There She Goes - Chapter 9

 

Tlanna tur bik pawh hre lovin kawngpuiah ka inkhalh chhuak tawp a. Thinrimna, huatna leh tlawmna te, chhe tinreng hi ka thinlungah a rawn lut a. Khang hun zawng zawngah khan min lo duh chhin ngai lo a, mahse,a hming tih that nan, mi zinga a hmel mawi nan chiah min lo duh a ni. Tlawm ka inti vawng vawng a, ka that lai hun zawng zawng ama tana rawng ka lo bawl thinna te kha ka ui tak zet. Ti khan nupui tha ber nih tumin awmze nei lohah theihtawp ka lo chhuah thin a. Lalpa, eng thil nge ka tihsual a he tan inah hian min khung le?!!!

Engmah  ngaihtuahna mumal ka nei thei loa, hmalak zel dan tur pawh ka ngaihtuah chhuak thei lo. Kei leh ka chhungte heti taka min lo bum a, min lo phatsan thin hi na ka ti em em ringawt mai a ni.

Ram reh chin ka thleng tih ka hriat chuan motor chu ka tiding a. Engtia awm zel tur nge tih ngaihtuahin ka thu ngawi vang vang a, mahse engmah ka rilru-ah a lut thei lo. U Thantea zu ka pai chhuah chu tui pawh pawlh lovin ka in pap pap a, engmah ngaihtuah lovin awm thei ila ka duh ber.

Ka thu ngawi reng a, a chang changin motorin min rawn tlan pel leh zeuh thin tih loh chu thawm dang a awm lo.

Ka maimitchhing vang vang a, ka lu chu a hai deuh a, ka taksa chu a zawi hniang a, tha reng ka nei lo. Ka  chatthla zui ta a ni ngei a ang. Mangchhia hlirin min rawn bawh zui a. Chak deuhin motorin ka tlan a, ka taksa a zawi vek bawk si, brake rah ka tum pawn ka ke chuan a rap na thei miah lo a, ka lo tlan puat puat a,a tawpah chuan khamah ka tlan liam ta a, ka tla del del a, tunge mawni hian min rawn pawm a. Kawngpuiah chuan ka motor chu a lo awm leh reng tawh a, motor chhungah chuan min dah a, ka chalah min fawp a,"Engkim a tha leh vek mai ang" a ti a, a kal liam tur chu ka thlir vawng vawng a,a pian atang chuan Ramsanga ngei a ni. Ka ko vak vak a, a hre thei lo a, ka tap vak vak a,  ka in tap harh ta a.

"Ramsang, tinge ram rehah hian min kalsan?" ka ti sep sep a. Ka biangah mittui a rawn luang ngiai ngiai a, lunglenna sawi hleih theih loh hian min rawn chenchilh a. Motor kawngkhar chu ka hawng a, pawn lamah chuan ka chhuak ta a. Ka awmna lai vel chu ka hre mai thei lo a, ka hawi kual deuh a, Mizoram University kawngah ka awm tih ka hre thei ta a. Heti chen chena thui ka tlan tih pawh ka lo in hre lo.

Inah ka haw dawn nge, ka nu te in lamah ka kal dawn nge, ka thiante inah ka kal dawn tih ka inngaihtuah a. Awm dan tur ber pawh ka hre lo. U Thantea beih let dan tur pawh ka hre der lo. Zanin chu haw leh phawt ang, naktukah rilru fimin ka inngaihtuah ang a, thil tha zawk ka ngaihtuah chhuak mai ang.

Ka motor chu ka her a, in lam ka pan ta a. In ka luh chuan Maengin min lo nghak a, Maengi hi kan inneih tirh atanga kan awmpui a nia, A la naupang hle chungin ei in siam leh in tihfaiah chuan duhthusam a ni. A lakah ka in hawng ngai lo, ka titi pui vel ngai lo, mi chhawr te nena inkawm tlan hi ka duh ngai lo a, innel tawh hnu chuan thu in hrilh a har tawh thin. Hei tak hi Mizo in kan thiam lo fo, kan awmpui te, kan dawr nghak te kan ti tlangnel lutuk a, kan duh aiin an tlangnel a, kan ti thei lo leh a. Mahse, Maengi pawh ka lam tangah ka siam a ngai rih ang, a pu hian eng thang thang emaw a lo kam palh ang e.

