There She Goes - CHAPTER 1

Ka alarm ri chuan min ti harh a, khum sir dawhkana ka mobile dah chu meng mang lovin ka ban a, alarm chu ka off a. Peih lo tawkin ka meng a, ka piaha ka pasal muhil suk suk chu ka en reng a. Kum 10 dawn kan innei tawh a, fa kan la nei lo a, tun thleng hian ka pasal in nupui atana min neih chhan hi ka hre chhuak thei lo a, min hmangaih lo tih erawh chiang takin ka hre tawh thung.

Ka inphihfai a, choka-ah ka lut phei a, kan nula Maengi chuan thingpui min lo chhawp nghal a. Vawiin lama Delhi lam ka pan tur thu leh ka awm loh chhungin a pu lo enkawl tha turin ka chah mawlh mawlh a. Nidanga ka tih thin angin kan pa chawhmeh duhzawng ka siam zung zung a, Maengi chuan rawngbawl tho mahse, kan pa chawhmeh duh chi pakhat hi chu keiman ka siam ngei zel, ka phut ngai lo nangin lawmthu emaw, a tui thu emaw, fakna erawh a ka atangin a chhuak ngai lo thung.

Thlawhna ticket-a Zodinpuii tih inziak kalh chu ka en nawn leh a, hriatsual palh awm thei thu-ah kan chhuah hun tur chu ka bih chiang leh a, ticket chu thlep fel in ka suitcase nizan lama ka siam fel sa chungah chuan ka dah a. Ka inbual san ta a. Ka inbual chhungin pa ber pawh a lo tho ve em ang chu.

Kan pa, Thante-a hi Aizawl College Lecturer a ni a, History teacher a ni a, a subject hi a thiam in a student te pawn an zah thin hle. Tlangval senior tak a nih thlengin hmeichhe lam reng reng a ngaihsak lo a, kum 40 a kai kum chuan min rawn rim ve tluk tluk mai a, kei chu a zirlai ka ni a, 6th Semester ka zir mek bawk a. Kan kum in upat hleih lutuk avang leh ka hmel duh zawng anih lem loh avangin ka rilru ka pe ngai lem lo a, a lo leng tur ka bihruk san chang lah a tam. Mahse, a beidawng duh lo a, kum khat a rawn len hnu-ah chuan ka chhungte pawn min zilh nan an hmang ve nak nak thin a. Ani ang baka mipa tha ka hmuh loh tur thu te, ka tan innghahna tlak anih thu te in thu rawn min pe fo thin. Keipawh ka inngaihtuah ve nasa a, hmeichhe ler lo tak mai ka ni a, ka hmel a chhe lo, min bem tu leh min duh dertu tam tak ka nei ve a, mahse inngaihzawnna lamah hian ka rilru ka pe em em ngai lo bawk a, ngaihzawng ka nei ngai lo. U Thante-a chu a thiamna vangin ka ngaisang em em a, ka zah bawk a. Sum meng a meng ni ila, min lo rim tirh khan ka tlu nghal rawk rawk ang, mahse, kan chhungkaw sum enkawl tur, sumdawnna lian nei sa, fanu mal neih chhun leh sum leh paia buaina nei lo, duh leh mamawh ang apiang lei thei kha ka ni ve tho a, amah ka ngaisanna leh ka zahna khan inneihna thuthlungah min hnuk lut ve chauh a ni.

Ka inbual zo a, U Thante-a pawh a rawn tho ve tual tual a, bathroom lamah a lut zui a. Makeup ka inhnawih zo a, zinkawnga hak nuam turin Kurta leh Palazo ka ha a, Chapal bun nuam zet ka inthawlh bawk a. U Thantea hak tur buaipuiin, a kawr, kekawr leh pheikhawk leh mawza te chu khumah chuan ka rem thap a. Chaw ei siam turin ka chhuak ta a.

Hmai phih fai hlim hlawl tih hriat takin pa ber pawn dawhkan a rawn kil a. “Vawiin chu ka thlah ang che, Class ka nei dawn lo a,” a rawn ti thum bul bul a. “A va lawmawm dawn ve, lo zin ve daih la,” ka tih zawm zat a. A nui hak ringawt, chu zawng chu, nidangah pawh a tih loh dan pawh a ni lem lo a, ka enliam ve mai bawk a.

Chaw kan eikham chuan muang changin Lengpui Airport lam panin kan in khalh thla ta a. Engmah sawi tur kan nei lem lo aniang, kan ngawi dun reng a, hei pawh kan ti ngai loh dan a nih chuang lo. Amahah hian rik bawrh bawrh te, fiamthu te, inchhaihna thu mai mai pawh besei tur awm lo a ni.

Airport chhung lamah ka innawr lut fel a, mi an lo zi nuaih nuaih a, security-ah ka lut fel a, kan thlawhna tur a lo la tum loh avangin ka phone ka phawrh a, social media en kual pahin ka thu a. Sumdawng kan nih avangin hmelhriat hi ka ngah ve viau a, hetiang hunah hian hmelhriat hi ka hmu leh hlauh thin a, mahse, tun tum chu mahni a awm ka chak ngawih ngawih a. Ka phone ka khawih a, ka hawi chhuak lem lo.

