There She Goes - Chapter 11

 

Ramsanga Pov

Kumin hi ka nu min kalsan hnua ka Krismas hman nawm ber a la ni. Ka hmeichhe hmangaih ber leh duh ber tê kha, hetah, ka bulah ngei hian a thu a, a rim nu chek chek te khan min zem vel a, ka hlim takzet a ni. Van atangin ka nu pawn min lo hmu ve ngei ang a, a hlim ve ngeiin ka ring. Ka hmaah a thu a, ka kuah tlat a, ani pawn min hnial lo, ka bula a awm chang hian a hlim ve thin tih hi ka hria, chu chuan ka thinlung hi a ti lawm em em bawk.

Ka ta ni thei se lang chuan a natna tawrh tawh zawng zawng hi ka tuam dam sak ang a, hmangaihna in ka enkawl ang a, a hlimna siam chu ka hna pui ber a ni fo ang. Engtin nge ka hnen ka hruai thlen ang chu ka hrethiam lo a, mahse, engtik niah emaw chuan ka ta a ni dawn tih hi ka hre tlat nia.

A pasal a u nen helai party na hmunah hian an lo kal dun ve a, mi inngaizawng kar a party a awm ve reng kha ka nin lutuk avangin pawn lamah awm ka tum a, Zodinpuii khan ka hnung lam atangin min lo hmu ve kar anih kha. Inthlahrung tak chungin min rawn pan a, min rawn pan lo ang tih ka hlau hle bawk. Ka present pek pawh lawm takin a dawng a, a dawngtu nge lawm zawk a petu pawh ka hre hrang nek lo e. Engkim hi pek ka duh a, ka tih theih phak chin tawk hi chu engkim hi tih sak ka duh a ni.

Nichin lawk khan min hawsan a, ka ngai leh der tawh, anihna takah chuan a bula ka awm lai pawh khan ka ngai. Amah vang liau liau in ka rawn haw a, ka nutei lah chuan Mami vang emaw a tia, a phur em em lehnghal a. Zanin pawh Mami lenchhuah chak ka chhuahpui a, vanneihna ka tawn phah ta anih hi, a tha vek tho e.

Ani te khan a pasal kha a then tak tak ang em? Lo then ta se min rawn pan ang em? A insawi ang khan nuthlawi anih tawh dawn vang te, fa nei thei lo anih avangte khan min hel tlat ang em? Chung chuan ka pawi a sawi lo tih hi hrethiam se ka duh ngawt mai. Ka ngaihtuahna chu a vak kual ruai ruai a. Mizo society a nuthlawi kan en dan hi chu a dik lo ka ti telh telh. Ka nu pawh kha khati khawp khan ka pa vang khan a tuar a, an han inthen a, a inchei deuh leh nuthlawi tharlam, pasal tur zawng tih vel khan fiamna a dawng fo a, a taksa chak lo nen, a ning lutuk a, pawn pawh a chhuak peih zen zen lo anih kha. Inthen an ni ve mai a, engati nge ni kan hmuhsit viau thin a, nu nasa tak tur te hian kan dah nghal ngawt thin ni.

Ka motor glass chu a rawn in kik karh karh a, Mami a lo ni a. "Haw tawh ang hmiang," a rawn ti a. He nu te hi chuan care vak pawh hi a duh lo, a duh anga a tal theih hi a duh ber mai. A nu leh pa tlanchhiatsanna excuse ah min hmang a, keiin Zodini hnaihna chance-ah ka lo hmang thung a. Gift exchange dangdai ve tak a ni.

Haw kawngah chuan kan titi barh barh a,"Kan professor nupui a lo kal ve reng a," a rawn ti a.

"Aw, a happening ve chak a niang chu," ka lo tifiam a. 

"Zodini a nia, a hmeltha si,  ui thei a nia aw!Sir Thana nupui mai mai tur chuan," a rawn tih zawm a. Ka phu deuh zawk a, ka hriat belh chak bawk.

"Enga tinge in sir chu, a sual em ni?" ka ti a.

"Sual hran lo ve, mahse, boring turu ang chi kha. Bakah thil tha lo deuh ka hria, tumah pawh ka hrilh ngai chuang lo a, thuruk," a rawn ti a.

"Hmm, hmeichhe ho tak hi chu a," ka ti let mai a. Ka hre chak hle thung.

"Tumah hrilh suh aw, tumah ka la hrilh lo tak tak, nang chuan anmahni i hre chuang lova, ka hrilh ang che, ka hresual tho maithei a," a rawn ti a. Lu ka lo bu nghat a.

