LIANSANGPUIA - 3

     Ka phone vibrate ri chur chur avang chuan ka harh hlawl a. Hriat deuh reuh number chu a ni, mahse, ka lo save si lo a, tunge ka hre chhuak thei lo a. Ka reject daih a, mut rei ka tum mah nak laiin a.  Nizan lamah Marema nen kan inbia a, vawiin a lo thlen tura ka beisei kha hna pawimawh a neih avangin naktuk lamah a rawn sawn kha a ni a. Vawiin chu exam zawh lawm nan ka mu char char ang a, tlai lamah ka han bazar ve ang chu.

    Ka muhil leh dawn siar siar tih chuan ka phone chu a rawn ri leh a. Number ngai bawk chu a lo ni a, peih lo tawkin ka la a, "Tho tawh rawh, Laldinpui," a rawn ti nghal lawng lawng a.

  Liansangpuia.

    He pa hi ka best friend emaw a in ti nge maw ni. 

    "Enge ni ta? Mi muttui laiin," ka ti tham chhal a. Vin pawh ka vin peih lo.

    "Thil pawimawh lutuk tih tur kan nei," a rawn ti leh ringawt a.

    "Nang nen hian programme kan set dun pawh ka hre lo e, ka mu dawn," ka ti zui leh a.

    "Dini, Laldinpui, lo insiam ang che, Dar 11 ah ka rawn pick up ang che," a rawn ti leh a.

    "Enge maw i hriat le?"

    "I tan a pawimawh a ni mai, ka thu hnial reng reng suh, ka lo kal ang a, i lo la insiam loh pawn i mut kawr nen khan ka phur chhuak lawp tho ang che," a rawn ti zui leh lawng lawng a.

    'Liansangpui," ka tih rual chiah chuan phone chu a thi zui nghal a.