LIANSANGPUIA - 2

    Kawng sirah chuan nu upa lam, kawr fai lem lo tak ha, bawrchhawr tak chu a lo ding ran a. Hlauhthawnna hlir in ka la khat a. Kan phur ang a, kawng lakah a bo daih ang em tih te ka ngaihtuah a, nuam ka ti lo khawp mai. Kan han din takah chuan mi dang pawh chu an harh sap sap tih ka hre thei a, chu erawh chuan tlemin min ti thlamuang deuh.

 Pawn lam ami nu chuan a hnathawk laklawh lutukin khua a lo en loh thu te, khua in a thim hnan a, tumah a phar din theih loh thu te chu a sawi bawrh bawrh a, kan driver-a chuan chuang ve turin a hrilh a, a seat awl lai ber ka bul chu an kawhhmuh leh ta nghal a. Nuam hi ka ti lo ve khawp mai.

    A rawn thu a, motor an tlan tan leh chiah chuan driver chuan, "Ka pi, i intuai mam lo ve sia, hei kan bula nula hian thlahrang emaw a ti che a, din a phal lo chung chung kan rawn ding a nih kha," a ti lawng lawng a. Ka zak deuh bakah, ka ngei hle bawk a, ka va nghawk sawk a. 

    "E, a ni teh tak ang a, tumah kha ka phar ding thei lo a, hetiang lai daiah kher kher lehnghal, thlahrang emaw min ti hlawm a ni tak ang a, ngaihtuahna chang ka lo hre lo reng reng, a rawn ti a, kan nui ta dar dar a.

    E, naktuk velah chuan kawnpui daia thlahrang pitar hmu an awm nual dawn a nih hi," a la ti zui a, kan nui ta ham ham a. Khawchhung kan luh chuan an in pengah kan thlahrang phur pawh chu a chhuk tharh a, lawmthu a sawi mawlh mawlh bawk a. 

    Harsatna leh buaina awm em em lovin Shillong kan thleng a. Kan driver chu a tawng duh lawng lawng tih lovah chuan Sumo ka chuan tawhnaah chuan a la tlawmngai ber awm e, a motor khalhah chuan a nuamin kan thlen hnu pawhin min thlah kual vek a, keipawh NEHU Campus thleng min thlah thlap a. Ka bungrua kan thiar thlak fel hnu, hostel chhunga ka luh dawn chuan ring leng lawngin, "Tahbelhnu, tap tap lo khan tha deuhin lehkha zir rawh aw," a rawn ti lawng lawng a. Ka insiam chhiat khum nghek ringawt, a va han bengchheng ve chiang tak.

    Dan pangngaiin class pawh kan kal chhunzawm leh nghal a, khua a vawt urhsun em em reng bawk a. Shillong ka nin ve deuh na chu khaw vawh sa tawh mah nak laia ruah an sur tel thin hi a ni. Lunglen nen, khawvawh nen, lehkha zir ngai nen, a chang hi chuan in pack sawk sawk a, haw daih te ka duh a. Mahse, ngaihzawng te vanga zirna tih thuanawm chu ka mi ngaihsan loh ber te tih thin dan anih avangin ka puitlin leh lo mai thin zawk a ni.

    Marema nen pawh ka inbe pawp reng a, mobile phone te awm lo phei se la chu lehkhathawn ziak reng rengin ka buai reng mai awm asin. 

    Hun pawh a kal ve duak duak a, March thla kan chuangkai leh ta reng mai. April thla-ah kan exma ang a, ka haw vang vang tawh ang. Tlai khat chu ka thiannu ve ber mai LP-in min rawn call a. Message hi chuan kan inbe reng a, mahse, call tak hi chu kan in call khat tawp, ka ngaih a tha lo rum rum thei hial alawm.

"Hello"

"Thiannu, i dam maw?"

"Dam e, a call te a min lo call ve teh mial a, enge ni ta?"

"Eng ni lo ve, ka lo be mai mai che. A la vawt em?"

"A, vawt hran lem lo e, a zia awm tawh lutuk. Mahse, Aizawl lam atanga lo kal tan chuan a la vawt ngawt ang, lo zin i tum" ka tih lai chuan ka sawi zawh hma hmain min rawn pawtchat a.