A ngawih vang vang hnu chuan, "Dawr ka nghah ve thin lai khan hmeichhe pakhat hian bungrua a rawn lei thin a, insakna. Min dawr nasa ve khawp mai, chuan a hnu deuhah chuan kan indawr rei deuh a, a ba ten kan in pe thin a, ba chu a cheque ten min rawn rul ta thin a, a cheque chu ka en chian chuan Sir Thana cheque ngei a ni. Ka hriat nachhan chu Sir signature kha ka hrechiang ve em a ni.

Mak ka ti thei tawp a, ka zawt chiang hreh sia, vawikhat chu bungrua deliver pahin ka kal ve ta a. Hunthar mawngah a nia, dawrte-ah hnathawk ho chu ka lo nghak a, dawrnghaktunu chu ka titi pui vel a, a bialpa in a rawn sak sak a nia a ti. Thenawm ho pawh chuan an ring vak lo a, bialpa hmel awm an la hmu ngai si lo a. Damdawi an kheh anih te an ring a. Mahse, Sir Thana cheque hlir kha a ni si, mak ka ti lutuk, a hmei anih ka ring," a ti a.

Thinrimna hian min rawn deng nghal dawt dawt a, Zodinpuii hian a hria ang em tih ringawt ka rilru ah a awm.

"Chuvang alawm Zodini hi ka khawngaih ka tih nachhan. A hre lo tawp ang. Hmeichhe innocent lutuk a nia, ka u te nen khan an in classmate thin a. An pa hi a zahthiam in a duat thiam thin bawk si, hetiang ringawt lo deuh hi a hmu ngei awm sia," a rawn ti a. Ka inhum ruh țawlh țawlh a.

Ka angel te hian a va tuar nasa tehlul em! A hriat theih chinah leh a hriat theih loh chinah pawh. He a saltanna atang hian ka hruai chhuah ngei ngei a ngai a ni, amah chauh chuan ani mi nunnem te khan he misual hi a hneh thei lo ang. Amah puih duhna chuan ka thinlung hi a rum vawng vawng a, hmalak tan dan tur lah chu ka hre der lo. Hmannia fiamthu a ruk ka tum der khan, aw min pawh selang chuan ka kiangah a awm daih tawh ang, anihna takah chuan ka fiamthu reng reng lo a, mahse, a hmela hlauhthawnna ka hmuh khan ka fiamthu der ta tawp anih kha.

Zodinpuii Pov

Krismas chu tluang takin kan hmang zo a, U Thantea pawh Pathian zarah a dam chho ve zel a, kan nupa inkar erawh a buai ngai reng in a buai thung.

Mi dang hnenah chuan hrilh ila, a eng lai hi nge i duh a i la awm reng min ti fur ang ka ring, kalsan theih loh chhan tam tak ka nei a. Hmanni lawka heart attack nei anih vang te, ka thlalak nalh lutuk lo a lo kawl tun vang te, a thu phuahchhawp tur ka ngaihtuah te hian, tin, account-ah te, lehkha pawimawh tamtakah nominationah ka dah a, engkim thlak te ka duh. A bul berah chuan hmingchhiat lutuk ka hlau a ni ber. Bible pawn sum tam tak aiin hmingthat hi thlan zawk tur a ni, a tih kha maw.

Fim takin ka inngaihtuah a, nakina inchhir lehna turin engmah tih ka tum lo a, mahse, kan Ramhuaiputara hi chu ka nei hlen hauh dawn lo.

Ramsanga ka ngai thei khawp mai,a chanchin ka hre zui miah lo a, ka thinlungah erawh nawhreh theih loh khawpa chiangin a awm reng thung. U Thantea pawh then ni ila, amah ka pan ka ring lo a, atan hian ka hniam lutuk. Mipa hmeltha leh piannalh lutuk, hnathawh sang tak nei, pa bawk si, hmeichhe duat thiam bawk si, duhthusam mipa ang kha a nia, a tan hian nula hnahkhat ngat hi an tam dawn lutuk. Urlawk zana tum loh lutuka kan inhmuh kha ui tak chungin ka thinlung chuan a tawpna ni rawh se ka ti mawlh mawlh a, hunin a la hril ang chu.

Krismas leh kumthar inkar chu dawr rem fel nan leh chei that nan hun kan hmang a. Kan buai ve em em reng mai. Vawiin chu thawmhnaw leh incheina hralh tlak loh te kan vawm chhuak a, kan nau te ho duh ka thlan tir a, a bak naupang thawmhnaw ho chu orphanage vela dah turin kan pack fel a. Interior lam bungraw hmel hem ho erawh discount turin kan hung chhuak bawk a.

Naktuk mai hi kumhlui thlah ni a ni tawh a, kumin chhungin ka mit an tlung hlawm em em a, ka laka sual leh eiruk tum ang zawng te, thatchhe mawngrit lutuk tumah ka hmu lo. Kumhlui thlahniah zanriah ka buatsaih sak ang chu.

