There She Goes - Chapter 8

 

Ramsanga Pov

 

In ka thlen chuan zan dar 10 a lo hnai kuarh tawh a, tunlai chu hnaah kan tul nen, Ranjita nupui nei tur nen, indaih loh a na thin khawp mai. Nimin piah khan Neha-I te ina ka awm laiin Neha-i khan phoneah mi a bia, an inbiak dan atang khan Zodini a nih ka ring. A aw nu deuh te kha ka hre leh chak tak zet a, Neha-i chu ka melh run a, a la nui ar ar zui a. An inbiak chhung khan ka lo tang tun a, an inbe zo va, ka thaw chhuak thei hram anih kha.

 Tunlai chu ni danga ka tih ngai loh ang deuhin status te ka update a, vawi khat chauh hmu tura ka duh khan a view a, a contact atangin min paih ta aniang, ka status a view leh ngai ta lo. Vawi tam call tumin a number hi ka hmet a, ka biak zawm zel chuan atana harsatna siam tu mai ka ni thei tih ka hriatna chuan min thulh tir leh thin. 

Kan Ranjita leh Neha-i zet pawh hi innei fel tawh se ka ti tak zet, hna ka ngah phah em em a, an bula kal a ngai deuh reng bawk a. An bula ka awm lahin Zodini hriatchhuahna tur hlir a nia, ka kham tawh takzet.

 Neha-i bulah Zodini chanchin ka zawt a, min hrilh nual tawh a - pasal neih fuh loh avang a nun khawhar tak te kha! Mahse, mipa ka ni a, an sawi dan hmangah chuan bialnu a neih ka ring nghet bur a, ka mithianghlim nu te reuh khan rinhlelhna chang a hre lo a ni ngei ang. Ka ngai tak zet a ni. A pasal damlohna avangin Kolkata-ah an awm mek tih min hrilh tel nghe nghe kha.

 Zodini nen kan thutna couch ah khan ka thu a, chaw ei pawh ka chak nek lo e. Ka phone chu ka hmet eng a, Zodini number chu ka hmetchhuak a, ka call duh chiah lo a, ka hmet thim leh thin a. Ka engkim hian a ngai a ni.

 Ka phone chu a rawn ring thut a, ka phu zawk tep a ni. Ka’n en chuan Zodini a ni a, ka beisei phak loh lutuk thil a ni.

          “Hello” ka ti a, a ngawi reng a.

          “Zodin” ka ti a, a la ngawi reng a, ka ngaithla reng a, hmeichhe inhnit feih feih hi ka hre ta a. Hrep tak chuan, Zodin, ka kuah phak lohah chuan tap lul suh.

          “Zodin, i tha em? Engtinnge i awm?” tiin ka au thawt a.

          “Ramsang, ka ngai lutuk che, ka na vek thei asin, min ngaihtuah ve ngai em? Min ngaihtuah laiin i awm zawn kha a na ve vek ngai em?” a rawn ti tiau anih chu. Ka sa pup pup a, ka a vek lo chauh a ni.

          “Khawnge i awm? Sawi rawh, ka lo kal ang” ka ti chhuak hrawk a.

          “Lo kal lo ang, ka tha leh mai ang, i aw ka hre tawh a,” a rawn ti a.

          “Zodin, Kolkata-ah in la awm em? Ka lo kal ang aw, aih, ti suh, ka bulah i awm loh laiin i tap tih ka hriat si chuan engtinnge awm se min tih. Zodin, ‘AW’ ti rawh, nangman lo kal tura min tih chuan ka lo kal nghal ang,” ka ti a.

          A ngawi vang vang a, “Ramsang, lo be miah lo tur che ka ni asin, min block ka ring a, i number ka hmet mai mai a. Ngatinge min block loh?” a rawn ti a. “Ka tihpalh lutuk, keini chu hrang tura duan kan nih kha, Ramsang, min block rawh aw, a nih loh chuan ka lo call leh palh ang che, lo biak tawh loh che ka tum ang,” a rawn ti niah niah a.

          “Tawng tawh suh, ka block ngai lo ang che, min mamawh hun apiangah min lo call thin ang che, a palh pawn min lo call fo thin ang che, I hria em?” ka ti a. A reh thiap a.

          “Zodin, zodin, I la awm em? Hello”

          “Tawng tawh suh min tih kha,”

          “God……….. Zodinpui, ka ngai lutuk che,” ka ti chhuak hrawih a.

