

“Neha, ka biak loh hi ka tan a tha ber,” ka ti a.

“Sawpui, nangmah ka bia che tih a hrethiam aniang, min melh run mai,” a rawn ti, a mitmeng awm dan tur te chu ka hmu ve thei hialin ka hria.

“Neha, khawngaihin ka rilru hi lo tibuai suh, thiannu mi a i duh te anih loh chuan,” ka ti a.

“Ok ok, my bad,” a rawn ti a. “Mahse, in dam veleh After Honeymoon Party kan nei ang, Honeymoon kan kal ang a, kan lo haw veleh,” a rawn ti a. “And, aih i ti thiang lo bawk,” a rawn ti a.

“Ok, boss,” ka ti a, phone chu ka dah ta a.

Tihtur a awm lo tak zet a ni. Visiting hour kha tlai dar 5 atanga dar 6 chauh kha a nia. Naktuk tlai dar 5 ka nghak vang vang dawn a ni ber mai. Ka room an rawn kik karh karh a, U Mavala a lo ni a.

“Enge in chanchin le, in in admit fel ta em ni?” a rawn tia.

“Nia, in riahpui an phal bawk si lo a, tian naktuk visiting hour kan nghak vang vang mai dawn a nih hi,” ka lo ti a.

“Nia mawle, Birla chu an heti tlat a. Zanriah chu kan inah lo kil ta mai che, kan nu nen pawh in la in hre mumal hleinem le,” a rawn ti a. Pawi pawh ka ti lo. Nupui hmeltha zet Priscilla-i a nei a, fa pawh pathum lai an nei tawh anih tak kha.

“A pawi loh tawp chu, ka rawn chho dawn nia, naupang ho an awm lai a ni em?” ka ti zawm zat a.

“Delhi lamah a u te pahnih chu an la awm a, a te ber chauh kan bulah a awm, An zirlai a laklawh deuh a, nakum lamah chuan helamah an rawn insawn ve tawh ang chu,” a ti a.

“Anih chu a,  chanchin hi kan inhrilh tlem lutuk a, Delhi atang chuan ka lo haw chiah asin le, an awm tih hria ila, ka rawn tlawh tur a nia,” te ka ti ve luam a.

Priscilla-I chuan rawngbawl a thiam ngang mai a, an nupa chu an in duh hmelin hmuh an nuam tak zet bawk. U Mavala chuan Thantea nen an  tlangval lai te a sawi ve luam a. “Awi, U Maval, U Thantea chu a tawng duh lo lutuk a, an tlangval lai te chu a sawi ngai reng reng hleinem,” ka ti duah a.

“Hei chen chen Thantea hi i neih theih ka ring hleinem, ngawi reng mai bawk si hi maw, I hne anga I chhuahsan vat ka lo ring asin,” a rawn ti fiamthu hluai a, kan nui ham ham a, ka chhungril erawh chu a hlim lo hle, mi nupa inngeih tak hi ka thik thin.

A tukah chuan nilengin House-ah ka awm a, bazaar lam chu ka rilru ah a lang thei lo a. Kindle ka chhiar a, ka mu nileng a ni ber. Tlai dar 4 a rik chuan visiting hour thleng hman turin ka insiam a, damdawiin lamah ka liam veleh ta a.

Hospital ground floor-ah chuan chhungte kan tum an lo awm ve nak nak a, thenkhat phei chuan an nurse hmelhriat te an hmuh chuan an chhungte awmdan te an lo zawt kual ve a. He hospitalah hian mizo thawk pawh an awm ve nual a, mahse, ka la hmu ve chiah lo.

Room ka han thlen chuan U Thantea chu a lo muhil a, a phone chu awmah a lo dah a, number chauh nena an inbiakna niawm tak hi a lo inhawng sa a, chat erawh a in clear vek tawh thung a. Tiharh hlau takin phone number chu ka enchiang a, hmanni ami tho kha a ni. Ngaihtuah zawm duh lovin phone chu a lukham bulah ka dahsak a. Hei chen min nei tawh a, min rim lai atang pawha tawngka thlum pawh a min biak dan hre lo khan midang chu thlum takin a be lo turah ngai phawt ang.