"I pu in chaw a ei em?"

"Aw, ei e,"

"Khawngaihin chaw ei min lo siam ta che," ka ti a, ka ei chak lo viau nangin, dam ka mamawh a, U Thantea beih let na tur chakna ka mamawh dawn bawk.

Chaw ka ei kham chuan kan room lamah ka phei a. U Thantea chuan min lo melh run a, he ramhuai putar bulah hian ka riak lo ang. Tihdan kawng ka hriat hma chu a duh ang ngeiin A HMINGIN a nupui ka’n ni ang e.

Bathroomah ka intleuh fai a.mutkawr ka ha a, rizai sin tur ka la a, biak khat pawh be lovin mikhual room ka pan ta a. Damdawi ei tur a ngah ropui si a, a ei ang em aw tih ka ngaihtuah a, chaw eikhamah keiman ka pe thin a, ei ber tur pawh a hrehrang lo ngei ngei ang. Ka tho leh uaih a, ka inngaihtuah harh a, ei malek se ni mai alawm, duh leh a bialnu Malianin rawn pe rawh se, hrep tak chuan a tih pahin ka mu thla leh ta a.

Ka muhil thei der lo. Ka let ka let a. Dik tak chuan khang thlalak te avanga mualpho kha ka hlau therte lo, mahse, an makpa rangkachak in a thusawi hi ka nu ten an awih dawn em a, finfiahna tur thlalak a lo awm dawn bawk nen, ka nu leh pate keimah a vanga an zak tur te ka ngaihtuah in ni thei ngang in ka hre lo a. Chhuahsan dan tha zawk ka hriat hunah ka la chhuahsan ang chu. Chumi hma chu min lo tihhrehawm man damlai hremhmun kan chen dun hlak ang chu.

Ka leh ka leh hnu chuan ka lo muhil ve ta nge nge aniang, ka harh chuan zing dar 8 a lo ri tawh a, ka hmai ka phih sawk sawk a. Kan room lamah ka inthlak a, vawiin chu hna a kal lovin ka room tur ka siam ang chu. Mikhual room hi a tawk ving veng viau ang. Choka lamah ka phei a, Maengi chuan rawng a lo bawl zo tawh a.

"Ka pi, rawngbawl ka peih tawh a, U Thantea enge i siam dawn, ka lo buatsaih dawn em ni?" a rawn ti a.

"Tur soup" ka ti chhuak tep a ni. "Engmah a hran siam a ngai lo e," tih pahin tui chu ka inkhawlh khawlh a.

"Ka pi, ka lo sawi phak a awm lo nangin, in inti thinrim ami, in awmdan hi, U Thantea a la dam kawr si a, a damlo leh mai ang e," inthlahrung takin a rawn ti a.

"E, a tha tawh lutuk, ngaihtuah reng reng suh," ka ti liam puat a.

"Chaw ei siam rawh le, chaw ka lo ei ang" ka ti a.

Chaw ei min siam sak zung zung a. Nidangah chuan U Thantea ka nghak thin sia,a hrethiam lo deuh aniang, chaw ei min siam zawh chuan koh tumin kan room lam a pan ta a.

Buaina nei lo ang map hian ramhuai putar chu a rawn tho a. Ka bulah chuan dawhkan a rawn kil a. Kei aiin kum 12 laiin a upa a, kei mimawl hian he ramhuai bulah hian kum 10 zet hun ka lo hmang ral tawh lehnghal a, ka haw tak zet. Ka luak te a tichhuak deuhin ka hria. Maengi rawngbawl a tui tehlul nen, ka lem lui tawng tawng a.

Chaw ka ei kham chuan ka room thar lamah chuan ka in kalhhnan nghal hmak a. Kan dawr nghaktute ho ka call a, vawiin lam dawr ka kal theih loh tur thu te ka hrilh a. An hna tur zawng zawng ka hrilh nghal bawk a. Manager ka nei fuh a, an rinawm tak zetin ka hria, a hahdam thlak thin e.

U Thantea chhuah hun tur ka nghak a, nidanga a kal thin dan chuan dar 9.30 ah a chhuak thin a, a chhuah loh pawn a awm laiin ka ti lui ngat tho ang. Mikhual rooma almirah kan dah chu ka thawmhnaw dah nan ka tifai a. Maliani nen an in hmu lai hi zui ru ve ila a tha ang em aw tih te ka ngaihtuah thleng a. Chutiang ti tur khawpin ka tlawm lo e.