          “Kolkata-ah chuan lo kal miah suh aw, tunah hian ka pasal ICCU-ah a awm mek a, chutiang karah chuan lo kal suh, ka pasal ka enkawl thei lo palh ang,” a rawn ti a, kan nui dun thei ta. Thildang vak pawh sawi lovin phone kan dah ta a. A aw ka hriat avang chuan ka dam sawng sawng a, mahse, min biak zawh chuan ka ruak nghal vawng vawng mai.

Zodinpui, i bulah chuan awm ilang maw, i chalah khan ka fawp ang a, i mittui tla kha keiman ka kut ngeiin ka hru hul ang. I rim nu chek chek te kha am takin ka hip lut leh vang vang ang a, chuan, i hnunglamah dingin i beng hnuai, vun no ser ser, I perfume rimtui tak mai I kah thinna laiah te khan ka fawp leh ngei ang. Zodinpui, ka ngai lutuk che, engtikniah emaw chuan ka ta i la ni ngei ang.

 

 Office-a ka awm lai chuan Duati’n min rawn call a. Ka nutei te an haw tawh dawn thu leh thlahna ni pah fawmin leh naute thar lawmnan zanriah an ina ei turin min rawn hrilh a, min rawn order deuh bawk. Ka nutei hi ka nu tluka ka ngaih a ni a, ka nu a boral hnu khan ka nu unaute ho hi ka neih chhun tak tak te an ni. Ka pa chhungte lam hrim hrim hi chu ka nu nen an inthen atang khan ka tlawh pawh leh tawh lo.

Export company lianah ka thawk a, share tam tak ka neihna a ni bawk. Lawnglianin nitin India ram bungraw siam chhuah leh thar chhuah tam tak khawvel ram dangah kan thawn chhuak a, Mizoram atangin engmah thawn chhuah tur kan nei ve ngai lo hi chu hrehawm ka ti ve thin. Industry te reuh te te maw kan tih pawn an thawn chhuak ve fo a, Mizoramah pawh sawrkar scheme hrang hrang a awm tih ka hria, eng ber hi nge kan mu tan ni ang aw tih hi ka ngaihtuah thin. Hna a buai loh deuh hunah ka la han zirchiang ang chu. Hotu lian lam te pawh thil an hrilhfiah theih mahna le.

Duati  te in ka pan pah chuan ka nutei tan enge maw leisak tha in ka hria a, Connaught Place-ah ka kawi a, lei tur erawh ka hre lo hle. Ka mitthla-ah Zodini’n Neha-i nu shawl a pek kha ka hre chhuak a, a tha viau tak ang. Shawl mawi deuh mai, Mizo nu duh anga rawng dal diai mai chu ka thlang a, Mizo nu hi chuan rawng lai hi mawi an tih nen, kan vai nu ho lah in a gold leh a sen a awm loh chuan mawi an ti hleithei der lo a.

Ka nutei chu shawl ka pek chuan a lo lawm thiam em em a, “Aw, ka fapa hi a puitling tawh takzet a nih hi, enteh, I shawl lei te hi, I va han lei thiam em em, nupui zawn chiah i thiam lo a nih hi, kan zawn pui ang che aw,”  lo ti hluah hluah a.

Duati chuan min rawn hrilh ru a, “Zanin chu i nupui tur a sawm tel a nia, a rawn thleng tep ang,” a rawn ti a. Ka mak ti hawi a vel chu Duati chuan min nuih kiah kiah a. “Ka nu hian mamawh a ti ngang tawh che a niang, hmanni ami lah kha mi nu a ni bawk sia, nula hnahkhat, chhe lo tawk, ka thiannu chaw ei-ah kan sawm ve a,” a rawn tih zawm a. “ A va tul lo tak em aw!” ka ti zui nuah nuah a. An nula sawm pawh chu a rawn thleng zui ve a, a chhe lo hle lah taka, mahse, ka Zodini ne pawh a ek pha lo.

Ka nutei in la zei vel chu ka kham tak zet, a nula lo sawm te chu Mami a ni awm e. Chaw ei laiin ka bulah a thut tir, ice cream min lei dun tir thul, ka nuih a za bawk si, a khat tawkin Duatin min rawn kheuh leh zeuh thin bawk. Haw vat vat mai ka duh tawh. Chaw kan eikham chuan thingpui sen hang kan in a, November kan chuang kai tawh a, boruak a nuam tawh hle. Delhi hi chuan November leh February hian a nuam berin ka hria, thla leh maiah chuan a vawt turu leh viau ang.