Rei lote hnuah chuan nurse a rawn kal a, tukin zinga angiography an tih result te chu a rawn sawi a. U Thantea lunga vein chu hmun hnih-ah in block a awm thu te, zai ngai lovin angioplasty in a la siam that theih tur thu te, naktuk lamah angioplasty tih a ngaih tur thu te a rawn sawi a. (Angioplasty chu lunga vein block-a thisen kal a pangngai leh theih nan thisen zam block laiah khan stent an vuah thin). Nurse chhuah hnu lawkah chuan nurse senior zawk a rawn lut leh a,

          “Madam, naktuk dar 11 ah i pasal hi theatre-ah kan nawr lut dawn a, document tih fel ngai te a awm dawn a, zanin chu i riak thei ang. Angioplasty tih zawh hnu hian damlo chu ICCU (Intensive Coronary Care Unit)-ah kan dah nghal dawn a, visiting hour chhung chauh in hmuh phalsak in ni ang, zanin chiah I riak thei tihna anih chu,” a rawn ti a.

Aizawl lam chhungte chanchin hrilhin ka phone kual nghal zung zung a, Neha-I pawh ka hrilh hre nghal a, a nu leh pa te doctor an ni bawk a, thil pawh a lo hrethiam nghal zung zung a. Aizawl lam erawh hrilhfiah an ngai nasa thei hle.

 A tuk zing dar 10 a rik chuan zai kawr an rawn hak tir a, kan doctor ber pawh a rawn lut hlawl a. “In lo hlau lutuk ang e, engmah hlauhawm a awm lo a nia, a vein puiah, a kap tangin hriauin kan nawr lut ang a, kan han siam tha dawn a nia, zaipui tawrh ai chuan a tha daih zawk a nia. Lo tawngtai la, a bak chu Pathian kutah lo nghat tawp rawh” a rawn ti a.

 Dar 11 a rik chuan a nawr tur ho an rawn kal a, an nawr liam tur chu chhungkaw group a post atan thla ka laksak a. U Thantea pawh a rawn nui ve suk a. A lan theih thleng ka thlir a.

 Nurse naupangte hi a lo kal a, “Ka pi, an khawih zawhah I hmuh an phal dawn chuang lo a, mahse, doctor biak I duh chuan a nghah theih vek a nia, I haw dawn hunah thil bo thei chu hawn vek rawh aw, palh thil thu-ah a rawn ti a. Ka hrethiam tih hrilh nan ka lu ka bu nghat a.

Roomah chuan ka lo nghak a, U Thantea wallet leh mobile chu ka bag-ah ka dah a, rilru tawngtaina neiin ka nghak ta vang a. Aizawl lam atangin call a lo kal reng a. U Thantea phone pawh a ri awl lo a, amah berin a biak theih chuang loh avangin switch off mai ka tum lai tak chuan number in save lo tak mai khan a rawn call ve chiah a. Lak loh ka tum zet nangin a aw atang pawn tunge a nih ka hriat theih takin phone  chu ka la ta a.

          “Hello” a reh vang vang a, “Hello” ka ti nawn leh a. Hmeichhe aw, naupan hmel vak lo hian, “Thantea chu an nawr lut ta em ni?” a rawn ti a.

          “Aw, darkar chanve vel liam ta khan, tunge aw?” ka ti let a.

          “Zodini em ni? Amah a tha em?”

          “Tunge aw, i number hi a in save si lo a,” ka ti leh a, a nui hak a, phone chu a dah ta daih a. Ka ngei kher mai.

          Darkar hnih hnu velah chuan nurse kha a lo lut leh a, “Madam, I pasal kha an khawih zo tawh a, doctor I hmuh duh chuan theatre kawtah lo zuk nghak la, 3^rd floorah” a rawn ti a.