Neha-in honeymoon thlalak thenkhat a rawn status a, ka comment a, ka lawmpui dun khawp mai. Anni zawng an inngaizawng rei tawh a, thuruk pawh an nei lo ang. Mawl ka inti thar leh tak zet a. Khang hun lai khan ka nu khan U Thantea kha a be tha thin hle a, ka tana tha tur a ni tih min hrilh chamchi bawk a. Palai an lo kal hmasak ber zan khan ka pa kha ka roomah a lo kal a. "Bawihi, kan tir lui miah lo che a nia, nang chu fanu mal i ni a, a chhe ber dawnin i nu nen lo boral ta pawh ni ila, Thantea bulah hi chuan thla a muang e kan tih avang chauh a ni. Anihna takah chuan fanu mal i ni a, thuawih thei em em mai kha, ka ring che a, tu pawh nei la, i ngaihtuah awm lo ang tih hi ka ring tlat a ni. Chuvangin, kan thu i zah vang chauh chuan nei lo la, inngaihtuah tha ang che, i hlimna ka duh ber," a rawn ti a.

Kan vaia duhthlanna, kan vaia thutlukna kan siam a ni. Tuman min nawr lui lo a, ka nu erawh kha chuan a fak nasa ve thin khawp mai. Mahse, hnial tlat ta ila, min tihluih chuang ka ring lo. Tunah hian kir leh ni la, min lo pawm nasa dawn lutuk, U Thantea thlalak leh thu phuahchawp kual vel tur ber hian ka rilru a tibuai a, ka nu leh pa rilru tina tu ka ni duh lo a ni. Thil tha a lo chhuak mai ang chu, chumi hma chu a sa lai district hi chen phawt teh ang.

Dar 10 a rik chuan kawngkhar ka hawng a, U Thantea pawh a lo chhuak fel tawh a. Amaha engmah ti thiam lo khan khum siam te chu a hlat lutuk, kan khum chu a lo hnawk niaih a, a inthlakna te chu a lo let kual rim rem a. Nidangah chuan a hak tur ka tihfel sak vek zel a, amaha a buai ve nuap nuap tur chu ka khawngaih deuh reuh. Zodinpui khang mai maiah i rilru tinem suh ka inti a. Hmeichhia kan nem hma dan leh lutuk hi chuh! Ka tihtur ho ka tih zawm leh ta a. Thlasik thawmhnaw ho bik chu ka thiar lut a, chuan ka dressing tablea ka mamawh zual ho ka la bawk a. Ka tlereuh bawm chu ka en vang vang a, ka thi dahthat te kha ka kiangah lo a awm thiang hauh lo, ka la tel bawk a. Bathroomah ka lut a, nitina ka hman thin ho ka la fel a.

Ka che vel chu Maengi chuan min en reng a.mak a ti hle ni tur a ni, min puih ngaihna pawh a hre lo. "Khatia ding zum reng lo khan rawn kal la, min rawn rem pui rawh," ka ti a.

"Ka pi, ka va hrethiam lo ve," a rawn ti a.

"I hrethiam ve chho mai ang," ka ti let hmak a.

"Thinrim laia hetianga tih rum rum te chu a tha dawn em ni?" a rawn ti leh a.

"E, thangkhat lian zet ka thin a rim tawh," ka ti a. Ka chhanna chuan a nuih a ti za tlat a, a nui chhuak ta hawk hawk a nih chu.

"Ka pi, mawl ka lo ti thei lutuk che a,hetiang upa si, tawngmawh si pasala i nei hi, mahse, thangkhat lian zet thinrimna i lo pai tawh chuan ka khawngaih leh deuh zawk che," a rawn ti a.

"Pi, i hmeltha sia, tlangval chhe lo deuh pawn an la duh dawn lutuk che nia, tian awm hrang lo hian haw zawk la, chuan bungrua i rawn lak hunah min hruai ve la," te a la rawn ti tak deuh deuh.

"I pu hi kan hrem ve hlak ang a, i lo khawngaih a, a lam i lo tan vaih chuan ka hruai dawn miah lo che a nia," ka ti a, a lu a bu nghat a.