Thingpui in zawh chuan haw mai ka tum a, mahse, Mami chu ka hruai haw tur a ni ngei dawn tih ka hria, ka chak lo hle bawk.

“Mami, khawi vengah nge in awm? Haw ka duh deuh tawh a, ka thlah haw nghal ang che chu,” ka ti a.

Ka nutei chuan, “Sangte, i va hmanhmawh ve mawle, dar 9 a la ri chauh alawm, ka haw vang vang dawn a nia, ka lo kal leh hun tur pawh hriat loh, la leng rawh, Mami pawh a hmanhmawh bik nang,” a lo ti tung a, min ngai tho tih chu ka hria a, a inla zei vel lutuk chu ka nuih a za tlat a.

“Zanin chu tleirawl zei deuh chaw ei pui ang mai ka ni,” ka ti zuk a, ka nutei chu ka melh a, a lo tum hman a, Duati a in sum thei tawh bawk si lo, kan pahnihin Duati nen kan nui hawk a. Mami chuan hrehawm a ti ang tih ka hlau a, ka insum leh vat a.

“Tak taka, Nute, engatinge, I va hmanhmawh ve? Naute a la sen si, a nu leh pa nen chauh chuan engtinnge niang?” ka ti let a.

“Naktukah i U Rami te nufa an rawn chhuk thla thung dawn alawm, Mami nen hian in lo va buaipui thin bawk ang a,” a rawn ti a. Ka nuih a za telh telh, mahse ka tilang duh tawh bik lo a. Ka bu nghat a.

“Anih, Nute, kan kal ang, Mami pawh hruai kual lawk duhna pawh ka nei a ni maithei a,” tih pahin ka nutei chu ka siai a, a lo in la man thiam vel chu nuih lo a harsa hle a ni.

Garage thleng Duati'n min rawn thlah a, Mami thutna kawngkhar ka khar fel a, driver seat lama ka phei dawn chuan, Duati chuan zawi te hian, "Duh aiin status-ah i kur nasa mah mah, min amah ani tih an hriat palh hlauh chuan a hming chhe lutuk palh ang e," a rawn ti a. Duati chu ka en vang vang a, "I u hi mi nu zunah ka uai lak lawh a nih hi," tih pahin ka siai suk a, carah ka lut ve nghal a, zanin chu ka uang laklawh tlat.

Kan inthlah ta a, motorah chuan Mami chu a ngawi reng a, ka khawngaih deuh a, “Mami, enge ka thawk i tih kha?”

“Call Centre-ah ka thawk a, mahse, ka chau tawngkhawng a, chawlh ka la rih,”

“A nuam i ti em i hnathawh chu?”

“Ti tho e, ti lutuk lo, mahse, ka in enkawl nan tih a ngai alawm”

“Enge a awmzia?”

“Thil ka hrilh che ang a, i nutei kha hrilh miah suh aw,” a rawn ti a.

“Eng thil?” ka ti hluai a.

“Aizawla  M&M Hardware khi I hria em?” a rawn ti a.

“Hre tehreng ang chu, M&M tel lo chuan in pawh a sak theih meuh loh anih khi,” ka ti let a.

“Mama & Mami tihna a nia, Mami chu keimah. Mama chu ka u, kum thum ral ta khan  boral tawh a, chuan dawr chu ka enkawl tur a nia. Mizo mipa thenkhat tenawm zia i hre tawh em? Min duh tak tak miah si lovin ka dawr ni mai tur vang chuan ka luck tek tek teh mai a nia aw,” a rawn ti a.

“Mizo mipa ti kher lo la, mipa thenkhat ti ve mai la,” ka lo ti a.

Nuih hak pah chuan, “Aw, Mipa thenkhat. Chuan, sumdawn hi ka tuina a ni lo hrim hrim bawk a, ka enkawl peih lo a, ka pa ka hrilh a, a thin a rim ul mai bawk si. Tunah khian ka patea’n a enkawl a, pe daih mahse pawi tihna ka nei miah lo, ka patea chu a fel em em a, an chhungkaw intunnunna a ni. Kei chu ka pan min chher hriam vek tawh. Sikul thaah ka lut a, Sap tawng, vai tawng ka thiam a, he khawvelah hian ka pa sum tel lo pawh hian ka ding chhuak dawn lutuk,” a rawn ti leh a. Ka ngaisang ang reng reuh khawp amai

“Corporate job hi nuam chu ka ti reng a, mahse, nuam ka tih i hre duh em? Vlogger nih ka tum a, Travelling vlog ka siam dawn, khawvela ka  thil nuam tih ber hmangin ei ka zawng dawn tihna a nih chu,” a rawn ti a.