A khat mawi tawkin customer kan nei ve reng a, Duati nu leh nula hmeltha zet mai hi an rawn inzui a, ka hmelhriat an nih avangin ka lo dawr vat a. 

"Duati nu kha i ni tiraw, Delhi-ah khan kan inhmuh zuai kha," ka va ti a.

"Aw, Zodini kha maw i nih, damdawi inah khan in hmanhmawh avang khan kan inbe chiang hman ta reng reng lo a, hei i dawr em ni? I va nei changtlung ve," a rawn ti nghal bawrh bawrh a.

"Mami, hei hi lawm, Duati te naute neiha Ramsanga nen a lo buaipuitu kha anih hi," a ti lang lang a.

"Zodin, hei Ramsanga thiannu a nih hi,Mami a nia, Krismas hmang turin an rawn chho dun anih hi," a ti a. Ka sa nghal pup pup. Ramsanga kha keimah vanga lo chho niin ka hria a, mahse, ka hmaa nula ding chhe lo zet nen hian..... ngawi teh, thil hi ka van man lo tak em! Kei chu mi nu ka nia, Ramsanga tan chuan nula hnahkhat ngei hi a dik thlap zawk a ni. Urlawk zan khan an pahniha an kal dun inkarah hian ka lo tla zep a ni ngei ang, ka zak chem chem a, Ramsanga nutei pawh chu ka be mumal hlei thei lo a, ka office lamah ka luh san ta a.

Ka va lo mawl em! Tu tlangval nge ka kiangah awm reng duh reng ang ni, Ramsanga thusawi te kha ka lo awih ve em em a, ka va mawl tak. Mahse, dawt mai a nih ka ring thei bawk si lo, dawt ni tur atan chuan a tak mah mah a ni. Ramsang, oh. Ramsang, i hnenah lo kal ngai dawn lo mah ila, kan hun hman dun thin tal kha chu dawt ni lul suh se aw! 

Inah ka haw a, vawiin chu kan thawk nasa bawk a, ka chau hle mai a. U Thantea chu roomah computer hmaah a lo thu run a, krismas zawh atang khan Maengi a awm si lo va, rawngbawl turin ka haw hma thin a. 

Rawng ka bawl nghal sawk sawk a. Rawng ka bawl zo rooma ka lut leh chu printer in eng eng emaw a lo print a, U Thantea pawh a lo la buai hle a.

Ka inthlak fai a, U Thantea hnenah chuan chaw ei ka peih tawh thu ka hrilh a, room kawngkhar ka chhuak tur chiah chu, zawi sup thinrim tih hriat reng hian, "Zodinpui" a rawn ti a. Ka ip nghal chawi a, ka hawi let a.

A thil print ho kha khumah a rawn thehthla a, Ramsanga nen dawra kan inzui lut lai te, dawr atanga ka thlah tur kan inzui chhuak te, urlawk zana  motor chhunga kan lut tur chiah te, U Mahlimi nena party naa kan thu dun lai te, chi hrang hrang a tam mai. A thinrim hmel tluk zetin ka thinrimna a nasa zawk bawk.

"I insawifiah ngei a ngai ang," a rawn ti a.

"Enge insawifiah ngai, ka duh dan danin ka awm ang a, min rawn enthla suh ka ti che a ni lawm ni?" ka ti let a.

"I lo inthup rei tak zet a ni, mi thianghlim angin ka bulah i awm a, mipa i dang i lo kawp reng si," a rawn ti a.

"I zak chai lawm ni, tunge mi thianghlim anga awm chu, tunge kum 10 chhung ka phena hmeichhe dang dah tu kha, i nihna kha hre chiang la, ka nunah rawn inrawlh suh," ka ti let a.

"Min chhang let reng reng suh, Zodinpui, i duh duh ka tih tir che a, i nu leh pa ka enkawl tir che a, i sum thawh chhuah cheng khat pawh ka beisei ngai lo, i duh dan dan in i khawsa a, min chhanglet ngam a maw?" a rawn ti khur khur a.

"Enge min pek chu, he inah hian khawharna eh lungngaihna chiah ka dawng," ka ti let ve sak sak a. A bula awm rei ka tum tawh lo bawk a, ka huai pang pang khawp mai. "He in atang hian ka chhuak dawn khawp, i duhtawkin ka chanchin chu i rawn thehdarh dawn nia, hlauhna chhe te pawh ka nei lo tih lo hria ang che. Nang anga a der a nun hi ka peih ve reng reng lo," tih pahin room chu ka chhuahsan a, ri deuh rawk rawk ri ka hre zui a. Engah mah ka ngai lo lui a, mahse, thaw kawk kawk ri ka hriat takah chuan ka tlan lut leh a. Lalpa leh, U Thantea chu a awm dawmin a lo thaw kawk kawk a, ka hlauthung lutuk a, a lamah chuan ka tlan phei rawk rawk a. Ka ko zui mawlh mawlh a.