Thawmhnaw chu kan thlep fel a, tlema ka iai deuh tawh ho chu Maengi chu ka pe nghal a, a lawm thin teh a nia.

Maengi ka duhna em em chu thil awmzia hriat a tum lohna hi a ni. Ka hrilh chinah hian a lungawi em em a, engmah pawh min hrilh bik lo a. Leng khua an nia, an la harsa ve a.Krismas a haw dawna a chhungte thil tur nen ka haw tir te hian a lawm thiam thei thin khawp lehnghal a. A bula awm hi a nuam thin, se se hi a awm ve lo a. Room kan singsak zawh chuan tlai dar 4 a lo ri tawh a. Ramhuaia pawh a lo haw tep ang.

U Thantea  a lo haw chuan roomah a lut tlang a, ka bungrua ho lo awm lo duak pawh a hmu tawh ngei ang. Room atanga a lo chhuah chuan engmah a sawi chuang lova, ka ngaih a tha chiah tawh lo deuh a. Ka thiltih lai ka tih zui san mawlh mawlh a.

Zanriah kil lai chuan tumah kan tawng lo a, kan boruak chu a tang khat tlat a. Chaw chu tui tih hmel zetin ka ei lui tlat a.

“Zodinpui” zawi te in a rawn ti a, ka hre lo der tlat a, ka tum dan chuan ngawi renga chaw ei puar a, room-a inkalhhnan leh tlat ka tum a. Dawhkan chu a rawn chum bur a, “Zodinpui, ka biak che chu i hria em?” a rawn ti tuarh a, ka phu nasa lutuk, ka hlau lutuk a, ka khur thei hial. Rei tak in pawh lo takin innei mah ila, aw ka vin kher kher hi chu ka lakah a la hmang ngai lo.

“Enge” ka ti bul hmak a, ka hlau lo der tlat a.

“I thawmhnaw te i la chhuak vel a, hei hi hre rawh, nupa kan ni a, khum khatah kan mu tur a ni. Ka kut hmawr pawn ka dek lo ang che. Mahse, chaw ei khamah i thawmhnaw saw rawn suan lut vek ang che,” a ti a.

“Min hmangaih pawh ni hlei lo, ka kianga riah chu enge i chak viau a,” ka ti let a.

“Ka chak lo, ka chak hlawl lo, a them pawn kan nupa chungchang a buai tih min an hre tur a ni lo. I room a hran avanga he inchhung a mi ni lovin kan chanchin an hriat vaih chuan i chan a chau viau ang,” a rawn ti leh hrawk a.

Maengi lam a hawi a “Lalengmawi, nang pawn chu chu hria ang che, he inchhung boruak hian kan kawngkhar a pel tur a ni lo,” a rawn ti leh a. Ka tah a chhuak tak zet.

Muangchangin ka ding a, “A tha alawm, I duh ang chuan engkimah pawn lamah chuan i nun hi a bu ang thlapin ka lan tir ang. Mahse, ka nunah hian rawn in rawlh buai reng reng suh ang che. Khang i spy ho, ka chetla vel lo enthla ringawt tura i rawih te khan ka thla hi vawi khat pawh an rawn la leh a nih chuan he in hi ka chhuahsan ang a, nupui sawisa thintu, a ruka ngaihzawng nei, Uire pa Lalthantluanga i ni ang. Khang min tihthaihna zawng zawng kha ka hlau emaw i ti ang e, nang angin hmingchhiat ka hlau hleinem. Ka hmeichhiat pui Maliani chunga i nunrawnna zawng zawngte avanga heng thil hi la au chhuah pui lo mai mai ka ni. He inah hian ka awm ang a, ka duh duh ka ti ang a, i hming ka  ti chhia a nih ngawt loh chuan rawn in rawlh hlek suh ang che,” ka ti a, room lam ka pan ta a. Kum 10 chuang min lo tihder tawh a, ka rulh let ve nan tal ka chhuahsan hma chu a derin nung ve ila ni mai alawm.