“A risky zia I hria em? Thla tam tak, Isubscriber i ngah hma chu hlawh i nei dawn lo a, I hlawh tur zat pawh fix a awm dawn lo a,” ka ti let a. “Chuvang alawm hna ka thawh rih reng, kum khat vel hlawh nei lo tur angin ka inchhut a, chuan chumi chhung ami tur chu ka inkhawl a lawm, ka neih daih veleh ka tan ang chu, ka lar hunah chuan thlakhata ka hlawh pawh turu dawn a nia,” a rawn ti hap a. “Hlawh ai mah chuan khawvel ram hmun hrang hrang ka tlawh kual thei dawn a,” a rawn ti leh a, tuemaw min ti hre chhuak tlat.

“Ka nutei khan engvangin nge chaw ei a a sawm che I hria em?”

A rawn nui hak a, “Duati nen kan plan anih kha, Duati nen hian school khatah kan kal thin a, i nutei khan ka chanchin a hre chiang lo a, nakin lawka dawr lian enkawltu ni mai tur emaw min ti a, Duati bulah khan I nupui tur zawng turin a ti reng bawk a, Duati lahin a hre chiang em em che a, tumah duh I nei dawn lo, I thinglung chahbi kawltu an awm tawh tih a hre chiang bawk a, tikhan kan plan a nih kha,” a rawn ti a.

Ka nui ve ta hak a. Duati chuan lawmthu sawina enge maw a rawn la phut leh ngei dawn anih chu! “Channel I neih veleh min lo hrilh la, ka lo subscribe nghal ang che, ka thiante phone zawng zawng atang pawn,” ka ti ta a. A lo nui sak a.

Zodinpuii POV

Ramsanga ka be zo chu ka hahdam suai suai a. Mahse, ka be tawh kher lo ang. U Thantea pawh ka la kalsan nge nge maithei, mahse, kha mipa pa lutuk, mipa invawng leh hmeltha zet khan nuthlawi a phu lul lo, a hmai tibal tu mai ka ni ang. ‘Ramsanga, nuthlawi zuna uai’ min an tih ka phal hlawl lo a ni.

U Mavala’n min chhuahsan hnu khan ka bing mup mup a. Kei hi pasal ka neih tan ni atang khan phatsan ka lo ni tawh reng em ni tih te ka ngaituah a, ka tih ngaihna hre lovin Ramsanga number ka hmet a, ka call zui a, rang lutuk in min rawn la chhang zui a nih kha.

Visiting hour a rawn thleng leh ta a, ICCU – ah chuan luh min phal sak veleh ka lut a, U Thantea chu khawl chitin reng nen an lo mut tir a, a muhil bam a. “Mi a pa, mi hmaa lan mawi duh vawngin nang leh kei hi hremhmunah min tan tir anih hi tiraw,” ka ti mawlh mawlh a, a bula  tawngkam dengkhawng leh thu hriat nuam lo sawi lo turin ka in fuih mawlh mawlh a. A rawn meng siar siar a, “I lo thleng tawh a ni maw?” a rawn ti a, a aw a zawi khawp mai.

Ka lu ka bu nghat a, “Na i nei em?” ka ti a, a neih loh thu in min chhang a. “A ninawm hle mai,” a rawn ti zui a. A ninawm viau ang, a bul velah damlo leh khawl mak tak tak hlir a awm a, hrui chi hrang hrang a inzam duah bawk a. “Naktukah roomah an nawr chhuak tawh dawn che alawm, tuar hram hram rawh,” ka lo tia. A lu a bu nghat nghat a.

Ni thum hnuah damdawiin atangin min chhuah a, kan chhuah zan chuan U Thantea thla hual nan U Mavala te inah chaw kan eikhawm a, an fel nupa thin khawp mai. U Mavala chuan U Thantea bath room kal hlanin ka that leh that loh min zawt a, ka that thu ka hrilh a. U Thantea bialnu hlui hming kha ka zawt a, “Maliani, Lalliantluangi,” a ti ban chalh a, “Puih I ngaih chuan min rawn be hreh reng reng suh,” a ti zui a, ka bu nghat nghat a.