Thei leh thei lohin ka kuah thu a, inthiam lohna hlir hian ka khat mup mup a.

"U Thante, motor thleng i kal thei ang em? Ka tih palh lutuk," ka ti mawlh mawlh a.

A lu a rawn bu a, ka darah ka inkuah tir a, garage lampanin kan inkuah chhuak ta a. Motor chhunga ka thut fel tir hnu chuan inchhungah ka tlan lut leh a, ka bag ka la a, in ka kalh a, damdawiin lam panin kan in khalh chhuak ta a.

ICU -ah an dahlut nghal a, ka hlauthawng tak zet zet. Hetiang hi a thleng thei tih ka hriat avangin theihtawpin ka insum a, in hauh ai chuan amah ka be lo char char a, mahse a tawpah a puak darh leh ta tho si. Ka biangah mittui a rawn luang pap pap a, tih hmasak ber tur pawh ka hre lo. Doctor lo chhuah hun nghakin ka thu ngawt ngawt tawp mai a ni.

Ka inngaihtuah fim hnu chuan kan chhungte ho chanchin ka hrilh ve thei ta hram a. Kan chhungte ho an rawn thlen chuan keipawh ka zia chho tan ta a. Doctor a rawn chhuak a, hlauhthawn awm a ni lo a, amah pawh a stable vek tawh thu a rawn sawi a. Mahse, enthlak an duh avangin ICU ah ni 2 vel dah an la tum thu a rawn sawi a, ven khat zawngin ka veng hawk mai. U Thantea hi tunah hian boral ta se, ka inngaidam thei ngai lo ang.

Chu zan chu mumal lo zetin kan hmang tling tla ve ta hram a. A tukah chuan U Mahlimin min rawn thlak a, inah in tifai turin haw ka tum a, ka haw hmain ICU-ah chuan ka lut a, U Thantea chu a lo muhil a, ka kaitho duh lo a, ngaihdam ka dil mawlh mawlh a, ka chhuahsan ta a.

Inah ka haw tlang a, kumhlui thlahni a ni a, hman nawm loh hlauvin mi an phu sup sup a, kei pawh kumhlui a rual a nun thar ka neih nan ka buai hle a ngai dawn a ni. In ka thlen chuan tui sa tawkin ka inbual a, ka dam sawng sawngin ka hria.

Damdawiina ken chi deuh bag te lamah chuan thil tul tur ang te chu ka khung fel zung zung a. Dar 9 a lo ri der tawh a, nizan lama ka rawngbawl chu kan ei mai tawh loh hmel em avangin ka silfai vek a. Thingpui tui tawk leh chhangthawp tharlam zet haw kawng a ka lei chu ka ei a. Ka in ei puar hnu chuan ka chhuak ta a. Parking a buaithlak leh dawn avangin taxi ka hmang a.

Wholesale dawrah ka kawi hmasa a, Mafaka pawh a lo buai leh tawh khawp mai.

“Ehe, U Zodin, i lo kal thei a ni maw,” a rawn ti a.

“Nia, last day te a ni sia, ka rawn inlan hram, Mafak, thil pawimawh deuh sawi tur ka nei a, i hman lawk em?” ka ti a. A thiltih lai chu kalsan in min rawn pan vat a.

“Ngun takin lo ngaithla ang che, he dawr min enkawl pui naah hian ka lawm tak zet a, tunah chuan ka tel miah loh pawn he dawr hi ka ngaihtuah tawh lo. Kumthar present atan thil tha tak pek che ka duh a, ka nau i ni a, ka business partner i ni bawk a, he dawr atana thil pawimawh zawng zawng hi hriat loh i nei lo bawk,” hriatthiam loh hmel zetin min en reng a.

“Chuan, ka sawi tum tak chu, he dawr hi zanin dar 12 a pelh a, kum a thar atang chuan i ta ni tawh ang, i enkawl turin ka pe pumhlum che a nih chu, mahse, ka pa bul tan a nihna angin ka pa’n cheque-ah a hming a sign a la ngai ang a, a bak chu i ta ni e. Ka pa in engkim lehkha a siam fel tawh a, kumthar lamah i la titi pui dawn nia,” ka ti a.

“U Zodin,  chutiang ringawt te chu, engmah sawi ngaihna pawh ka hre lo,” a rawn ti a.