Maengi nen kan insuan let leh a. Kan tihfel chuan engmah pawh sawi lovin khum sirah chuan ka mu bal a. Ka ngawi reng a, ka be chak lo a. Mihring hian chhungkaw tha kan van mamawh tak em aw! Nu leh pa kara seilian ni se zawng, retheihna karah pawh seilian se heti thlawt a rilru piangsual hi a ni bik tawp lo ang. A lehlama ka ngaihtuah chuan a rilru piansual lutukna chu ka khawngaih letling viau ta zawk a. Fa kan lo nei lo te chu ka lawm letling ta zawk hial, hetiang taka rilru piangsual pu a fa kan enkawl zawngin, kan fa thiltih sual thup tumin kan nun kan hmang ral mai awm sia, khawi lamah mah fa tha kan nei thei lo ang e.

Chak ka ngai tak zet a ni, rei lo te chu ka la awmpui ang. Ka thinlung leh ka thlarau, ka taksa zawng zawngte a chak tawk hunah ka la chhuahsan ang chu.

Hna lamah theihtawp ka chhuah a, U Thantea ka hmu chak lo bawk a, zingah ka tho a, wholesale dawr lamah ka kal nghal a. Dawrah chaw ka ei a, chaw eikhamah Zarkawt dawr lamah kalin nileng in ka va awm a. Mut dawnin ka haw thin. Vanneih thlak ka ti dawn nge kan buai leh Krismas thla a innang hlauh a, dawr in hawn rei hun a lo ni nen, a harsa rih lo khawp mai.

Ramsanga erawh ka thinlungah a cham reng a, enge a tih thin ang le? Krismas-ah Aizawlah a lo haw ve ang em? Tih te ka ngaihtuah fo thin. Mahse, thil awmze lo mai niin ka hria a, ka ngaihtuah thui duh ngai lo.

December thla chanve a ni tawh a, dawr kan lun thin hle, naupang dawr kan siam tel ve avangin Krismas kawr tur zawngin mi an rawn lenglut tan a, dawr lehlamah lah incheina leh thlan cheina nen, thawk kan la hman meuh thin lo a, ka tan erawh kan Ramhuaia kal bosanna chance a ni a, ka taksa hah mahse, hah ka inti phal lo.

Tukin chu enge maw ka hriat ni, thawh ka hai ve teh tlat a, ka thawh chuan zing dar 8 a lo pel vung tawh a. Krismas thlen nan kar khat leh ni tlem te chauh a awm tawh a, dawrah in duhthawh a nat teh lul nen chuan a. Khua a vawt vur mai a, U Thantea pawh a lo tho daih tawh lehnghal a. Manager ka phone nghal a. Maengi pawhin rawng a lo bawl zo tawh a. Chaw ka ei nghal mawlh mawlh a, ka insiam zui ta a.

A vawt deuh bawk a, high neck ka ha a, overcoat ka ha leh a, Jean ha in boot ka bun khap a. Ka inchei zawh chuan ka in en vang vang a, mut ka kham vang nge ni dang zawng aiin ka vun chu ka hmu nung a. Ka nghawng leh awm bawr chu a ruak deuh tlat hian ka hria a, shawl te ka la a, ka bat zet a, ka dahthla a, nui var var chung chuan ka tlereuh bawm chu ka hawng a, Ramsanga thi min pek kha ka phawrh chhuak a, ka awrh a, a inrem thlap. Ka in en vang vang a, ka bengah chuan min awrh tir laia a thusawi te kha rawn ri nawn awn awn a.

Awrh reng rawh ka ti miah lo a nia, i thinlungin tul atih hunah i awrh thin dawn nia,”

Min awrh tir zawha min fawhna lai te kha ka ngaihtuah chhuak a, chulaiah tak chuan perfume ka kap a, a rim chu ka hip lut vang vang a, Ramsanga mitmeng thuk tak mai kha ka ngaihtuah a, ka nui sak a. Room chu ka chhuah san ta a.

Wholesale dawr pawh tlawh lovin Zarkawt dawr lamah ka tlang a, ka office te fel rin ran te-ah chuan ka lut nghal a. Bungraw lo thleng thar a awm nual bawk a, chung ho chu computer lamah ka enter nghal zung zung a. Inventory software ka hmang tha bawk a, ka dawr nghakte pawn engmah an chhep relh ngam lo a. Stock ho ka tihfel zawh chuan naupang dawr lamah chuan ka chhuak phei a, bungraw thleng thar ho a hralh chhuah theih thu ka hrilh nghal a, ka rem chhuah pui vek hnuah chuan office-ah bawk ka let leh a. Coffee tui takin ka insiam a, ka thu hahchawl ta rih a.