A tuk tuk lehah chuan Aizawl lam panin kan haw ta a. Kolkata Airport chuan thil min ngaihtuah tir nasa hle mai. Security kan pelh hnu a Mizoram lam kal tur gate bul kan thlen chuan Ramsanga nen kan thutdunna kha ka en phei vat a, a lo ruak huai a, keipawh ka ruak huai mai.

Dam takin Aizawl kan thleng a, chhungkhat laina ten min lo hmuak ve laih laih a, kan inah zanriah kan siam zui a, kan ri laih laih reng a. Rawng ka bawl lai chuan varenda thlanga U Thantea’n phone a mi a be lai chu ka va hmu fuh a, Maliani a bia anih ka ring ringawt. Ka thik hran lo a, mahse eng chen nge an lo inthup tawh tih erawh ka hre chak hle a ni.

Kolkataa keimah chauha ka riah lai khan biak ka tum zet a, mahse, ka rilru nat lutukna thil te ka hre palh ang a, Ramsanga ka call leh mai ang tih hlauin ka be duh lo a, remchang hmasa berah ka la be ve ang chu. Tin, engpawh thleng palh se, U Thantea hriselna la pan lutuk avang hian ka la be ngam lo a ni ber. Lo inngawizawn pawh ni se thikna ka nei hauh lo a, amaherawh chu mi dang hmaa hmel mawi a duh lutuk avanga hei chen nun nuam lo zet  ka hman avang erawh hi chuan ka ngaidam mai mai hauh lo ang.

November thla chanve a kan thleng leh der tawh a, nimin mai khan Neha-I te pawh an innei fel a.  Ka kal chak viau nang a, thil mawi anih chiah loh bakah Ramsanga pawh ka hmu hreh ve deuh hrim hrim. Vawiin lamah Honeymoon turin Maldives lam an pan ang chu. Pathianni a ni a, chawhma inkhawm banah inah kan haw tlang a, U Thantea pawh khumah a mu hahdam a. Sitting roomah ka thu fel a, Neha-in thlalak min lo thawn teuh a. An mawiin an nalh hlawm tak zet. Thlalak pakhatah chuan nupa tuak thar te inkarah tak chuan Ramsanga a ding a, an hlim hmel hlawm hle, a captionah chuan Neha-in, “Hei chu i en rei bik dawn tih ka hria,” tih te hi a rawn zep tel a, ka nui sak a.

U Thantea chawlh a zawh meuh chuan December thla kan kai ta der a. Aizawl khawpui pawh krismas a hnai ta bawk a, kan ri deuh hulh hulh reng a. Keipawh ka dawr ka enkawl chhunzawm leh tawh a, Vaivakawnah wholesale dawr ka enkawl a, hei hi chu pasal ka neih hmaa kan chhungkaw sumdawnna ka enkawl kha a ni a, ka la enkawl reng a, tin, keima pualin Zarkawtah interior décor, lam dawr ZD Interior tih ka hawng a, ka dawr bul chiah, building khat ami tho chu a ruah avangin ka la leh a, naupang thawmhnaw zawrh ka tum a, chuvanga Delhi a zin chu ka nih tak kha.

Dawr cheiin kan buai thei map map hle a, U Thantea pawh ka la titi pui hman lo. Vawiin erawh kan zo fel ta duak a, ka office lamah ka thu mai mai a, dawr hnung lamah keima office hran hi ka dah thar ve a, ZD Maternity and Kids tih ka siam dawn avangin dawr chei paha office siam kha a rem em a, ka office tur te fel ren rawn chu ka siam tel tir a. Ka office tharah chuan ka thu a, ka inngaihtuah vang vang a.

Ka phone chu ka phawrh a, number ka thinlunga ka vawn tlat kha ka call ta a.

Damdawiina kan awm laia lo call tu aw ngei khan, “Hello”  a rawn ti a. Tawng chhuah mai dan tur ka hre lo a, ka ngawi deuh vang vang a, “Hello” a rawn ti nawn leh a.

Aw thian kharh kharh pahin, “Maliani a ni tiraw,” ka ti a.

“Aw ni e, enge ni ta?”

“Zodini ka nia, Thantea nupui, ka pasal nen in inkar hi ka hrechiang duh a ni,” ka ti a, ka thaw halh a.