“Nang lo phu tumah dang an awm lo, i Papuia te nupa erawh i enkawl ve an ngai thung ang,” ka ti a, ka nui sak a. Hnathawktu dang ho chu ka ko khawm a. “Naktuk atang chuan dawrah hian ka lo kal tawh lo ang, a chang chang tih loh chuan, dawr chu a neitu thar Mafaka bulah ka hlan tawh e, tha deuhin in thawk ho dawn nia,” ka ti a, lawmpui nan an chibai sap sap a. Damdawiina kal ngai chhuanlamin ka chhuahsan ta a.

Ka dawr lamah ka kal leh a, dawr nghak tute ho chu dawr a chanve khar a, ka office-a lo lut khawm turin ka hrilh a. An rawn luhkhawm hnu chuan kan pa damloh thu te, dawr ka kal theih rih loh tur thu te ka hrilh a, rinawm taka lo thawk theuh turin ka hrilh bawk a. Tin, kumhlui thlahna dinner pawh ka siam theih dawn loh avangin ngaihdam ka dil nghal bawk a. Ka duh ang ka sawi fel hnu chuan ka manager pahnih chu a falin ka be leh a, dawr ka hawn fel tir ta a. Rei lote ka office ah chuan ka thu a, dinner ka siam sak theih dawn loh avangin lunch tui tak ka order sak a, ka ei pui nghal bawk a.

Tlai dar 2 a lo rik chuan dawr ka chhuahsan a, Hunthar veng lam ka pan ta a. Ka thiltih tur chu ka huphurh em em a, ka sa pup pup in ka hria. Veng mawng lama in mawi zet mai, te fel ren rawn, architect duh ang taka an design thlap tih hriat ngawi ngawih lam chu ka pan a, door bell chu ka hmet a, ka nghak ta vang vang a.

Nu upa lam hian kawng min rawn hawn sak a. “Enge ni ta,” a rawn ti a. Maliani ka hmuh duh thu ka sawi a. Maliani chu a ko ta nghal a. Ka hmel a hmu chiah chu Maliani chu a dang nghal sawp sawp a, ka nuih saih a, a fala biak ka duh thu ka hrilh a, a room lamah min hruai ta a.

A theihpatawpin huaisen a tum a ni ve ngei a ni ang, room kan thlen chuan, “Enge i duh,” a rawn ti ram hmak a.

“Malian, buaina chawk chhuak turin hetah hian ka lo kal lo,” ka ti a.

“Enga, in pa ICU-a awm lai laia helai lo thlen chu, buaina lo enge i rawn ken chuan ang,” a rawn ti let a.

“Malian, U Thantea hi i hmangaih lo em ni?” ka ti a. Min en reng e, “Ka hmangaih avangin  a lawm a thu thu a ka awm reng ni,” a rawn ti chuai raih a.

“Anih leh engvangin nge nupuia min neih khan i then mai loh a,” ka ti leh a, “Engtinnge ka tih ang, kan chhungkua in min chawm a, in leh lo min din sak a, nei thei lo mah ila, ka kalsan thei hleinem,” a ti a. Mak ka ti tak zet, he in pawh hi U Thantea lo sak a nih lehzel chu!

“Dik tak chuan in nupa a in inzui ka hmuh chang te hian ka na thin asin, ka thik ngawih ngawih che a, amah ka haw em em bawk. Min nei duh mang si lovin a salah min tan tir a, ka chhuak thei tawh bawk si lo,” a rawn ti a, a mittui chu a tling pam a.

“U Thantea hian hmangaiha enkawltu a mamawh a, ka theihtawp ka chhuah a, ka enkawlna kut te chu ama ngaihah chuan hmangaihna kut a nih loh avangin a dampui ve ngai lo. I kut, amah ngeiin a hmangaih in a a enkawlna hi a mamawh a ni, a rilru a piangsual em a, a hrethiam lo mai mai a ni,” ka ti a.

“Malian, nangmah ngeiin i enkawl duh em?” ka ti leh a. A lu bu nghat nghat a. Room kawngkhar chu an rawn kik karh karh a, thingpui min rawn pe a.

“Dik tak chuan ka hmangaih em em natna khumah a mu a, a kut pawh ka vuan thei lo a, a chal pawh ka dek thei lo. Ama min lo biak hun chan tawp mai hi ka tih theih neih chhun a ni a, ka mang a ang tak zet thin asin,” a rawn ti a. Maliani ka khawngaihna chu a lian takzet bawk.

“Thil min tih sak thei ang em,” ka ti a. Mak tih hmel zetin min rawn en a.

“Zan tlai dar 5 hi awmpuitu te inthlak leh hun a ni a. Chumi hunah chuan ka aiin kal ang che,” ka ti a. A rawn hawi phawk hra a, a zam hmel hle bawk.