          “Awle, ka lawm lutuk e,” tih pahin ka bag te chu ka ak a. Inhnuai lam chu ka pan ta a. Theatre kawtah chuan ka ding ren rawn a, reilote hnuah chuan doctor chu a rawn chhuak a.

          “Hlawhtling takin kan khawih e aw, engmah hlauhthawn tur a awm lo. Zanah tui deuhin mu la, naktukah visiting hourah a hmuh theih ang, engkim a tha vek a nia,” a rawn ti dam dap a.

          “Doctor, ka lawm e aw,” ka ti sap a.

          “Pathian hnenah lawmthu i sawi zawk dawn nia,” a rawn ti a. Ka nui sak a. Ground floor lam panin ka kal ta a.

          Ka hnung lamah chuan Mizo nurse ni ngei tur hi an ti ti nak nak a. Pakhat hian “Thiannu, tunlai chu U Ramsanga’n status a nei turu thei rap, nula thlalak a hmang ziah, a hmel a tilang chiang duh ngai si lo, U Ramsanga chu I chang dawn ta lo a ang hle mai,” a ti lang lang a.

          ‘ U Ramsanga’, ‘A hmel a tilang chiang duh ngai lo’ an thusawi chu ka ngaihtuah a, Ka Ramsanga chungchang ngei a ni.

          “Nia, ka lo hmu thin alawm, U Ramsanga chu aw, a chhe lo si, ka van ui tak, engtik nge Kolkata lamah a rawn kal leh ang aw, rawn kal dun se, lo tibuai ila tha ang,” a tia, an nui hak hak a.

          “Awi awi awi, I tibuai ngam leh awm lo em mai, I star rei tawh tehreng nen, in innel ve tawh hnuah pawh a bulah I dang a awk vek zel kha,” tiin an fiam let bawk a, hmeichhe dang pawh a bulah chuan an lo buai vek tho anih dawn hi.

          “A rawn status nu te kha a duh hle aniang, a hmel pawh a tihlan phal loh danah, an inkai lai kut chauh te a hmang a, hla thu te chu rawn bei un ve nasa thei tawp, a inhmeh lo e,” a rawn ti leh a. Ka sa pup pup tawh a. “Hei enteh, tuna a thu rawn ziah te hi, enteh, a over zia hi,

          ‘I found a woman, stronger than anyone I know,

          She shares my dreams, I hope that someday I’ll share her home’  a tih leh chhak tawh hi, kan va chang lo nasa ta ve,” an tia, an nui har har hlawm a. An thu chhiar chhuah chu ka ngaihtuah vang avang a, ka sa pup pup mai.

 

House ka let leh chuan ka inbual zung zung a, khumah ka mu ar ar a, ka tawngtai a. U Thantea kha ka hmu thei bawk si lo a, rilru a nuam lo duh ve reng mai. Chutih laiin kha phone call ka lo lak khanglang khan ka rilru a tibuai hle bawk a, chumi piaha ka hnunga mizo nula ho titi khan ka boruak a chawk buai hle bawk. Ka buai nuai nuai a ni ber. Khumah chuan ka mu zangthal a, inchung lam ka en reng a, U Thantea hian ngaihzawng min lo neih san reng em maw ni le, tak tak ni ta se, engtinnge ka awm ang? Thinrim thei dinhmunah ka ding em le, Ramsanga kha ka lenpui ve tho a tih te ka ngaihtuah a.

 

Kum 10 kan inneih tawh kha, nupa nun kan hmang khat hle a, nau ka pai theih loh hnu phei chuan kan hmang khat leh zual a, ka ngaihtuah chhuak thut, tun kum 3 chhung hi, kan hmang ngai lo, a bul hnaia ka mut pawn min hlat hrut thin anih kha, in entir ka rawt a, a duh lo nasa mai bawk sia. Ehe, kum thum kal ta atang khan a lo rinawm lo tawh em ni le? Khawhar em em khan kan nupa hlim lo kha ka tuar hram hram a, rinhlelhna ka nei ngai hek lo, keimah zawk ka zei loh vangah ka ngai a theihtawp ka chhuah a, mahse,a lo rinawm loh vang zawk em ni le. 