Lehlam ami chu a ngawi kar a, “Hello, i la awm em,” ka ti leh a.

“Eng chin nge kan chanchin i hriat?” a rawn ti a.

“Tun hma, kan inneih hma kum 2 kal ta a a ngaihzawn i ni thin tih ka hria, damdawiin a U Thantea ICU a a awm lai khan i message kha keima hawn a nia, chuan Kolkata-ah khan call ka lo pick up bawk a,” ka ti a.

“U Thantea kha lo zawt mai rawh,” tih pahin phone chu a dah ta daih a. Ka ngei lutuk a, ka phone chu lei ka chhuah khum ngheng ringawt.

Ka call nawn leh ngat a, a pick up duh lo thak zui leh nghal, mai mai chuan a, a pawi lo e, tlang takin U Thantea ka biak mai a ngai dawn a nih hi.

U Thantea hi ka zah em em a, a bulah hian zu pawh ka in ngam lo hrim hrim, beer mai mai pawh. Mahse, zanina ka thu sawi tum erawh enge maw ka in loh chuan ka sawi ngam pawh ka ring lo. U Mavala thil min hrilh kha a dik em em a, mi hmaah lan mawi loh a hlau em em a, zu te hi inah a in thin a, mahse, tumahin zu a in thin tih an hre lo ang. Zanina ka titipui tur pawh hi ka huphurh khawp mai.

In ka thleng a, Maengi pawn rawng a lo bawl zo tep tawh a. Roomah ka lut a, U Thantea chu a lo mu a, a damloh hnu hian zu a in leh ngai pawh ka hre tawh lo. Ka inthlak zawh chuan chokaah ka kal a, U Thantea zu dahthat chu ka lem ta sak a, Maengi chuan mak ti takin min lo en a, a mitah chuan zawhna hlir a khat a. Ka ngai pawimawh duh lem lo a, no a ka thlit chhuah sa chu ka in zo ta vek a.

Room lamah ka lut phei leh a, ka huphurh tak zet a. Ka thil in erawh a rawn thawk tan a, ka zangkhai tan hle thung. Room ka luh chuan room kawngkhar chu uluk takin ka khar a, mak ti takin U Thantea chuan min lo thlir a. Ka aw ka thian kharh kharh a,

“U Thante, Maliani nen hian eng chen nge in inkawp tawh?” ka ti deuh tawng a.

“Enge maw i sawi le?” a rawn ti let a.

“Phat kual tum lo la, amah Maliani ngeiin nangmah zawt tur che in min tih vang a nia, ka zawh che?” ka ka pawh a kal tha sawt khawp mai.

“Chutiangin kan in inkawp hleinem, ka thiannu hlui anih kha,” a rawn ti a.

“U Thante, mihring hian hmangaih nena awmdun hi kan mamawh a, kei leh nang erawh chu kan inhmangaih lo. Min hmangaihna hi i chetziaah te, i tawngkaah te, i thiltihah te ka hmu ngai lo. Kei chuan ka zah em em che a, ka tana mipa tha tak i nih ringin ka nei che a, theihtawpin hmangaih che hi ka tum thin a. Ka thiltih engkimah hmangaihna chi ka tuh a, mahse hmangaiha lo enkawl zawmtu i awm lo a, hmangaihna chi ka tuh chu a tiak thei ngai lo. Hetiang ringawt a nun hman ral hi i ui ve lo em ni?” ka ti ta a. A ngawi reng a, a hmel chu ka chhiar thiam lo, a thinrim nge rim lo pawh ka hrethiam lo.

“Maliani kha i hmangaih a ni lawm ni? Nang pawn i hmangaih a nih te chuan ngatinge i hmangaih chu i hnenah i awm tir mai loh,” ka ti leh a.

“I rui a ni lo maw?” a rawn ti a.

“Rui lo e, kum tam tak chhung chu heng hi sawi ka duh thin, Maliani ka hriat hma pawn. U Thante, kan inkarah inhuatna em a la thlen hma hian inthen ang, aw, in tha then ila, chuan i duh ber nei la, i dam sawt sawt mai ang. Engatinge mipa zahawm, mipa perfect nih i duh vang a kei leh nang hi dam reng sia kan thih bik kher ang le?” ka ti ta a.

U Thantea chu a ngawi reng a. A tawng tawh dawn lo emaw ka tih hnu chuan, “Zodinpui, inthen thu kha rawn sawi tawh suh, ka then ngai dawn lo che, chu chu i hria em?”  a rawn ti kha fak a.