“Ka thei lo ang, engtinnge i chhungte ka hmuh ngam ang,” a rawn ti ha a. Ka bag chu ka hai rak rak a, envelop ka phawrh chhuak a. “Damdawiin i thlen hunah chuan ka nu a lo awm ang a, i hai thei lo ang, kan inang lutuk, he lehkha hi  i pe ang a, engkim ka hrilh fiahna, chhiar nghal turin i ti dawn nia,” chuan engkim a fel vek mai ang, i chungah pawh an tha em em ang a, nangmah ngeiin U Thantea chu i enkawl thei bawk ang a, U Thantea pawh a dam sawng sawng mai ang,” ka ti a.

“Anih leh nangmah engtinnge i awm ang?”

“Kei chu min ngaihtuah suh, ka tha lutuk, in chanchin hi ka hriatna  a rei tawh a, ka hmeichhiat pui i ni a, in awmdun hi ka duh ber a ni,” ka ti let a. Lehkha chu a rawn la a, a huphurh hle tih ka hre thei.

“Hlau suh, engkim fiah fel takin ka ziak a, a dik tak chuan he buainaah hian kan tang ve ve a, nang chuan U Thantea i hmangaih a, kei chuan ka hmangaih lo. U Thantea’n engmah a tih theih loh lai hian kan tanna atangin engkim hi kan lo siam fel vek thei asin,” ka ti a.

“Lawmthu hrilh ngaihna che pawh ka hre lo,” a rawn ti a. “Hmangaih i phu a, i hmangaihna lanchhuah tir pawh i phu em em a ni, engkim a tha vek ang,” ka ti leh a. An in ka chhuahsan ta a.

Nimin lama Vanglainia 2^nd Hand car an rawn zawrhna lam chu ka pan ta a. Niminah ka be lawk vek tawk a, fel fai takin car chu ka lei fel a, a la thar tha hle a, an damloh avanga hralh duh an ni a. Pawisa ka pe fel a, sales deed erawh Maengi hmingin ka ti thung a.

Malianin damdawiin a thlen hma ngeiin engkim ka tihfel vek a ngai a. Damdawiin a thlen chuan tuman min rawn be pawp thei tawh tur a ni lo. Silchar Airport atangin New Delhi ka pan ang, naktuk New Year a nia, flight man pawh a to viau mai. Maengi ID ka lo la kawl hlauh chu ka vanneih pui tak zet a ni. Ka phone sim card chu ka phawi a, ka sim lei thar chu ka thun a, engkim a thar vekin bul kan tan ang chu. Social media-a ka account ho ka deactive nghal vek bawk a.

Zanlai dar 12  a rik chuan Silchar ka lut fel chiah a, kumthar lawm nan halmawi chi tinreng an hal puak dum dum a, motor atang chuan ka thlir reng a. “Nunhlui mangtha le” ka ti ta sup a.

 

Ramsanga Pov

New year a ni a, rin aiin Aizawlah ka cham rei ta a, Zodini erawh ka hmu leh ta lo. Chhun dar 12 a ni tawh a, nizan lam kan men rei avangin ka la mu  mai a, Duati erawh a thiannu pa damlo kan turin biak in atangin an pa nen an tlang a ni awm e. Ka nutei leh naute an inchhaih vel thawm chu ka hre leh thin a.

Muang changing ka tho a, ka inbual fai a, chaw ei turin ka chhuak ve ta a. Ka nutei pawn a tupa sial chu a lo awi mek a. Chaw chu ka ei mawlh mawlh a, Duati thaw hlawp hlawpin a rawn lut a, ka lo en reng a. An pa in a hnungah a rawn chhawm a.

“U Ramsang, Zodini a bo,” a rawn ti chhuak hawk a.

“Enga?” ka ti let tuarh a.

 “Zodini a bo, kan damdawiin kalna-ah khan Sir Thantea kha ICU-ah a lo lut ve a, ka thiannu Jess-i pa pawh a awm ve tho a, Jess-I chuan min lo hrilh a. Nizanah Sir Thante-a chu a chau thut a, Zodinin a rawn hruai a, zanah pawh a riahpui a, chuan tukin zingah an chhungten an rawn thlak a, a tlanbo zui ta a ni awm,” a ti zui a, a thaw he hu a.

Ka nutei pawh chu chanchin hrechiang chakin choka lamah a rawn kal ve a. Duati thusawi chu a ngaithla reng a. “Zodini chu Jasona piana Sangtea rawn kalpui tu kha ni lawm ni, nimin piah lawk pawn ka la hmuh kha,” a rawn ti he haw a.

Duati nen chuan, “Maw,” kan ti rual thawt a, ka nutei lam chu kan hawi a.

“Tinge ti khan min en a, nimin piahah Mami nen kan chhuak dun a, Bawihtea kawr tur lei ka tum a, Zodini dawr a lo nia, Mami pawh ka hmelhriat tir kha,” a rawn ti leh a.