Thut muan pah chuan interior dawr lam CCTV chu ka en reng a, dawr chhunga rawn lut chuan ka thin a ti phu nghal dup dup a, chet ngaihna pawh ka hre lo. Ka thlir reng a, ka thi awrh lai chu ka khawih neuh neuh a. Ka va pawh mai ngam lo a, ka thlir reng ringawt, tho chhuak thei lo turin ka tha neih chhun zawng zawng te chu an thlawk bo ta vek pawh a ni zawk pawh a ni maithei.

Ka thlir reng lai chuan kan hnathawk tlangval pakhat chuan, “Ka pi, kan customer hian i thianpa a ni a in tia, hmuh che a duh a, lo luh tir i phal em? Ramsanga a in ti,” a rawn ti a. Ka lu ka lo bu nghat a. Awm ngaihna pawh ka hre lo, computer chu ka lo khawih der kual vel a.

Ka office a rawn luh rual chuan ka office chu a khat nghal mup maiin ka hria. A rim pa tak chu a ka hip lut vang vang a, min uapna boruak tang tak mai, hahdamthlak zet bawk siah chuan ka lai chhe vek a ni mai.

“CCTV-a min thlir reng lo khan min rawn pawh vat ka lo beisei a,” a rawn ti a, a aw pa leh mawi lutuk, a hmel ka hmuh hma atanga ka beng verh zartu ngei mai chuan ka lungphu chu a tirang nghal zawih zawih a. Chhan mai dan tur pawh ka hre lo.

“Lo thu la, coffee ka lo in mek a, ka siam ve ang che aw,” ka ti a. A ding run a, ka thi awrh chu a en a, a nui suk a, a hmelah chuan ka chungah a lungawi hmel hliah hliah bawk.

“Min han siam la, tunge siam tui zawk lo enchhin ang hmiang,” a rawn ti a. Coffee chu ka siam zui nghal a, no chu ka chawk rak rak a. Ka che tha hleithei lo, ka lai vek. Ka inrin loh lai tak chuan ka hnung lamah min rawn kuah a, “Tal miah suh aw, rei lo te chiah, Zodinpui, ka ngai tawh lutuk che,” a rawn ti chhuak hrawk a. Amah chu ka ngheng a, tha reng reng ka nei tawh lo.

Ka harh chhuak vat a, “Kalsawn rawh le, naupang ho an rawn inluh chhawk ve chhen a nia, thil tul lo an hmu palh ang e,” ka ti a, a  pen  sawn a, mahse, a ding hla duh lo hle, nuam ka ti viau bawk.

“Kha le, Coffee chu. Engtikin nge i lo hawn a,” ka tih zawm zat a.

“Niminah, lawk aw,” tih pahin sofa-ah chuan a thu thla a, a phone rawn ring chu a pick up a.

“Duati, in awmna mek dawr dawt chiah kha Zodini dawr a nia, rawn lut ve ru, a chhungah a officeah ka awm e,” a ti zui a. Phone dah that pahin, “Tikhan i awm a nuam deuh ang chu, inthlahdul tawh rawh le,” a ti a. Duati te pawh an rawn lut zui a, naute pawh thlahnih a lo tling ve der tawh a, a hmeltha reuh khawp mai. Ka pawm sak a, min en kiau reuh a, naute pa chu a hna thil avangin Kolkata lamah a la awm a, Krismas hmang turin a lo haw dawn a nih hmel.

Duati chuan min hrethiam tak hian, “U Zodin, in naupang thawmhnaw ho saw ka en lawk dawn, lo in kawm rawh u, naute nena bazaar a buaithlak, lo pawm nghe nghe teh,” tih pahin min chhuahsan a.

“Krismas i hmang tlang dawn em?” ka tichhuak a.

“Ka hre lo le, ka bula i hman dawn te chuan,” a rawn ti a.

“I sual thiam ve sia aw,” ka ti hap a. A lam ka a va hawi phei chuan min lo en reng a, a mitmeng ringawt pawhin keimaha danglamna a thlen theih dan chu a la  ngai reng mai pawh a ni lova, a hma aiin a nasa zawk hial in ka hria.

“Krismas dawn hian ka nu thlan chei turin ka lo haw thin a, i dawr a ni tih ka hre miah lo, collection i nei tha zek a. ZD tih lai hian ka mit a la tlat a, hnathawkte kha ka zawt chiang a, nangmah ngei i ni tih ka hre thei ta a,” a rawn ti a.