Ka thaw halh a. “Min then duh loh chuan sum ka rawn chhuah mai ang aw, chuan ka thutlukna that zia hi i hre mai ang,” ka ti a. A ngawi ngul a.

“Kum 5 ka nih lai khan ka pa khan a nupui a thlak a, tun a ka nu hi ka nu tak a ni miah lo a nia,” a rawn ti a, mak ti takin ka meng kal a, ka vawikhat hriatna.

“Kan harsa em em a, chuta karah nuhrawn ka la hrawn zui a, pawl sarih ka nih chuan ka pa a boral leh a, retheihna nen nuhrawn ka hrawnna nen, mi hmuhsit leh endawng ka ni a, ka nuhrawnin min enkawl nan zu a zuar a. Chuan, tuna ka pa hian a rawn luhkhung a. Khang hun laia mi min chhaihna zawng zawng leh zahna ka tawn zawng zawng kha a rapthlak lutuk. Chuta tang chuan ka intiam a, ka nun hi zahawm takin ka chher chhuak ang a, mi min hmuhsitna tur thil ka nunah hian tuman an hmu tawh lo ang tiin. Ka thinlungin hmangaih mahse, Maliani, zu zuar fanu, nuthlawi lehnghal chu ka nei ang a, miin ka hnungah min sawi mahse pawi ti lovin ka awm ang maw? Khang in hmuhsitna kha ka tuar tawh ngai lo ang. Miin Thantea te an inthen tih te, fiamthua pathawi tharlam tih a min fiam tur te hi maw, a thleng ngai lo ang, ka nun hi pawn lamah tal chuan miin ‘a bu ang thlap’ an tih ang hi a ni tur a ni,” a rawn ti a.

Mak ka ti lutuk chu ka ngawi reng a. Fapa mal ve si kan indan nachhan te, tlangval anih lai atanga ama pual in a sak nachhante kha, tlangval puitling tak anih vang emaw te kha ka lo ti thin a. Eng anga tam thuruk lo pai tak ang maw! U Mavala pawh khan a hre hauh lo ang, pawl riat atang chauhin an in hre bawk si. Ka tirilah min man deuh tlat anih chu.

Ngawi rengin a tho a, almirah a phawrh a, envelop lian pui hi a rawn phawrh a, khumah chuan a rawn dahthla la, “I ngam chuan chhuak la, sum chu rawn chhuah teh, i chan tur chu a tha vak lo ang,” tih pahin envelop chhung ami chu a rawn theh chhuak a. Aizawl lama ka thiante ho nen kan party lai te, zu no ka dawm lai te, mipa ka lampuina thenkhat te. Thlalak chu ka enchiang a, uluk taka ka nun thin avangin thlalak mawi lo uchuak engmah a awm loh avang te, Delhi thleng thlenga min lo um lo a Ramsanga thlalak a awm ve hauh loh avangte hian Lalpa chu fakin awm rawh se! Engtikah emaw chuan inthen ka la rawt dawn tih a hriat avangin min blackmailna tur nen a lo inring nasa mai a lo ni.

Dik tak chuan kan nupa nun hahthlak zet avang hian kum hnih khat kal ta atang khan party vela kal ka hrat em em a, zu pawh ka in ve thin a, mahse, rui buaiin ka awm ngai lo thung. Tin, tumah mipa ka kawp ngai lo bawk, Ramsanga chauh lo chu.

Chung thlalak te chu anihna takah ho viau mahsela, U Thantea chuan thawnthu rapthlak tak tak a phuah belh teuh thei ngei ang. Ka thawhalh a, “Mi a pa leh, nun i va man lo em! Anih leh Maliani nen a in chungchang chu?” ka ti leh ngat a.

"Aw, kan inngaizawng thin a, kan la induh in kan la inhmangaih reng a, vawikhat pawh kan la inthen ngai lo, i duh khawp chhanna i hmu em?" min rawn ti let hrep a. Rilru na leh mak ti lutukin room chu ka chhuahsan a. U Thantea zu ka in sa chu ka va hawng leh a, ka tlak leh pap a, a bang zawng chu a bottle in ka hum a, ka motor chahbi ka la a, Maengi bulah chuan U Thantea chaw lo pe turin ka hrilh a, motorin ka tlanchhuak ta a.