LIANSANGPUIA - 1

Tlai lam dar 5:30 a ni a, February thla tir a ni bawk a, khua a la vawt sur mai a, ni a tla tawh a, khua erawh a la eng thung a. Ka zirna chhunzawm turin Shillong lam ka pan dawn a, thawmhnaw ken belh vak ka ngai lo a, Air Bag lian lutuk lo leh handbag pakhat zawng thawmhnaw ka nei a. Zin kawnga bawr loh dan hram hi ka zawng ve thin hrim hrim a. 

Ka nu in tawngtainaa min thlah zawh chuan ka thianpa, ka bialpa ti ila a fiah zawk ang chu, Marema nen chuan Bike in Sumo counter lam panin kan in phur chhuak zui ta a.

Semester khat chiah ka hmabak tawh a, April velah kan exam ang a, Master degree ka nei tawh mai dawn a ni. Mahse, kal dawn apiang hian ka huphurh ngawih ngawih zel ringawt mai a ni. A chhan pawh eng dang vang ni lovin Marema vang vek hi a nia, a tel lova awm hi ka huphurh ngawih ngawih zel. Kan inzuina a rei ve tawh a, ka engkim hi a ni ber mai. 

A hnungah chuan ka thu ngawi reng a,a tel lova ka awm tur chu ka inngaihtuah a, ka biangah mittui a rawn luang ngiai ngiai a, a hnungzangah ka hmai ka thukru a. 

"Hey, Din" a rawn ti a.

Ka ngawi reng a.

"Hey, ti khan awm suh, tikhan awm loh tur ka tih vek tawh kha," a rawn ti leh a, ka tah chu a chhuak telh telh a. Ka thut hnaih a, ka kut pahnih chu a jacket ipte-ah ka zen lut a, ka mittui tla pawh chu hru lem lo in a hnungah chuan ka kun tlat a.  Rei lote hnu-ah chuan Bike chu a thi duk a, ka hawi chhuak a  kawngsirah kan lo ding fel reng tawh a.

"Din, chhuk lawk teh," a rawn ti a. Ka chhuk a, bike sirah chuan ka ding zui a. Marema pawh chu a rawn chhuk zui ve nghal a. A glove bun chu a phelh mawlh mawlh a, a jacket ipte-ah chuan a ak tha a, ka hma-ah tak chuan a rawn ding a.  

Ka biang a mittui la awm niaih chu a rawn tuai fai a, min pawt hnai a, min kuah ta vawng vawng a. A taksa lian zetah chuan ka bo vek maiin ka hria. Nghet tawkin ka kuah let ve a, a awmah ka bei a, engmah sawi tur pawh ka hre lo.

"Hetianga i awm te chuan engtinnge rilru nuamin ka awm ang, intipachang la, thla li chauh a ngai tawh a, hetiang hmel nen hi chuan min kalsan suh, ka ngaihtuah lutuk che ang a, ka buai vek mai ang," a rawn ti sup a.

"Nangmah vang vek, ka zir zawm tawh lo mai ang ka tih lai khan 'aw' ti ve mai la,.."

"A ti leh tan dawn, tikhan ti ziah suh ka tih kha. Hmeichhia chuan pasal neih hma in theih chen chen zir tur. Ka bulah i awm hunah chuan naute neih nghal ka duh ang a, nau nen engtin nge lehkha i zir ang, mawh, tikhan, a no zawngin thil sawi miah suh," a rawn ti a.

"Mahse, ka ngai che alawm," ka ti tiau a. A nui thum hak a, heng a nui thum deuh hak ri te hi alawm ka atchilh em em ni. 

"C'mon babe" tih pahin min kuah hnai sauh a. "Pachang takin awm rawh, exam zawh veleh i lo tlan haw nghal ang a, ka bulah i awm tawh ang," a rawn ti a.

"Exam hma in ka rawn zin ang i tih kha," ka ti let zawm zat a. 

"Engtinnge ka lo zin ngam ang, ka haw dawn hunah tiang hian i tap leh emaw a ni ang a, engtinnge lehkha i zir ang," tih pahin a nui hak hak a.

"I phakar"

"Phakar lo, ka ti tak tak, mahse, fel deuha i awm chuan ka rawn hruai ang che," 

"Tak tak?"

"Yes, promise" tih pahin ka chalah a rawn fawp a. Ka thaw halh a. Bike-ah chuan kan chuang a, Zarkawt lam panin kan tlan leh ta .

Zarkawt kawnah chuan mi an lo zi hut hut a. ka sumo chuanna tur counter bulah chuan kan ding a, sumo pawh tum dang ang lo takin a lo ding vang  tawh a. Ka bungrua chu kan hlang fel nghal a. Tlar hma ber tukverh bul ka cut a, seat a la ruah nual avang chuan ka thu lut duh nghal lem lo a. Marema chuan ka kutah min rawn kai a, a hum vang vang a. Ka hawi chho a, kan mit leh mit chu a intawk chiang hle a, ka kut chu a thlah a, min rawn kuah a, ka banah chuan hmer vang vang a, ka chalah chuan  rawn fawp zeuh a. Ka mittui ka dang zo leh pek lo. 