"Enteh, Marema nen hian in la inbia em?" 

"Bia e, engatinge, tunah pawh hei in lo message reng alawm,"

"E, anih chuan ka hmu sual anih dawn chu," a ti niah niah a.

"Enge han sawi teh, ka beng i ti vir," ka sa deuh hut hut a.

"A, eng ni love, hmanniah a Bike-ah hmeichhe pakhat nen an inphur ka hmu in ka hria a, mahse, a bike ka hai aniang," a rawn ti buai niaih a. Ka lungphu hi a rawn rang dup dup ni berin ka hria, ka ngawi reng a.

"A, a bike a nih pawn a unaute a phur a niang, ka thiannu bialpa a ni sia, ka mit a lo kham hma mai mai aniang,"  rawn ti leh a.

"Khawi lai velah nge i hmuh, ka lo zawt ve hrim hrim ang"

"A ho mai mai, ka hmu sual aniang ka tih chu,"  a rawn ti leh a.

"A, zawh ve hrim hrim a tha lawm, lo sawi teh," ka tih tak ngawng ngawngah chuan Sikulpuikawnah an in phur a hmuh thu leh hmeichhia chu sam colour buang thang, cher sang lam deuh a nih thu te a rawn sawi a. LP-i thil rawn sawi dang pawh chu ka ngaihtuah zawm thei lo. Phatsan niin ka in hria a, engtin nge maw ni hian ka awm a, ka sawi thiam lo. Ka sa deuh pup pup a, ka tha a khur deuh der der bawk.

Phone kan dah rual chuan Marema chu ka call nghal a.

"Hello, Din"

"Tunge hmannia Sikulpuikawna i phur kha?" ka ti deuh nghal tawng a. Engmah sawi hmasa lovin rawn hre lo der vel na teh se, phone ka dah ang a, ka block chhunzawm nghal ang, kawp nih ka duh lo bur. Mahse, ka rin loh dan deuhin, "Nancy maw, Mission venga ka kal ni a ka phur chu Nancy, ngatinge, enge i awmzia," engmah pha buai miah lovin a rawn ti nghal a. Ven khatin ka veng deuh huai a.

"Tinge ka seatah nula dang i phur?" ka ti let ringawt a.

Lehlam ami chu a rawn nui thum hak hak a, "Enge maw i hriat reuh le?"

"Min kawp em ni? Chiang deuhin min hrilh la, kawp nih hi ka duh lo, inkawp ai chuan inthen mai hi a tha zawk," ka ti chhunzawm a, ka ipik zual pawh a reh deuh nghal hawk bawk.

"Engah nge ka kawp ngawt ang che, ka ta i nih theih hun nghak in lungleng takin ka awm a nih hi," a rawn ti let a.

"Dawt min hrilh suh aw," ka ti chuai raih a.

"Dawt maw? Ka hrilh ngai che em? Min han hrilh teh, kan in zui hnu hian dawt ka hrilh tawh che em? Tu thu lawilo sawi nge i lo awih a," a rawn ti a, a aw-ah thinrimna aw ka hre tel bawk a, ka tah a chhuak nghal em em ringawt. Sawi tur ka hre lo a, phone ka dah nghal daih a. A rawn ring zui leh nghal a. Ka pick-up a, ka ngawi reng a.

"Din, tikhan awm suh, min ring rawh, kan inhmu thei bawk si lo, ka tan a hrehawm," a rawn ti a. Chhan dan tur pawh ka hre lo, ka ngai a, ka bula awm turin ka duh ngawih ngawih, a thusawi pawh ka ring vek a, mahse, chhan dan tur engmah ka hre lo thung.

"Hello, Din," a rawn ti leh a.

"I rinawm chuan a tha anih chu. Kei chu kawp nih ka duh lo, ka thikthu pawh a chhia tih i hriat vek kha. Ka zir chak tawh lo chung min nawr lui a, hmun dangah lehkha ka zir a, min lo kawp leh si chuan a ho awm em mai, inkawp ai chuan inthen a tha ka ti zawk a," ka ti sep sep a.