Duati chuan, “Engtin?” a rawn ti tuarh a.

“AW, Ramsanga thiannu a nia, Krismas hmang turin an lo haw dun a te ka tit a in ka hria, enge, a pawi vak ami, engatinge a tlanbo reng reng ni aw,” a rawn ti zawm zat a.

Ka nutei thusawi chu ka run kher mai, Zodinpuii chuan bialnu ka nei emaw a ti ngei ang a, a van la na dawn tak em! Chubakah min ring ngai tawh kher lo ang. Ka insiam mawlh mawlh a, damdawiin lam chu ka pan zui ta nghal a. Ka nutei chu Duati’n lo hrilhfiah mai teh se.

Damdawiin ka thlen chuan han biak mai tur ka van khawp mai. Hman zana Zodini rawn kalpui, Thantea nau a tih kha ka hmu ta a. Zodini thian ka nih thu leh chanchin te ka zawt a.

“Nimin khan zingah ka thlak a, tha takin ka thlah a, nilengin a lo kir ta lo a, tlaiah chuan Maliani hi a lo kal ta a, lehkhathawn a rawn keng a, chu zawng chu a ni e, engmah hi ka la hrethiam lo a ni” a lo ti a.

“Khawnge lehkhathawn chu?” ka ti a.

“Zodini nu bulah a awm, a haw chiah a,” a rawm ti let a. Zodini nu te in lam pan chuan ka tlan leh ta nghal a.

Zodini nu te in chu ka thleng a, a lo inkhar thiap a. Door bell chu ka hmet a, Zodini nu ni ngei tur chuan kawngkhar a rawn hawng a, an inang kher lehnghal a, hai theih an ni lo. A tap nasa hle tih a tih a hriat a, a  mit leh a hnar vel chu a sen hlar mai a.

“Enge ni ta?” a rawn ti a, a aw pawh a dik lo.

“Zodini thianpa ka nia, a chanchin ka lo hria a, lehkhathawn i dawng tih ka hre bawk a, ka rawn pan tawp che, khawngaihin lehkhathawn chu ka chhiar ve thei ang em?” ka ti a. Min en vang vang a.

“Lo lut phawt teh, Ramsanga i ni em?” min ti a. Mak ka ti angreng hle. Thutna min kawhhmuh hnu chuan room lamah min luhsan ta a. Ka thinlung hi a hmanhmawh a, khawvel erawh duh angin a kal muang hret a ni. Zodinpui, i chungah thil tha lo engmah thleng suh se!

Zodini nu chu lehkhathawn nen chuan a rawn kir a, min pek pah chuan, “Hmanzan khan rui chungin a lo kal a, a thusawi kha engah mah ka lo ngaih sak duh lo a, a pawi zo ta anih hi. Ka bulah zu hi a la in chhin ngai lo a, khatianga rui chunga a lo kal te kha chuan  a dinhmun lo hriatthiam pui tur ka ni asin,” a ti sap sap a. A sawi zawh chuan a pa pawh room lam atangin a rawn chhuak ve a. Lehkhathawn chu ka chhiar zui ta a.

Ka nu leh pa duhtak,

          He lehkhathawn i hmuh hi chuan min be thei tawh lo ngei ang, he khawvel atang hian lak bo ka nit a tihna a ni lo a, ka thawnthu hlui hi a hahthlak em a, thawnthu thar ziak turin ka awm bo lawk dawn tihna a ni tih min lo hriat sak dawn  nia. Min lo zawng buai lo ula, a tul ka tih hunah in hnenah ka rawn kir leh ang tih ka tiam a che u.

          Ka khawvel tawn mek kha hmachhawn turin chakna ka nei rih lo a, chuvangin, hma lam ka pan theih nan, nun thar nei turin ka kal bo rih mai tihna a ni e aw.

          Hman zana ka lo len khan U Thante’an ngaihzawng a nei tih te ka rawn sawi kha, nupa chungchang tlang tak a sawi turin ka thisen in a ngam lo a, zu ka rawn in sa khang lang a, ka thusawi kha in awih vak lo a nih kha tiraw.

          Kan chhungkua hian U Thantea hian min lo bum a, kan inneih hma daih atanga khan bialnu dang nei rengin min lo rim a. Mahse, chu a bialnu chu Mizo Society a kan hmuhsit mi tak zu zuar chhungkua ami anih avang leh nuthlawi anih avangin a nei ngam lo a, kei kha min rawn thlem thlu ta a ni. Chu nula chu kalsan duh si lovin kei hi min nei ta reng a, nu, ka hriat chhuah ni a ka rilru nat zia kha aw.