Delhi ah khan kan chanchin kan inhrilh tawn lo ve ve a, kan pahnihah khan kan duhtawk ve em em kha a nia. 

"Oh, i duhzawng a awm phawt chuan kumin chu ka lo tum ve ang chu," ka ti a.

A lu thing pahin, "A ngai love, mahse, min cheipui tu tur chu ka duh khawp mai,"

"Ngawi teh, i nu hma em a in lan tur chuan ka la qualify lo ni mai teh se," ka ti a. Min en ngur a, ka enlet ngam lo a,ka nau pawm chu ka chhaih ta daih a.

"Ka ti tak tak a nia,"a rawn ti bul bul a. Ka rilru a buai tak zet. Chutiang ang em chu ka ngam lo deuh a ni.

Duati pawh thawmhnaw thenkhat pawmin a rawn lut a. Naute chu hak tir chhin vel a.

"Naute hming hi ka hre miah lo a nia," ka ti a.

"Jason-a anih hi," Duati chuan a rawn ti a. A ngo reuh bawk sia, thawmhnaw a inthawlh chhin ho chu a inhmeh theih reuh khawp mai.

"Duati, i duh ber kha thlang la, ka lo present ang, a dang pawh i lei duh chuan lei tho la, Jason-a chu ka tan naute special a nia, Krismas present ka pek ngei ngei a ngai," ka ti a.

"Naa, U Zodin, a ngai kher lo asin," a rawn ti ngial a, mahse, ka ti tak tak tih a hria aniang, min hnial zawm duh ta lo. Kawr pakhat chu a thlang a, a lak tur dang ho chu billing ti turin dawr lamah chuan kan chhuak ta a.

Duati nen a thawmhnaw lei ho kan tih fel lai chuan Ramsanga pawn a nu thlan cheina chu a lo leikhawm ve a, a duh ang zawng ngei a lei theih nan ka va inrawlh duh lem lo a. An haw dawn chuan motor thleng ka thlah a. Ramsanga chuan motora a luh hma chuan, "Naktuk chu lo inring ang che, lunch zawhah dar 2 velah ka rawn lam dawn che a nia, no excuse," a rawn ti a, ka hnial thei lo a, ka dar ka kan ak a. An tlan liam chu ka thlir zui vang vang a.

Dawr chhung ka va luh leh chuan kan dawr nghak chhawr ho chuan Ramsanga chhe lo an tih zia leh a nupui vanneih zia an lo sawi a, an lo ti ti mam mam a, Duati chu a nupui emaw an ti a ni ngei ang. Ka nui vur vur a, office lamah ka lut leh ta a.

Zingah chuan nidang ang bawkin zing karah ka chhuak leh a, U Thantea nen chuan kan inbe ngai mang mang lo, a duhthlanna a lawm le, ka ngaihsakna tur a awm lo. Vawiinah Ramsanga nu thlan cheinaah kal pui ka tum si a, sneaker ka buna, hoodie dum ha in Jeans ka ha mai bawk a. Tlai lamah a vawh takin tiin ka Jacket fual lian zet chu ka keng chhuak tel bawk a. Ka chhuah dawn chuan ka inngaihtuah nawn leh a, roomah chuan lut leh in Delhia ka zin tuma Ramsanga tana necktie ka lei kha ka la chhuak a, ka bagah ka thun fel ta thak a.

Krismas bazar lai a ni nen, wholesale dawrah ngat phei chuan thawk hi kan la hman lo. Mizo te pawh ei kan lo duh tui in ei siam te kan lo thiam ve tawh si a. A hahthlak ve map map thin khawp mai. Zing chaw ka ei zo chu Zarkawt lam panin ka inkhalh chhuak lehnghal a. Dawr pawh an lo buai veleh tan tawh viau a, hah thin viau mah ila, ramhuai putara bula awm ai chuan nuam ka ti hrim hrim. Nizan atangin vawiin chhun dar 2 hi ka nghak tawh, ka helhhawlh a ni ber ang chu. Dawr ka thlen pawn ka nula chhawr te ho chuan vawiin chu ka hmel a nun thu min lo hrilh sap sap a. 