"Ka bulah awm lang chuan ka kuah che nga, i rim nu chek te kha am deuhin ka hip lut vang vang ang, min ring rawh, ka tan hmeichhe dang tumah an awm thei ngai lo ang. Tha deuhin lehkha zir la, i lo haw veleh palai ka rawn tir ang a, kan innei dawn nia," a rawn ti a, ka mittui a tla leh ringawt tawh, ka ngawi leh reng ringawt.

"Din, nimin ka chhuahna-ah i inhmeh tur deuh Hoodie ka hmu a, ka lo lei che a, i lo haw huna pekah che ka ti a nia, mahse, naktukah ka lo thawn mai ang che, thlem ngai kan awm tlat bawk sia," a rawn ti leh a.

"Nangman min rawn pe rawh," ka ti tuau a. 

"Ka rawn kal tak tak ang a, lehkha i zir thei lo ang a, i buai hle mai tur asin. Naktukah sumo-ah ka lo thawn ang. Mamawh dang i nei em?" 

"NANGMAH" ka tih rual a lehlama rawn nui thum hak pa bulah chuan ka awm chak tak zet a ni. 

   Class kan bang fel a, hostel lam panin zawimuangin ka kal a, nimin lawka Marema nen kan inbiakna te chu ka ngaihtuah let neuh neuh a. A engahmah hmaa ka ringhlel ringawt pawh chu ka inthiam lo deuh hnuhnawh leh hle a. Mahse, mipa a nia, mipa ah pawh duhtu ngah ve em em tu kha a nia, thlemna hi chu a tan hian a tam hle thin tih hi ka hria. Vawikhat a birthday pawn nula hnen atangin gift  a dawng a, amah star em em tu a nia, a petu in a tihluih tlat chuan a peka hnen chu a rawn thleng ve miau sia, kan intih thiamloh phah thelh anih tak kha!

    Chutianga kan chungchang vel ka ngaihtuah lai chuan ka phone chu a rawn ri ral ral a. Number hriat loh lehnghal a lo ni a.

"Hello"

"Tahbelhnu" a rawn ti a, min rawn betu pa chu ka hre thei nghal.

"Enge, luruhringpa?" ka lo ti let a.

"Hostel kawtah ka awm, lo chhuak teh, i bialpa Bike nei Sumo um vak vak pa khan thil a lo thawn che a, i dawn loh a hlau lutuk a, thamna tam tawk min pe a, hostel thleng rak ka rawn tlan a nih hi," a rawn ti lawng lawng a.

    Kan hostel kawt lam chu ka hawiphei a, Sumo var lo ding chu ka va hmu a, ka pan phei ta hlawk hlawk a. Marema khan Hoodie min lo thawn dawn tak kha mawle.

    Kan sumo driver bengchheng em em a chu lo fai vung a, a hmaa kan inphur hmasak ai thlawt kha chuan a hmel pawh a lo tha roh khawp mai. A hma khan ka lo en chiang miah lo a, sumo driver atan chuan a uiawm riau ten kan hre thar leh vel a. Min lo nuih var var a, tukverh atang chuan box pakhat hi a rawn dah chhuak a, "Kha le, i tahpui em lo ang chu, thingpui dawr te awm hnai vai em? Min lo treat teh, hei extra in ka rawn kal vang vang a nia," a ti zui puat puat a.

    Kan hostel piah lawka Cafetaria chu kawk va pahin, "Kal rawh, ka khilai ang che, i duh zat zat i in dawn nia," ka ti a,  lawmthu ka hrilh chhunzawm mawlh mawlh bawk a.

    "Tukin zingah kan lo thleng a, i la thawh loh ka hlau sia, class ban hun awm ka nghak ta tawp a lawm," a ti ve nuah nuah a.

    "E, class ban hun te i hre ve thlap thlap a ni maw, driver laktlak tak i nih dawn hi," ka ti let ha a. Coffee ka order zui nghal a. Machine ami an rawn thli chhuak a, coffee chu kan in nghal a.

 "Class ban te chu hre ve tehreng mai, kum khat zen zawn campus ah hian ka awm ve hman alawm. Chhungkaw buaina avangin ka zir zawm thei ta lo a," a rawn ti a.