Kan kawngkhar chu a rawn inkik dat dat a, ka va hawn chuan U Mavala a lo ni a. Vawiin lam chanchinte kan inhrilh tawn a. Kan titi fe hnu chuan, "Zodin, in nupa inkar hi enge a an?" a rawn ti thut a.

Ka en let ha a, "Engti zawngin maw," ka ti a.

"A tha em? Ka ngaihtuah che a ni, nizana chaw einaa ka sawi kha ka ti tak tak a nia, i neih rei theih hi ka ring ngai lo, ka thianpa mizia hi kei tluka hria an awm lo ang," a rawn ti chhuak a. Ka ngawi reng a

"Zodin, harsatna in nei em?" a rawn ti leh a, "Ka zawhna chhan che chu maw, in nupa ka hmuh che u hian inpawhna ka hmu ngai lo, chuan, chu aia min ti buai leh tu chu maw, tun hnai hian Thantea bialnu hlui in a chanchin hre duhin vawi thum ngawt min rawn call tawh bawk,ngaihzawng a neih san che em ni?" a rawn ti a, ka rilru buai tawh sa chu a rawn chawk buai zo vek.

"U Maval, min ti a zo vek dawn, U Thantea nen kan inneih khan kei aiin a upa lutuk a, inkawm hlim bawrh bawrh kan nei khat viau a, mahse,kan inngeih ve thawkhat tho a. Kum a vei a, nau ka pai theih miah lo takah khan kan inkawm tlem tial tial a,theihtawp ka chhuah chung pawn kan in pawh lo tial tial a ni ber. Chuan tun kum 3 chhung phei hi chu roommate satliah kan ni e.Hmeichhe lakah chuan rinhlelh ngaihna pawh ka hre ngai lo hrim hrim a. Mahse, heti em em a inpawh lohna nun hi hrehawm ka ti tak zet a, ka khua a har thin lutuk, tih ngaihna ka hre lo tak zet a ni," ka ti a.

"Anih leh a tun hma nun te i hria em? In inneih khan phaia ka awm tawh hnu a ni sia, in kawmna hun pawh kan nei ngai si lo a, amah hi i hrechiang em?" min ti leh a.

 "Kum khat chuang min rim a, mi lehkha thiam, mi in zir peih tak a ni tih ka hria a, kan inneih hnuah chuan sum enkawl thiam, mi fimkhur tak a ni tih ka hre leh a, ìnnghahna tlak tak niin ka hria, lehkhabu chhiar leh inzir belh bak hi tuina a neih ve pawh ka hre lo," ka ti hap a.

"Zodin, thiantha i nihna angin tunah hian thil hrilh duh che ka nei. Ka thianpa hi pa maksak deuh a nia, hei chen i nei thei hi a hmasa in lawmthu ka hrilh duh che," a ti a, a ngawi leh vang vang a.

"High school atangin kan inkawm a, ngaihzawng a nei ngai lo. Amah hi mi in open lo lutuk, thian tha te hnenah pawh engmah chanchin chhia a tha thlen ngai lo a ni a. A pu boral lai pawn hostela kan awm ho lai a nia, engmah kan hre lo, chutiang vel chu a ni. Tin, pawn lama lan mawi duh mi ti ila, ka sawi sual lo ang. Apa hi peon in school pakhatah a thawk a, MA  kan zir thleng khan zirtirtu emaw ka ti. Chuan,MA kan zir zo a, NET a hmu a, lecture hna a hmu leh a. Lecture hna a chelh tir hian ngaihzawng a nei ve a,chu pawh tuman kan hre leh chuang lo. Kei chu Aizawla ka la awm lai a nia, zantin a chhuak thin a, ka ringhlel a,ka zui ru a,a ngaihzawng chu nuthlawi, zu zuar fanu lehnghal a lo nih chu. Tuman an hre lo, a hmeichhia pawh a control hneh a, an chhungte ho bakin tuman an hre chuang lo. Ka hriatchhuah hnu  chuan a roomah ka len chilh a, engkim ka hriat thu ka hrilh a, nupui nei rual kan nih tawh thu te, a duh ang apiang chu tu pawh an tha ka tih thu te ka hrilh a. Chuta min chhanna chu, ka hmangaih lutuk,mahse, nupui atan chuan ka hmai a tibal lutuk ang, ka ngaizawng ti pawh hi min an hria ang tih ka hlau a ni, a lo ti daih a nih chu. Kan inhau zui hrep a,a zah pui leh tur si chu kawp tawh lo turin ka ti a. Ka thianpa mizia kha mak ka ti tak zet a, a ngaihzawng a hmangaih ngei a zahpui kha ka hrethiam thei ngai lo ang." Mak ka ti lutuk a, ka ka ho ringawt. 