          Mahse, chumi zawng zawng piah lamah chuan keipawn duh deuh leh hmangaih tak, Ramsanga ka tawng ve ve asin, mahse, mi nupui ka nih avangin chu pa lakah chuan zuamawm emaw, a tha lo leh a mualpho zawngin ka che hauh lo. Amaherawhchu, in makpa duh tak khan ka kalsan chuan emaw, a chanchin ka sawi chhuah chuan ka chungchang chu dawt nena pawlha min tih mualpho tur thuin min vau a, nu, nangni chuan mualpho mah ila, min pawm dawn tih hre mah ila, in hmel ka hmu ngam ve ngai lo ang.

          Chung zawng zawng chu a thlen loh nan, U Thantea a chet theih loh lai ngeiin ti hian hma ka la ta mai a ni. He lehkha lo kengtu hi U Thantea bialnu chu a ni a, ani hian thiamlohna pakhatmah a nei lo, U Thantea vanga tuartu ve tho a ni, chuvangin, a dinhmun dik tak tur chu lo pe ula, U Thantea kha lo enkawl tir ang che u.

Kei erawh chuan hetiang boruak hahthlak tak hi ka tuar thei tawh rih lo a, ka hah takzet a ni. Kum 10 chhung khan hmangaihna leh duatna te ka tawng ngai tawh lo a, ka chau zo tawh. Hmana ka tet laia ka sawi thin kha ila hria em? Kei chu zinkual a, khawvel fan ka chak ka tih thin kha! Tun hun tha hi khawvela ka tih chak thin te tih nan ka hmang ang a, nun thar nen, bul tan tha turin in hnenah ka lo kir leh ang.

Nu, Ramsanga ka tih chu ka duh tak zet a ni, amah pawhin min duh ve ngeiin ka hre thin a, mahse, tlangval pangngai a ni lova, mi chunga leng a ni, ka tan a sang lutuk a, a tan hmeichhe tha zawk tam tak an awm ang. Kei chu nuthlawi a karah fa pawh nei thei lo ka ni lehnghal a. Mahse, min lo duh ve tak tak a, ka hnena a thusawi thin te kha a ti tak tak a nih ngai chuan ka chanchin a hriat hunah in hnenah a lo la kal ngei ang. A lo kal hlauh chuan min hmangaih tak tak a ni tih lo hria ula, in fanu hian mi hmuha hmel mawi nan mai ni lo, thinlung zawng zawnga hmangaihtu mipa a tawng ta tih in lo hrethiam dawn nia.

Dam takin lo awm ula, hlim takin lo awm ang che u. Kan inhmuh leh hma zawng atan mangtha phawt ule.

                                                                  

                                                                             In fanu duatlai,

                                                                                Zodini

          Lehkhathawn ka chhiar zawh chuan ka thaw hawk a, aw, hetiang em em a dawihzep tur hian a ni maw i pasal chuan a lo awpbeh che. Ka zawng che ang a, ka zawng hmu ngei ang che, chumi hunah chuan ka ta, ka ta chauh i ni tawh ang ka ti mawlh mawlh a.

          Zodini nu leh pa chuan a duh anga chhuah zalen an duh a, police hnena report an duh bau lo. Kum 10 a lo tuar tawh a, zalen takin awm se, a lo kir leh mai ang, a hun tur hriat loh mahse, an ti tlat, zawn erawh a ti hautak viau ang.

          A dawr leh a thiante kan hriat theih ang ang kan be kual a, dawr nghaktute ho chu thu a lo hnutchhiah vek a, rei deuh hlek chawlh a lak tur thu te, a  lo kir hma chuan rinawm taka dawr lo enkawl turten a lo chah hlawm a, a mi rin zual hnenah sum enkawl dan tur thlengin a lo chah vek bawk.

          Delhi lamah Neha ka be bawk a, engmah chanchin a hre lo a, ka zuk tih mangan belh hi a ni ringawt mai a ni. Airport lama ka thiante ka be kual a, a hminga ticket in cut engmah a awm lo bawk.

          A account neihnaah ka kal a, a bo dawn niin pawisa tam tham tak a lo la chhuak ngei a, chubak chu debit card emaw, credit card emaw engmah chhui tur a awm hauh lo. Ka bei a ti dawng tak zet a ni. Ka tih theih zawng zawng ka ti a, thawm ri va engmah ka hre lo.

          Thla khat zet Aizawlah ka cham phah a, Aizawlah a awm ka ring lo nangin a nu te a rawn biak mai ka ring a, a hnathawk te pawh, tu emaw tal a rawn biak ka ring a, mahse, a reh hian a reh tlawk tlawk a.  February thla a lo thlen chuan beidawng takin Aizawl chu ka chhuahsan ve ta a.

Zodinpui, kawlkil tawpah pawh awm la, ka rawn zawng chhuak ang che.

                         A tawp ta