Pi Kimi dawr lamah chuan min kai phei a, ei tur a thlang mawlh mawlh a, Rambo polythene khat thur chu a thlang a, ka en reng ringawt a. 

"Kha le, kalkawnga i ei tur" tih pahin min rawn pe a. A tam lutuk a, ka nui hak hak a.

"Enge, nuihzatthlak a awm em ni?" a rawn ti a.

"High School naupang hostela lut tur ka ang em a," ka ti zawm zat a, a nui ve ruh ruh a. Sumo lam pan chuan kan phei leh ta a.

Counter a thu chuan kal tur pahnihin an thulh leh thu leh kan inpeih chuan kan chhuah theih tawh thu a lo sawi lang lang a. Marema chuan ka kut a hum leh vang vang a, a la kang a, fawh zeuh pahin, "Ka ngai thei ngawt ang che," a rawn ti leh a.

Kan piah chiah a tlangval sang lampang, Gamchha bat chuan, "Le, lut ila, kal tawh dawn ang u hmiang," a rawn ti a. Ka seat tur lam chu ka pan zui ve ta a. Tlar hma ber tukverh bul hi ka chuh ziah a, mi chuan driver hnung hi an chuh thin nangin, kei chuan driver muthlu tur ven pah theihna, tukverh bul ni bawk hi ka duh ber mai.

Ka thut fel hnu chuan ka bula thu tur chu zin thulh ber a ni tih chu ka hre zui nghal a, pawi tawp lo, ka thawl ting a ni mai. Pawn lam ka hawi a, Marema chuan min lo melh run a, motor a in start ri vut vut a, traffic tawt tak karah chuan kan inhnawh lut zui ve ta a.

Lunglenna nasa lutuk hian min rawn tuam nghal hlup hlup a, ka mittui a rawn luang ngiai ngiai a, driver chuan min hmu ang tih ka hlau a, pawn lam ka hawi ngat ngat a, ka insut ri leh zauh thin thung.

Durtlang kawng lama kan tlan chhoh lai chuan, "Hey, thlamuang tak khan awm rawh, saw, i bula ding pa khan min rawn zui char char a nia," a rawn ti a. Ka phu deuh zawk a. Driver lam chu ka va en a, a lo nui sung a, motor hma darthlalang chu a lo kawk zauh a, ka zak ru deuh chem chem a. Marema'n min la zui tih ka hriat chuan ka thla a muang deuh huai thung a.

Zak deuh chung chuan driver bul lamah chuan ka tawlh hret a, darthlalang chu ka melh zauh zauh a, Marema chu kan hnungah a lo tlan ve zel tih ka hmu thei a, a khat tawkin ka melh zauh zauh reng a. Ka awmdan chu ka hrethiam chiah lo, ka lawm bawk si, ka tah a chhuak tho bawk si.

Leitan kan thlen chuan min rawn tlan pel a, kan hmaah a tlan ta thung a, ka thlir reng a, in phur haw tir leh daih mai ka duh. Tawngtaina hmun kan thlen chuan a lo ding fel vang a. Driver chuan, "Zunram thiar duh kan awm em?" a ti dawn emaw tih nak laiin, "Zunchhuak deuh kan awm a," a rawn ti kher a, ka ngei ang reng khawp a, leichhuah zauh pahin ka chhuk thla nghal nawk nawk a.

Thingkung hnuaia Bike-a lo thu lamah chuan ka tlan phei nghal vang vang a. Midang pawh zunram thiarin an chhuk thla ve sap sap tih ka hre zui a. Marema chuan min lo pawt hnai vat a, ka kut chu a hmer vang vang a, "I thlen chin rawn sawi char char rawh aw," a ti sup a. Ka lu ka bu nghat nghat a, "Tluang deuhin in kal dawn nia," a ti zawm leh a, a thusawiah tahna tur a awm loh tehlul nen ka mittui a parawl leh nghal vek a. Tawng pawh ka tawng zawm tawh lo. "Lut rawh le, midang nghah bik nih loh tur," a rawn ti a. "Min rawn hruai ngei ngei ang che," ka ti tuau a. Nuih var var pahin a lu a bu nghat a. Sumo lam pan  chuan ka phei leh ta a.

Kan luh fel hnu chuan kan zinga pakhat chu a tawngtai a, a tawngtaina thu chham pawh engmah ka hre lo, shawl in ka inkhuh a, ka mittui ka hru a, ka no lutuk chu ka in ngei bawk. Midang ho an Amen rual thap rual chuan kan sumo pawh a inherh nung ve leh a, darthlalang atang chuan kan hnung lama Bike chu ka thlir reng a, kan lan theih chhung chu a che lo tih ka hmu.

Ngawi rengin ka thu char char a, kan tlan tluang viau a, ka mittui erawh ka dang zo meuh lo, ka insut leh hraih thin a, pawn lam ka thlir reng a. Ka hnung chiaha nu valai thiandun chu an tawng barh barh reng a, an fate dah tur an ni a, an kiangah chuan an fate chu ngawi rengin an thu thung a.