Tunlai chu khawharna hian min tuam hlup hlup reng a, ka pasal lakah hian ka beiseina thi tawh hnu chu a lo nung thar leh a, nupa hlim tak, thu in hmu em em, a changa in hau bap bap a, in thlem lungawi leh thin ang kha ka awt ve em em a. Hetia roommate ang mai a khawsak mawl tawp hi ka hne tawh em em a ni. A chang chuan inthen chak ut ut na ten min tuam hlup hlup thin a, mahse, kan inneihna thutiam hi ka ngaihtuah fo thin. Tin, inthen chhan tur hi han sawi tur em em hi a awm lo a, ‘Khawharna’ hi a chhan tlingin tuman min ngaihsak theiin ka ring lo a ni. Hun rei tak chu amaha beiseina ka neih ve te chu ka dah bo a, hna ka thawk mawp mawp a, thian ka kawm a, ka duh dan angin ka khawsa a, min hau lem lo bawk a, min enliam mai a, mahse, chhungpuinu tiha mawi lo zawng erawhin ka khawsa ngai lo thung. Tunlai chu thian tha ten pasal an nei nak nak a, mi nupa thar hlim em em karah te ka awm a, ka thinlung mu hnu an kaitho a, ka pasal laka chhanlet loh hmangaihna chu ka lo beisei thar leh ta, chung chuan ka nun hi a tihlim lo ngawih ngawih a ni.

Instagram-ah ka lut a, ka thiannu Hmingthani pasal nei thar thlalak a lo awm chuai a, ka rilru in, “Hlim reng rawh u,” ka ti a, engin nge min mawlh ka hre lo, ka mittui ka khap per sak a. Anni zawng hun rei tak in duh tawn em em a in zui hnu a innei an ni bawk a, ka dinhmun ang hi an tawng ve lo turah ngai ang.

Ka hnunga mipa aw mawi zet vai tawng leh sap tawng in pawlha phone hmang chuan ka suangtuahna khawvel atang chuan min tiharh zawk a. A thusawi vela tang chuan sumdawng lian tak anih loh pawhin Corporate Office lian ve takah dinhmun sang tak a chelh ngei ka ring. A aw chuan min hipna riau a neih avangin ka hnung lam chu ka va hawi a. Ka hnunga pa lian pui phone hmang chung a lo thu run chuan min lo melh khui a. Lehlam ka hawi leh vat a, ka phone ka en chhunzawm a, min melh zam nghal mai dawn a lawm le.

Kan thlawhna tur pawh a rawn tum ruai ruai a, rei lote hnuah chuan thlawhtheihnaa lut turin kan intlar leh ta a. Ka seat a ka thut fel hnu chuan nidanga ka tih thin ang bawkin U Thantea ka call a, thlawhtheihna chhunga ka luh tawh thu te ka hrilh a, ka phone chu flight mode-ah ka dah a, tawitein ka tawngtai a, tukverh lam hawiin ka thu ta ran a. Midang pawh chu an rawn lut sang sang a,ka maimitchhingsan ta a.

Tunlai chu ka dik thei hlawl lo, in entir mai te hi ka duh rum rum a, mahni chauha ka awm chuan mahni inkhawngaihna thlarau hian min rawn luhchilh zung zung a, mittui hi a lo hnai leh mai thin. U Thantea kha lo nei lo ta ila, fa te tal hi nei ve thei ila, engatinge ka nu te khan ka duh em em lo tih hre reng chung khan min lo duhpui em em mai le, nula upa pawh ka la ni si lo a tih te chuan ka rilru-ah a lo lut leh a. Dik tak chuan Delhi pawh tluang takin kan thleng leh ang a, kar khat pawh thang ila, thla khat pawh thang ila, ka pasal hnen atang hian ngaihsakna ka dawng dawn lo a, ka dam tih a hriat a, keiman ka biak chuan a duh tawk leh em em dawn a ni. Family Counseling-a kal ka rawt tum a min chhanna khan ka beidawnna a ti zual em em a. “Hlim i tum lutuk anih kha, hei bak nupa nunah a awm chuang hleinem, i duh duh danin I awm ka phal sak che a, nang baka nu vannei an awm hleinem le,” min ti duh chauh a nih kha.

Dik tak chuan, induhsakna lantirna te, inkuah vawng vawng te, inhnaih taka thut a movie han en dun ve mai mai te, eng eng emaw thu sawi a han ti ti dun ve melh melh te, khawi emaw a han len khawthawn dun vel te hi ka chak ve thin, bazar dun te, thu inhmu lo in tihtauh khum bar bar a, han in thlem lungawi leh vel te hi ka chak ve thin. Ka inngaihtuah lungpuam a, ka mittui a rawn tla ngiai ngiai a, rang takin ka kutin ka hru a. Ka bula thu aw thum mawi zet chuan rawmawl min rawn pek pahin, “Tahbelh deuh ka thut pui peih lo a nia,” a rawn ti a. Aw lawi rutin, “Ka lawm e, ka mamawh lo,” tih pahin ka bag atangin ka rawmawl ka phawrh chhuak a, ka inhrufai mawlh mawlh a. Ka ngaihtuahna ka kawm chhungin kan aw mawi-a chu ka bulah a lo thu reng chu niin.