Thil dang ngaihtuah hman lovin kan buai a ni ber, a changin naupang tap kan thlem a. Nute hi chuan an fate hi lo bazarpui lo thin se ka ti ngawt mai, a bikin thil ngen chi ho phei hi chu. An nuten a to an tih deuh an ngen phei chuan a zuartu tan pek ngawt a har thin bawk si, a nuam lo tlang vel vek hi ni ber thin. Dar 1 ah thingpui kan in hman hram a, dawrah lah hian thingpui no dawm chiah hian customer hi an lo kal duh zek lehnghal a. Thingpui pawh kan in in chhawk zak zak a. Ka sana chu ka en deuh chhen a, ka phi deuh cheng tawh a. Ka innuihzat bawk si.

Dar 2-a rik chuan kan dawr kawtah chuan Ramsanga motor chu a rawn ding zal zal a. Keipawh ka kut te ka sil fai a, Ramsanga rawn chhuah hmain ka bag nen a car chhungah chuan ka lut ta thak a, min lo nuih suk a, ka kim leh vek tawh.

U Thantea'n min rawn zui ruk ka ring deuh a, ka ring ngam chiah lo bawk, ka sawi thaih ve tho bawk a. Min lo zui ru pawh ni se pawi ka ti ther te lo bawk.

Ramsanga nu thlan chu kan thleng a, enkawl ngun tih a hriatin a lo hnum hlarh a. Ramsang chuan a thlan cheina lei ho chu a rawn phawrh a, kan pahnih chuan kan chei dun malh malh a. Kan chei zawh chuan a thlir vang vang a, ka mobile chu ka phawrh a, a nu thlan a thlir lai chu thla ka lak sak a. 

"Ka phalna la hmasa lo a thla i lak man i chawi ngei a ngai dawn a nih hi," a rawn ti thum hak a, ka lo nui tha a.

"Khawi tha deuhin ding rawh, thla ka lo lak ang che," ka ti a, a ngai lo e, tih nan a lu a thing mai a. A bulah chuan min pawt hnai a, ka kut a la a, a hum vang vang a. 

"Nu, hei hi anih hi ka hrilh che kha, i awm loh hnua ka tana hlu ber ka tih kha," a ti chhuak sap a, ka ngawi ngal a. Ka lai hle bawk, min rawn en chhuk run a, ka zam lutuk a, lehlam ka hawi a, ka bag chu ka hawng a, eng dang mah a sawi leh hma chuan, "Kha, Merry Christmas, tun bak kan in hmuh leh tawh loh takin," ka ti a, necktie chu ka pe a.

"Topic thlak thiam a che leh ta maw," tih pahin ka bawm pek chu a la.

"A mawi hle mai, ka lawm lutuk aw, Christmas present engmah ka lo ken ve bawk si lo che a," a rawn ti a.

"Nangmah hi a ni mai tih pahin a biangah ka piai a," a nui hak hak a. 

"Haw tawh ang hmiang" a rawn ti a, kan hmanraw ken te chu kan khungkhawm ta a.

Motor chhungah chuan, "Necktie kha, Delhi-ah khan ka lei a, ka pe ngam lo che a," ka ti a. Motor seat hnunga a dah chu a la chhuak a, 

"Min petu suih ngei kan awrh ang chu le, lo suih teh aw," a rawn ti a. Necktie bawm chu ka hawng a, ka suih nghal a. Motor chu a che reng reng lo a.

"Tinge, kan la chhuah lo a?" tih pahin ka hawi phei a, ka necktie suih lai chu min lo en reng a. 

"Hetiang hun hi kan nei leh khat tawh maithei a," tih pahin a rawn kun hnai a, min rawn fawp vang vang a. Kei pawhin ka chhang let a.

"Zodin, ka chanchin tur ka la hrechiang lo a, ka chanchin hrilh che in ka lo call ang che, lo pick up rawh aw," a rawn ti a, min vengthawng lutuk thin hi ka khawngaih thei lutuk.

"Awle, Krismas chu hmang ve la, Aizawlah. Hmang dun thei lo mah ila khawpui pakhatah kan hmang dun tih ka hriatna tal pawh hian min ti hahdam em em dawn asin," ka ti a, a rawn thaw hak a, ka kut chu a la a, a fawp a. "Ka lo tum ang, My Love" a rawn ti thum chhuk a, ka ip chawih a.