 "Chuan kum 2 hnuah nupui a neih tur thu leh thian atan min hman duh thu min rawn hrilh a, ka rawn haw chho a, kan rawn rim dun zan che khan a neih duh chhan awm ang che ka hrethiam nghal a. Inchhungkua mi pangngai chunglam ni khawp a sumdawnna lama tluang in ni a, chuan,i hmel kha a tha em em a, i la tha reng bawk a nia," a rawn ti tel zeuh a. "Tichuan,amah ti hmelmawi thei tu atana duhawm ber kha i ni tlat a ni. I tan khan ka hlauthawng em em a. Kawm fal che kha ka duh a, kan biak vel che khan kum 1 chuang in lo inkawm ve tawh reng tih te ka hria a, anih chuan inngaizawng pangngai tak in nih ka ring ta a, ka lawmpui ta hle a," a rawn ti dap dap a.

"Kum chanve aia rei lo inkawp emaw, nu leh pa sawi rem chawp ni ulang chuan khami hun lai khan heng hi ka hrilh ang che. Kan hna lam vangin kan inhmu khat hle a, kan inhmuh apiang hian i khua hi a har hmel ka ti thin a, mahse, kawm falna hun che hi ka nei ngai lo a," a ti zawm zat a.

"Tun tuma min tibuai tu chu, hmana a bialnu ka tih khan vawi thum lai min lo bia hi, an lo la inbe reng thin em ni?tih hi ka rilruah a awm a ni. Tunah hian a fala ka hmuh theih lai che hian heng zawng zawng hi ka hrilh che a. Ka hlauhthawn ang zawng zawng hi a dik lo anih chuan a lawmawm a, a lo ni anih erawh chuan ka hrilh hriat loh avang a mi nun chhe tur hi ka hmu thei lo a ni," a rawn ti tawl mai a.

Ka ngawi reng a, ka mittui a rawn far fap fap a. "U Maval, ka zawhna ni reng fo, chhanna ka zawn chhuah theih loh chu tunah hian a chhanna ka hre ta chiah in ka hria,"ka ti a.

"U Thantea awm danah hian min hmangaih lo tih chu ka hria, mahse, enga tinge ka ngaizawng lo chung chung kha min rim tluk tluk a, nupuia min neihna chhan hi ka in hre lo tak zet a.

 "Mi mithmuha dinhmun zahawm tak a neih theih nan chauh min lo nei a nih hi. U Maval,min va hrilh harin, ka va lo a rei tak em! Ka nun hi a hrehawm tak zet a,mahse tumah ka hrilh ngam ngai lo a, then ka tum lahin a chhan tur tha tawk engmah sawi chhuah tur ka nei ngai si lo," ka ti chuai raih a. U Thantea phone lock chu ka hawng a, "hei hi a bialnu number chu a ni em?" Tiin phone chu ka pe a. A phone nen chuan a en mil a, a nih thu in min chhang ta a.

"Zodin, an la inngaizawng ngei em tih pawh ka hre chuang lo a, then rawh pawh ka ti lo che. Ka thianpa a nia, tuna natna khuma a mut lai phei chuan kalsan turin ka duh lo bur che. Mahse, inngaihtuah tha tur chuan ka duh che a ni" a ti ta a.