Eng ang chhungkaw buaina tehhrep nge maw ni dawn ni, kum khat chiah pawh nghah theih loh chu.

"Ka hriat ve chi a ni em? Chutianga kum 1 lek pawh tilui thei lo a i awm nachhan chu," ka ti let ha a.

"Aa, ka pa min chawmtu ber hi a stroke thut a, sumo hi a ta a nia,a zeng chhunzawm si a, sum lak luhna dang nei hek lo, ka pa hna hi ka chhunzawm a ngai ta lawm le," a ti liam puat a,vei em em awm ang pawh chuan a awm lem hlei lo a.

"A van pawi ve aw, mahse, thil tha zawk lo her chhuahna tur pawh a ni maithei asin," ka ti ve ringawt a, ka thusawi pawh chu kei pawn ka awih chiah lo a.

"Ni e, a, a tir chuan hrehawm ka ti thin a, mahse, hrehawm tih khan engmah sawtna a nei lo a, ti hian ka pawm tawp tawh mai. Kan vannei leh eizawnna dang eng emaw te kan la nei thei em ang chu," a rawn ti let ve mai bawk a.

"Ka kal mai ang, i bialpa bike nei-a kha i biak duh tawh takin," a rawn ti zawm bawk a. Chhan ngaihna vak pawh ka hre lo, ani lah hi a tawng puat puat zel mai bawk si a. Sumo lam pan chuan kan inzui phei leh a, a seat a a  thut fel hnu chuan lawmthu ka hrilh nawn leh mawlh mawlh a. Motor tih nun vut vut pah chuan, "Tahbelhnu ka ti ringawt dawn che nge engtia koh tur che nge i nih? " a rawn ti a. Nuih hak hak pahin, "Dini, Dinpuii," ka ti let var a. "Nang ve le? Luruhringpa" ka ti let zui a, a nui vur vur a,a tlan chhuak daih a. "Hmelchhepa" ka ti tuarh a, ka piah lawkah chuan a ding zui leh ang lawi a, tukverh atangin a rawn dak chhuak a, nuih vur vur pah hian ,"I la hre dik ta chuang lo, Liansangpuia aw," a rawn ti a. A tlanliam zui leh ta nghal a.

"Liansangpuia" ka ti nawn sep a. Hming mawi dangdai tak a ni.

    A pa chanchin chu ka thinlungah chuan a rawn ri nawn leh thin a, Mizoramah hi chuan sawrkar hnathawk nih loh chuan vanduaina te hi tawh ngam ngawt pawh a ni lo e, kan ram hruaitute lah hian policy mumal leh tha zawk han chhawp chhuah tur hi an hre hlawl lo lehnghal emaw ni, sawrkar hnathawk lo tana hahdam ve deuhna te hi an duang chhuak thei bawk si lo, M.A val pawn peon hna te an dil ve leh thin hi chu a lehlam kawng takah chuan a lo mak lo khawp mai. Mi ramah chuan ram mipui zawng zawngten hamthatna engemaw an dawn laiin, kan ramah chuan sawrkar hnathawk te chauh hi an vulh ni mai hian a lang a, hna ruak tlem te in chuhin kan phu suau suau reng mai dawn anih hi.

Marema kawr min lo thawn chu  ka ha tawk chiah a, a perfume ka rim duh ber mai,amah nena inhmeh ngawih ngawih kha a rawn kap zeuh a ni ngei ang,a nam vang vang a. Ka in selfie pui a, thlalak ka thawn nghal a.

Ka phone a rawn ri zui nghal a.

"I inhmeh lutuk, Din, i duhzawng a ni hrim hrim em?" a rawn ti a. 

"Um,a rim pawh a tui khawp mai," ka ti let a,a nui thum hak a. Sawi tur vak pawh ka hre lo, ka ngawi zui vang vang a, phone dah lovin kan ngawi dun reng a.

A hnu deuhah chuan, "Enge ka rawn ken ang che, ka lo kal hunah," a rawn ti a.

"Nangmah bak a ngai lo," ka ti let a.