Driver chuan, "Thiani, tah hlum i tum em ni?" a rawn ti a, ka phu zawk a. Ka ngei hle bawk.

"Enge" ka ti let ram hmak a. "Kuhva kha min lo siam teh, seat hmaa thut hi thiam a ngai ve teh mai a ni a aw, ka muthlu tur te min lo veng la," a rawn ti duah a. Chutiang a an mutthluk hlau ven tuma seat hma ticket pawh cut ka ni reng a. Mahse, kan driver pa min rawn tihdan kher kher kha ka ngei lutuk a, ka titi pui vel chak lo khawp mai. 

Kuhva motor hmaa let ngat chu ka la a, ka siam sak mial mial a. Driver chu ka pe nghal a, a lo nui suk a. "Khati tur kha ni, tikhan tap tawh lo la, lo meng ve kar ang che. Kawnpui thlen hun phei chuan ka hlau deuh thin a nia," a la rawn ti zui a.

Ka phawk deuh hra a, "Thlahrang i hmu tawh ngai em ni?" ka ti let a.

"Phur ve zeuh zeuh e," a rawn ti let a. Ka chil ka lem khawlh a, ka duhzawng a ni miah lo. Huai leh rau lam hi chu hmuhchhin pawh ka chak aih lo a ni.

"Dawt sawi reng reng suh aw," ka ti a.

"Tap tap lo khan lo meng la a ni mai, pahnih tal kan men te chuan eng huai mah an rawn kal ngam lo ang, pakhat chauh hi chu min hlau vak lo," a rawn ti lung lung a, a nui sung a. Kan hnunga thu pa pakhat, sa tha lampang, "Bawihi chu, chutia i menpui theih dawn chuan ka lo muhil teh ang, ka chau riau mai, Kawnpui dai ang velah hi chuan pahnih tala men a tha ngai e," a rawn ti a, a nui huah huah a. Min bawl nge, min fiam nge pawh ka hrethiam chiah lo. Mahse, min bawl anih ringin fiamthuin ,"An rawn inlar vaih chuan a hnung lamah ka rawn thut tir ang," ka ti ve a, hlau lo ber awm zia zangin ka tawng ve a, ka chhungril lam chuan nuam a ti chiah lo thung.

Kan driver chuan hla hrang hrang a play a, tunlai mizo hla chhuak thar ho te a play a, ka hre ngai vak lo na in a hla thu, un em em si lo, awmze nei ril ve riau ho chu ka ngaihthlak pahin ka nui ralh ralh a. Music ri chuan min awi a, ka lo muhil siar siar a.

Ka dara min rawn sawi dat dat avang chuan ka harh zawk a, "Harh teh, kuhva min lo siam la, Kawnpui dai kan lut dawn a, keimah chiahin ka meng peih lo ka tih kha, midang an muhil vek a nia," a rawn ti a.

Ka tang nghal deuh hru a, ka hlau deuh tih erawh a hria ang tih ka hlau ru hle thung. Ka ham bai bai a,"Driver ka hriat zawng zawngah i la dawih ber," tih pahin kuhva chu ka siam sak a.

Ka kuta kuhva a rawn lak pah chuan, "Fel lutuk nu," a rawn ti a, kuhva chu a ka ah a hnawh lut nghal a, kei erawh ka lo ner nawng thung, a la nui ang tak huah huah a.

Ka biak chhunzawm lem loh avangin a ngawi ve mai bawk a. Kawnpui dai, kawng te leh kawi zetah chuab kan in khalh thla zel a. Nitina motor khalh an ni bawk a, a kawng a kawi tehlul nen awlsam hmel fe hian a herhkawi zung zung a, keia motor khalh zor hlawhchham best chuan ka ngaisang thei thin khawp mai driver ho hi.

Kan hma zawnah lungphun alang thei tihah chuan thil phe zeuh zeuh hi ka hmu a, ka tang nghal hru a, driver lamah chuan ka tawlhphei nghal dawrh a. Ani lah chu thil hmu ang pawn a awm ve bawk si lo. A rawn phe leh zeuh thin a, ka sa pup pup a. Kan tlan hnai zel aa, nu upa lam sam thur re ru mai hi ka va hmu a. 

"Saw, i hmu ve lo mi," ka ti khur nghal dur dur a.

"Ehe, tanpui an ngai aniang a," a rawn ti a.

"Ramhuai aniang ,ding suh ,ding suh,"ka ti tham chhal a.

"Ramhuai a ni ngawt lo ang, fiah ang, tanpui ngai an ni ang," a ti tlat a.

"Ding lo mai teh, ka hlau a nia,"

Engah mah ka thusawi pawh ngai lo chuan kawngsir lamah chuan a tlan a. Tihngaihna ka hre tawh lo, hma lam pawh chu ka en ngam chiah lo, nichina ka mi hmuh kha a ther bem bum lutuk a, ka ngaihtuah zawng pawn ka tim sung sung a. Ka sa pup pup a, ka mit ka hup a, "Ding suh," ka tih leh rualin a break a rap a, kan engine a thi ta duk a.